ޕެލޭ އަށް ފަހު 19 އަހަރުގައި އެންމެ މޮޅީ އެމްބާޕޭ؟

މިފަހަރުގެ ވޯލްޑް ކަޕްގައި އެންމެ ގިނަ ބައެއްގެ ލޮލުގައި އަޅައިގަތް އެއް ކުޅުންތެރިއަކީ ފްރާންސްގެ ޓީންއޭޖަރ ކިލިޔަން އެމްބާޕޭ އެވެ. މުބާރާތުގެ ދެވަނަ ބުރުން ފެށިގެން އެމްބާޕޭގެ ކުޅުން ވަރަށް ބޮޑަށް ފާހަގަވިއެވެ. މި މުބާރާތުގައި އެމްބާޕޭ ވަނީ މިހާތަނަށް 3 ގޯލު ޖަހައިފައެވެ. އޭނާ ދެވަނަ ބުރުގައި އާޖެންޓީނާ ކޮޅަށް ޖެހި ދެގޯލަކީ 60 އަހަރުވީ ރެކޯޑަކާއި އަރާ ހަމަކުރި ދެގޯލެވެ.  ޓީންއޭޖް ކުޅުންތެރިއެއްގެ ގޮތުގައިހުރެ އެއް މެޗުގައި ދެގޯލު މީގެ ކުރިން ވޯލްޑް ކަޕް މެޗެއްގައި ޖަހައިފައިވަނީ ފުޓްބޯޅަ ލެޖެންޑް ބްރެޒިލްގެ ޕެލޭ އެވެ. އެއީ 1958 ވަނަ އަހަރު ބޭއްވި މުބާރާތުގައެވެ.

މަންމައާއި ބައްޕަ ނިސްބަތްވީތީ ކެމަރޫނަށް ނުވަތަ އަލްޖީރިއާއަށް ކުޅެވެން ފަހިވެފައި އޮއްވާ ފްރާންސް އިހްތިޔާރު ކުރި މިކުޅުންތެރިޔާ އުމުރުން 19 އަހަރުގައި ފުޓުބޯޅައިގައި މަޝްހޫރު އެހެން ލެޖެންޑުންނާ އަޅާކިޔެން މިވަނީ ފެށިފައެވެ. އެމްބާޕޭ ގަބޫލުކުރާގޮތުގައި ގައުމު ތަމްސީލުކުރާކަށް މުސާރައެއް ބޭނުމެއް ނުވެއެވެ. އެހެންކަމުން ވޯލްޑްކަޕް ގައި އޭނާއަށް މެޗަކަށް ލިބޭ ގާތްގަޑަކަށް 20000 ޔޫރޯ އޭނާ ހަދިޔާ ކުރަނީ ޗެރިޓީއަށެވެ. އެމްބާޕޭ މިހާރުވެފައިވަނީ ފްރާންސްޓީމަށް އެންމެ ޅައުމުރުގައި ވޯލްޑްކަޕްގައި ގޯލެއް ޖަހައިދިން ކުޅުންތެރިޔާއަށެވެ. ކުރިއަށްއޮތް މަދު އަހަރެއްގެ ތެރޭގައި ބެލެންޑިއޯ ހޯދާނެކަމަށް ގިނަ ބަޔަކު ގަބޫލުކުރާ މިކުޅުންތެރިޔާއަށް މިރޭ ކުޅޭ ވޯލްޑްކަޕް ފައިނަލުގައި ކްރޮއޭޝިޔާ ބަލިކޮށްގެން ތާރީހުން ޖާގަ ހޯދާނެ ފުރުސަތު މިވަނީ ލިބިފައެވެ.

އުމުރުން އެންމެ 19 އަހަރު ގައި ކުލަބް ފުޓްބޯޅައިގައި މިހާތަނަށް ދެވަނައަށް އެންމެ އަގުބޮޑު ކުޅުންތެރިއާގެ ގޮތުގައި ދާއިމީކޮށް ޕީއެސްޖީއާއި ގުޅެން ތައްޔާރުވާއިރު އެމްބާޕޭ ވަނީ ވޭތުވެދިޔަ ދެސީޒަނުގައި ތަފާތު ދެކުލަބަކާއެކު ފުރެންޗް ލީގް ކާމިޔާބުކޮށްފައެވެ. މިހާހިސާބުން މި އުމުރުގައި ފުޓްބޯޅައިގެ އެންމެ މަޝްހޫރު ތަރިންގެ ރެކޯޑްތައް ހުރީ ކިހިނެއްތޯ ބަލާލަމާ ހިނގާށެވެ.

ލިއޮނެލް މެސީ

މެސީގެ 19 ވަނަ އުފަންދުވަހު އޭނާ ނިކުތީ 2006 ގެ ވޯލްޑްކަޕްގައި މެކްސިކޯ އާއި ދެކޮޅަށެވެ. މި މުބާރާތާތުގައި އާޖެންޓީނާ ކުޅުނު ފަސް މެޗްގެ ތެރެއިން ތިން މެޗްގައި މެސީ ކުޅުނެވެ. މުބާރާތުގެ ކުއާޓާފައިނަލްގައި ޖަރުމަނު އަތުން ޕެނަލްޓީ ޖަހައިގެން  ބަލިވިއިރު މެސީއަށް އިންނަންޖެހުނީ ބެންޗްގައި ކުޅިބަލާށެވެ. މެސީ އޭނާގެ ފުރަތަމަ ވޯލްޑްކަޕަށް އައިއިރު ކްލަބު ފުޓްބޯޅައިގައި ސްޕެނިޝްލީގު ދެފަހަރަށް ކާމިޔާބުކޮށް އަދި ޗެމްޕިއަންސްލީގް އެއްފަހަރު ކާމިޔާބުކޮށްފައިވެއެވެ.

