ޓީމުގެ ރޫހް ވަރުގަދަ، މިތިބީ ތައްޔާރަށް: ސަތޯ

އިންޓަރ ރިސޯޓް  19 ވަނަ ވޮލީ މުބާރާތުގެ ކުއާޓަރ ފައިނަލްގައި މާދަމާ ކުޅޭ މެޗަށް ނުކުންނައިރު ޓީމު އޮތީ ފުރިހަމައަށް ތައްޔާރުވެފައިކަމަށާއި، ޓީމުގެ ކުޅުންތެރިންނާ ދޭތެރޭ ފުރިހަމަ އިތުބާރު އެބައޮތްކަމަށް މިދިޔަ އަހަރުގެ ރަނައަޕް ސޮނެވާފުށި ޓީމުގެ ކޯޗު އިބްރާހިމް ރަޝީދު (ސަތޯ) ބުނެފިއެވެ.

ސޮނެވާފުށިގައި ހުރެ “ފަހުމިނެޓް” އާ ފޯނުން ވާހަކަދައްކަމުން މިދިޔަ އަހަރުވެސް އެ ޓީމަށް ކޯޗު ކޮށްދިން ސަތޯ ބުނީ މިދިޔަ އަހަރާއި ތަފާތުކޮށް މިއަހަރު މަދު ދުވަސްކޮޅެއް ޓީމާއެކު ހޭދަކޮށްފައި ވީނަމަވެސް ކުޅުންތެރިން ދައްކަމުންއަންނަ ކުޅުމާ ދޭތެރޭ ވަރަށް ހިތްހަމަޖެހޭ ކަމަށެވެ.

“އަސްލު މިދިޔަ އަހަރު އަޅުގަނޑު އަށް މަސްދުވަހު ޓީމާއެކު ހޭދަކުރިން. އެކަމަކު މިފަހަރު އަދި އަޅުގަނޑު ސޮނެވާއަށް އައިތާ ވާނީ ދެ ހަފްތާ. އެކަމަކު މިދިޔަ އަހަރު އަޅުގަނޑު މިތާ ހުރެގެން ކުރި މަސައްކަތުގެ ނަތީޖާ މިހާރު އެބަ ފެނޭ. އެހެންވީމަ މާ ބޮޑު ދައްޗެއް އަޅުގަނޑަކަށް ކުރިމައްޗެއް ނުވޭ.” ސަތޯ ބުންޏެވެ.

އިންޓަރ ރިސޯޓް ވޮލީ މުބާރާތުގެ މިދިޔަ އަހަރުގެ ފައިނަލްގައި ސޮނެވާފުށި ބަލިވީ އަނަންތަރާ ރިސޯޓާއި ވާދަކޮށެވެ. އެ މުބާރާތުގައި ބައިވެރިވި ސޮނެވާފުށި ޓީމުގައި ގައުމީ ވޮލީ ޓީމުގެ ބައެއް ކުޅުންތެރިން ހިމެނުނު ނަމަވެސް މިފަހަރު ތިބީ މުޅިންވެސް ސޮނެވާފުށި ގައި ވަޒީފާ އަދާކުރާ މުވައްޒަފުންނެވެ. އެކަންވެސް ސަތޯ ނެގީ ޕޮޒިޓިވް ކަމެއްގެ ގޮތުގައެވެ.

” ރަގަޅު ވާހަކައެއް މިފަހަރު އަޅުގަނޑުމެންގެ ޓީމުގައި ނެތް ގައުމީ ޓީމުގެ އެއްވެސް ކުޅުންތެރިއެއް. އެކަމަކު އެހެންވިޔަސް ކުރީ އަހަރާ އަޅާ ބަލާއިރު މިފަހަރުގެ ޓީމު ފެންނަނީ މާ ވަރުގަދަކޮށް. ޓީމުގެ ރޫހު ކުރީ ފަހަރަށްވުރެ މިފަހަރު މާ ރަގަޅު.” ސަތޯ ބުންޏެވެ.

އެހެންވީއިރު ކުރިން ނެތް ރޫހެއް މިފަހަރު ޓީމުން ފެނުމުގެ ސަބަބަކީ ކޮބައި ހެއްޔެވެ. އެ ސުވާލަށްވެސް ސަތޯ ދިނީ ވަރަށް ސީދާ ޖަވާބެކެވެ.

