މާޒިޔާ ބަލިކޮށް ނިއު އެއްވަނައަށް

ދިރާގު ދިވެހި ޕްރިމިއާ ލީގުގައި 0-1 އިން މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް ނިއުރޭޑިއަންޓް ސްޕޯޓްސް ކްލަބް ޕޮއިންޓް ތާވަލުގެ އެއްވަނަ އަށް ޖެހިލައިފިއެވެ.

ދެޓީމުގެ ފަރާތުންވެސް ފޯރިގަދަ ބަލާހިތްވާކަހަލަ ކުޅުމެއް ފެނިގެންދިޔަ މިމެޗުގެ ހަމައެކަނި ލަނޑު ކާމިޔާބުކޮށްދިނީ ޑިފެންޑަރު އަހުމަދު އަބްދުﷲ (ލިލީ) އެވެ. މެޗުގެ 25 ވަނަ މިނެޓުގައި ލިލީ މިލަނޑު ކާމިޔާބުކުރީ މުޅިން އަލަށް އެޓީމާ ގުޅުނު ތުރުކުމެނިސްތާންގެ ކުޅުންތެރިޔާ އާމިރް ގުރުބާނީ ނަގައިދިން ހިތްގައިމު ހުރަސް ބޮލުން ގޯލުގެތެރެއަށް ފޮނުވާލައިގެންނެވެ.

ނިއުރޭޑިއަންޓުން ލީޑު ނެގުމުގެ ކުރިން މާޒިޔާގެ ކެޕްޓަން އަސަދުﷲ އަބްދުﷲ އަށް ލަނޑުޖަހާނެ ރަނގަޅު ފުރުޞަތެއް ލިބި ބޭކާރުވިއެވެ.

މެޗުގެ ދެވަނަ ހާފްގައި ނިއުގެ ފަރާތުންވަނީ ގިނަ ހަމަލާތަކެއް މާޒިޔާގެ ގޯލަށް ފޮނުވާލާފައެވެ. ހާއްޞަކޮށް އެޓީމުގެ ބިދޭސީ ފޯވާޑު ކިޕްސަން އަދި އަލީ ފާސިރު (ސެންޓޭ) ފޮނުވާލި ހަމަލާތައް ހިމެނެއެވެ.

މާޒިޔާއަށް ވެސް ދެވަނަ ހާފުގައި ނަތީޖާ ހަމަހަމަ ކުރުމަށް ރަނގަޅު ދެތިން ފުރުޞަތެއް ލިބުނެވެ. އެގޮތުން އެޓީމުގެ ބިދޭސީ ކުޅުންތެރިޔާ ސްޓެވާޓް އަށް ވަނީ ރަނގަޅު ތިން ފުރުޞަތެއް ލިބި ބޭކާރުވެފައެވެ.

މި މޮޅާއެކު ނިއުއަށް ހަތް ޕޮއިންޓާއެކު ތާވަލުގެ އެއްވަނަ ގޯލުގެ ތަފާތުން ލިބޭއިރު، ހަމަ މިއަދަދަށް ޕޮއިންޓް ހޯދައިގެން ތާވަލުގެ ދެވަނައިގައި އޮތީ ގްރީން ސްޓްރީޓްއެވެ.

ތިންވަނައިގައި ހަ ޕޮއިންޓާއެކު ޓީސީ އޮތްއިރު، ހަތަރުވަނައިގައި ޓީސީއާ އެއް އަދަކަށް ޕޮއިންޓް ހޯދައިގެން ލަނޑުގެ ތަފާތުން އޮތީ މާޒިޔާއެވެ.

ލީގުގައި މާދަމާ ހަވީރު އީގަލްސް އާއި ޓީސީ ބައްދަލުކުރާއިރު، މާދަމާ ރޭ ބައްދަލުކުރާނީ ފ.ނިލަންދޫ އާއި ވިކްޓަރީއެވެ.