ގޯލްޑަން ފުޓްސަލް ޗެލެންޖް: ތިން ޒޯން ޗެމްޕިއަނުން ކުއާޓާއަށް

ސޮނީ ސްޕޯޓްސް ގޯލްޑަން ފުޓްސަލް ޗެލެންޖުގައި ރޭ ކުޅުނު މެޗުތައް ކާމިޔާބުކޮށް ތ. ތިމަރަފުށްޓާއި ލ. ގަމުގެ އިތުރުން ރ. އަލިފުށި ކުއާޓާ ފައިނަލަށް ދަތުރު ކޮށްފިއެވެ.

ރޭ ފުރަތަމަ ކުޅުނު މެޗުގައި ޒޯން ފަހެއްގެ ޗެމްޕިއަން ތިމަރަފުށި ވަނީ ޒޯން ހަތަރެއްގެ ދެވަނަ ހޯދި އދ. ދަނގެތި ކޮޅަށް ހަތް ލަނޑު ޖަހާފައެވެ. މި މެޗުގައި ތިމަރަފުށިން ޖެހި ހަތް ލަނޑުގެ ތެރެއިން ހަތަރު ލަނޑު ޖެހީ މި މުބާރާތުގައި ތަފާތު މޮޅު ކުޅުމެއް ދައްކަމުން އަންނަ އެޓީމުގެ ޒިޔާން އެވެ. ޒިޔާން ވަނީ ރޭގެ މެޗުގެވެސް މޮޅު ކުޅުންތެރިޔާގެ މަގާމް ހޯދާފައެވެ. ތިމަރަފުށީގެ އަނެއް ދެ ލަނޑު ޖެހީ މިސްބާހު އާއި އިސްމާޢީލް ޝިޔާދް އެވެ.

ތިމަރަފުށީގެ މެޗަށްފަހު ކުޅުނު ލ. ގަމާއި ފ. ނިލަންދޫ ވާދަކުރި މެޗު 5-0 ގެ ނަތީޖާއަކުން ކާމިޔާބު ކުރީ ލ. ގަމެވެ. ފުޓްސަލްގައި ފާހަގަ ކޮށްލެވޭ ގިނަ ކުޅުންތެރިންތަކެއް ހިމެނޭ ގަމަކީ ޒޯން ހައެއްގެ ޗެމްޕިއަންކަން ހޯދި ޓީމެވެ. ނިލަންދޫއަށް ގަދަ 16 އިން ޖާގަ ލިބުނީ ޒޯން ފަހެއްގެ ދެވަނަ ޓީމުގެ ގޮތުގައެވެ. މި މެޗުގައި ގަމުން ޖެހި ފަސް ލަނޑުގެ ތެރެއިން އެޓީމުގެ ޙުސައިން ނާޝިދު ވަނީ ދެ ލަނޑު ޖަހާފައެވެ. ގަމަށް އަނެއް ތިން ލަނޑު ޖަހައިދިނީ މެޗުގެ މޮޅު ކުޅުންތެރިޔާގެ މަގާމް ހޯދި ހުސައިން ޝަރީފް (އޮންލީ) އާއި އަހުމަދު އަޖުވަދާއި، އަބްދުﷲ ޖުނައިދެވެ.

ރޭ ކުޅުނު ފަހު މެޗުގައި ޒޯން ތިނެއްގެ ޗެމްޕިއަންކަން ހޯދި އަލިފުށި ވަނީ ޒޯން ހައެއްގެ ދެވަނަ ހޯދި ގއ. ދާންދޫ ބަލިކޮށްފައެވެ. އަލިފުށި މި މެޗު ކާމިޔާބު ކުރީ 4-1 އިންނެވެ. މިއީ މި ނަތީޖާއިން ޖެހިޖެހިގެން އަލިފުށި މޮޅުވި ތިންވަނަ މެޗެވެ. މި މެޗުގައި ފުރަތަމަ ލަނޑު ޖެހީ ދާންދޫ ޓީމުންނެވެ. މި ލަނޑު އެޓީމަށް ޖަހައިދިނީ މުހައްމަދު އަބްދުއްސައްތާރެވެ. އަލިފުށިން ފަހަތުން އަރައި މިމެޗުން މޮޅުވި އިރު ލަނޑުތައް ޖަހައިދިނީ އިބްރާހީމް ފުރުގާން އާއި މުހައްމަދު ރަޝީދުގެ އިތުރުން އަހުމަދު ވިޖްދާން (ވިޖޫ) އެވެ. އަލިފުށި ޓީމަށް މި މުބާރާތުގައި އެންމެ މޮޅު ކުޅުމެއް ދައްކަމުން އަންނަ ވިޖޫ ވަނީ ރޭގެ މެޗުގައި ދެގޯލު ޖަހާ މޮޅު ކުޅުންތެރިޔާގެ މަގާމްވެސް ހޯދާފައެވެ.

މި ތިން ރަށާއެކު ކުއާޓާ ފައިނަލުގެ ޖާގައެއް ކ. މާފުށްޓާއި ސ. ފޭދޫން ވެސް ވަނީ ކަށަވަރު ކޮށްފައެވެ. ކުއާޓާ ފައިނަލުގެ ފަހު ތިން ޖާގަ ހޯދާ ޓީމުތައް ކަށަވަރު ވާނީ މިރޭ ކުޅޭ މެޗުތައް ނިމުމުންނެވެ.

 

މިރޭ ކުޅޭ މެޗުތައް:

20:15: ބ. އޭދަފުށި – މ. ދިއްގަރު

21:15: ހދ. ނާވައިދޫ – އއ. ބޮޑުފުޅަދޫ

22:15: މާފަންނު – ހއ. ވަށަފަރު