” އަސްލު މިދިޔަ އަހަރު ޓީމުގައި ނެޝަނަލް ޓީމް ޕްލޭޔަރުންނާ އަދިވެސް ރިސޯޓުން ބޭރު ކުޅުންތެރިން ހިމެނުމުން ޓީމުގެ ސްކޮޑް މިދިޔަ އަހަރު ވަރަށް ބޮޑު. އޭގެ ސަބަބުން އަޅުގަނޑަށްވެސް ފުލް ޓީމް ނެގުމުގައި އުނދަގޫތަކެއް ދިމާވި. އަދި ޓީމުގެ ކުޅުންތެރިންގެ ތެރޭގައިވެސް ކޮންމެވެސް ވަރެއްގެ ހިތްހަމަ ނުޖެހުންތަކެއް އުޅުނު. އެކަމަކު މިފަހަރު މިތިބީ ހުސް ސޮނެވާގެ ކުދިން. މިފަހަރު އެކަހަލަ އެއްވެސް މައްސަލައެއް ނެތް.” ވޮލީ ކޯޗެއްގެ ގޮތުގައި ގިނަ ކާމިޔާބީތަކެއް ހޯދާފައިވާ ތަޖުރިބާކާރު ކޯޗު ބުންޏެވެ.

މިދިޔަ އަހަރުގެ ފައިނަލްގައި ސޮނެވާފުށި ބަލިކޮށް ޗެމްޕިއަންކަން ހޯދި އަނަންތަރާ މިފަހަރުގެ މުބާރާތުގައި ބައިވެރިއެއް ނުވެއެވެ. އެކަމަކު  ސަތޯ ގަބޫލުކުރާ ގޮތުގައި  މިދިޔަ އަހަރުގެ ޗެމްޕިއަން ޓީމު ބައިވެރި ނުވުމަކީ އެމީހުންނަށް އޮތް އެޑްވާންޓޭޖެއް ނޫނެވެ. މުބާރާތުގެ ކުއާޓަރ ފައިނަލް ގައި ކުޅޭ ޓީމްތަކުގެ ތެރޭގައި ސޮނެވާއަށް ޗެލެންޖަކަށް ވާނެ ޓީމްތައް އެބަ ހުއްޓެވެ. އޭގެ ތެރެއިންވެސް އެއް ޓީމެއް ސަތޯ ފާހަގަކުރިއެވެ.

“އަޅުގަނޑަށް ބަނޑޮސް ފެންނަނީ ވަރަށް ވަރުގަދަކޮށް. އެޓީމުގަ އެބަ ތިބި ނެޝަނަލް ޓީމުގެ ވަރަށް ގިނަ ކުޅުންތެރިން. ގާތްގަނޑަކަށް ނެޝަނަލް ޓީމް ދެން އެއޮތީ ބަނޑޮހުގަ. އެކަމަކު ކުޅޭ ދުވަހެއްގަ މޮޅުވާނީ އެ ދުވަހެއްގެ އެންމެ ރަނގަޅަށް ޕާފޯމް ކުރާ ބައެއް. އެހެންވީމަ ހާސްކަމެއް ނެތް އަޅުގަނޑުމެންގެ” ސަތޯ ބުންޏެވެ.

މާދަމާ ހަވީރު ކުޅޭ ކުއާޓަރ ފައިނަލް މެޗުގައި ސޮނެވާފުށްޓާ ދެކޮޅަށް ނުކުންނާނީ ޝެރެޓަން މޯލްޑިވްސް ފުލްމޫން ރިސޯޓް އެންޑް ސްޕާ އެވެ. މި މުބާރާތުގެ ކްއާޓަރ ފައިނަލްގެ މެޗްތައް މިއަދު ހަވީރު ފަށާނެއެވެ. ފުރަތަމަ މެޗްގައި ބައްދަލުކުރާނީ ޖުމެއިރާ ވަޓިވެލި އާއި ބަނޑޮސް މޯލްޑިވްސް އެވެ. ދެވަނަ މެޗްގައި ބައްދަލުކުރާނީ ޑަބްލިއު މޯލްޑިވްސް އާއި ވަން އެންޑް އޮންލީ ރީތި ރަށެވެ.