ކްރިސްޓިއާނޯ ރޮނާލްޑޯ

އުމުރުން 19 އަހަރުގައި ރޮނާލްޑޯ ކުޅުނު ފުރަތަމަ ބޮޑު މުބާރާތަކީ 2004 ގެ ޔޫރޯއެވެ. އެމުބާރާތުގައި ޕޯޗްގަލް ކުޅުނު 6 މެޗްގައި ރޮނާލްޑޯ ކުޅުނުއިރު އެތަނުން ހަތަރުމެޗްގައި ފުރަތަމަ އެގާރައިގައި ހިމެނުނެވެ. މުބާރާތުގެ ފައިނަލްގައި ގްރީސް އަތުން ބަލިވިއިރު   ވާދަވެރި މުބާރާތެއްގައި ރޮނާލްޑޯ ގައުމީ ޓީމަށް ފުރަތަމަ ލަނޑު ޖަހައިދިނީ މި މުބާރާތުގައެވެ. ރޮނާލްޑޯ މި މުބާރާތަށް އައި އިރު އޭނާވަނީ މެންޗެސްޓަރ ޔުނައިޓެޑުގައި އެއް ސީޒަން ފުރިހަމަކޮށްފައެވެ.

ނޭމާ ޖޫނިއަރ

އުމުރުން 19 އަހަރުގައި ނޭމާ ކުޅެމުން ދިޔައީ އަމިއްލަ ޤައުމުގައި ސަންތޯސް އަށެވެ. އޭރު އޭނާވަނީ އެޓީމާއެކު ކޮޕާ ޑޯ ބުރަސިލް އަދި ކޮޕާ ލިބެޓެޑޯރަސް 2011 ވަނައަހަރު ހޯދާފައެވެ. ނޭމާ ގައުމީ ޓީމުން ޖާގަ ހޯދީ އޭގެ އަހަރެއްހާ ދުވަސްކުރިން އުމުރުން 18 އަހަރުގައެވެ. އޭނާ ޤައުމީޓިމަށް ކުޅެދިން ފުރަތަމަ މެޗްގައި އެމެރިކާ އާއި ދެކޮޅަށް ކުޅެ ގޯލް ޖެހިއެވެ.

ޑިއޭގޯ މެރެޑޯނާ

އުމުރުން 19 އަހަރުގައި މެރެޑޯނާ ކުޅެމުން ދިޔައީ އާޖެންޓީނާގެ އާޖެންޓީނޯސް ޖޫނިއަރސް އަށެވެ. އެޓީމާއެކު މެރެޑޯނާގެ ޕްރޮފެޝަނަލް ކެރިއަރު ފެށީ އުމުރުން 16 އަހަރުވެސް ނުވަނީހެވެ. މެރެޑޯނާ އެންމެ ފުރަތަމަ ޤައުމީ ޓީމަށް ކުޅުނީ އުމުރުން 16 އަހަރުގައެވެ. ކޯޗު މެނޯޓީ ގެ ލޮލުގައި އަޅައިނުގަތުމުން 1978 ގައި ވޯލްޑްކަޕް ހޯދި އާޖެންޓީނާގެ ޓީމުގައި މެރެޑޯނާ ނުހިމެނެއެވެ. އެހެންނަމަވެސް ޖެހިގެން އައި އަހަރު 19 އަހަރުން ދަށުގެ ވޯލްޑްކަޕް ކާމިޔާބު ކޮށް އެންމެ މޮޅުކުޅުންތެރިޔާގެ މަގާމު މެރެޑޯނާ ހޯދިއެވެ.

ޕެލޭ

ޕެލޭގެ ޕްރޮފެޝަނަލް ކެރިއަރު ފެށީ އުމުރުން އެންމެ 15 އަހަރުގައެވެ. އަދި އުމުރުން 16 އަހަރުގައި ގައުމީ ޓީމުން ޖާގަ ހޯދިއެވެ. އަދި އެންމެ 17 އަހަރުގައި ވޯލްޑްކަޕް ތަށި އުފުލައިލިއެވެ. މި މުބާރާތުގައި ޕެލޭގެ 6 ގޯލް ފެނިގެން ދިޔައެވެ. ކުލަބު ފުޓްބޯޅައިގަވެސް އުމުރުން 19 އަހަރުގަވެސް ޕެލޭގެ ރެކޯޑްތައް އުޅެނީ ވަރަށް ކުރީގައެވެ. ޕެލޭއަށް 19 އަހަރު ފުރެންވާއިރަށް އޭނާވަނީ ސަންތޯސް އަށް 3 ތަށި ހޯދައިދީފައެވެ.