އޭދަފުށި ފުޓްސަލް ކަޕް އީދުގައި، ބައިވެރިވާން ހުޅުވާލައިފި

އޭދަފުއްޓަށް ހުޅުވާލައިގެން އެރަށު ކައުންސިލުން އިންތިޒާމުކުރާ ފުޓްސަލް މުބާރާތް އަންނަ ކުޑަ އީދާ ދިމާކޮށް ބާއްވަން ނިންމައި، ބައިވެރިވާން ފުރުސަތު ހުޅުވާލައިފި އެވެ.

އޭދަފުށީ ޓާފް ފުޓްސަލް ދަނޑުގައި ފުރަތަމަ މުބާރާތް ކައުންސިލުން ބޭއްވީ މިދިޔަ އަހަރު އެވެ. މަޝްހޫރު ފުޓްސަލް ތަރިންނާއި އެކު ކުޅުނު އެ މުބާރާތް ދިޔައީ ވަރަށް ފޯރިގަދަކޮށެވެ.

މިއަހަރުގެ މުބާރާތް ބާއްވަން ކައުންސިލުން ނިންމާފައިވަނީ އޭޕްރީލް 08 އިން އޭޕްރީލް 13 އަށެވެ. އެކަމަކު ޓީމުތައް ބައިވެރިވާ އަދަދަށް ބަލައި މުބާރާތުގެ ތާރީހަށް ބަދަލު އައުމުގެ ފުރުސަތު އެބައޮތެވެ.

މުބާރާތުގައި ބައިވެރިވާން ބޭނުންވާ ޓީމުތަކުން މުބާރާތުގައި ބައިވެރިވާން އެދޭ ފޯމު ފުރިހަމަކުރުމަށް ފަހު މާރިޗް 05 ވަނަ ދުވަހުގެ ކުރިން ކައުންސިލަށް ހުށަހަޅަންޖެހެ އެވެ. އަދި، އީމެއިލް މެދުވެރިކޮށް ވެސް މުބާރާތުގައި ބައިވެރިވުމުގެ ފުރުސަތު ލިބޭނެ އެވެ.

މުބާރާތުގައި ބައިވެރިވާން ހުޅުވާލިއިރު ގަވައިދު ވެސް ވަނީ އާއްމުކޮށްފަ އެވެ. ޓީމު ބައިވެރިކުރުމަށް ފަހު ކުޅުންތެރިން ރަޖިސްޓްރީ ކުރުމުގެ ފަހު ދުވަހަކީ 28 މާރިޗެވެ.

މުބާރާތާ ގުޅޭ އިތުރު މައުލޫމާތު ހޯދުމަށް 7740374 އަދި 9999038 ނަންބަރަށް ގުޅުމަށް ކައުންސިލުން އެދެ އެވެ. އީމެއިލް މެދުވެރިކޮށް މުބާރާތުގައި ބައިވެރިވާނީ info@eydhafushi.gov.mv މެދުވެރިކޮށެވެ.

މުބާރާތުގައި ބައިވެރިވެވޭނީ އޭދަފުށީގެ ޓީމުތަކަށެވެ. ކޮންމެ ޓީމެއްގައި ވެސް ރަށުން ބޭރުން އެއް ކުޅުންތެރިއަކު ހިމެނޭނެ އެވެ.

މިދިޔަ އަހަރުގެ މުބާރާތުގައި މަޝްހޫރު ފުޓްސަލް ކުޅުންތެރިން ވަނީ އޭދަފުށީގެ ޓީމުތަކަށް ކުޅެފަ އެވެ. އެގޮތުން، އެންމެ ފާހަގަކޮށްލެވުނު ކުޅުންތެރިއަކީ ރާއްޖޭގައި އުފެދުނު އެންމެ މޮޅު ފުޓްސަލް ކުޅުންތެރިންގެ ތެރޭގައި ހިމެނޭ ހުސައިން ޝަރީފް (އޮންލީ) އެވެ.

އޮންލީގެ އިތުރުން، މިހާރު ކުރިއަށްދާ ގޯލްޑަން ފުޓްސަލް ޗެލެންޖްގައި ނ. ކެނދިކުޅުދޫ ޓީމުގައި މޮޅު ކުޅުމެއް ދައްކަމުން އަންނަ މުހައްމަދު އައްޒާމް އާއި ގާފަރު ފުޓްސަލް ޓީމުގެ ތަރި ސާމިން މުހައްމަދު ނަސީރުގެ އިތުރުން ވާދޫ ފުޓްސަލް ޓީމުގެ މުހައްމަދު އިޔާދު އަލީ ހިމެނެ އެވެ.

މުބާރާތުގެ ޗެމްޕިއަން ޓީމަށް 30000 ރުފިޔާ ކަނޑައަޅާފައިވާއިރު ރަނަރަޕް ޓީމަށް 15000 ރުފިޔާ ދޭގޮތަށް ވަނީ ހަމަޖެހިފަ އެވެ.

މިދިޔަ އަހަރު އޭދަފުށި ފުޓްސަލް މުބާރާތުގެ ޗެމްޕިއަންކަން ހޯދީ އެފްރޯ ސްޕޯޓްސް ކްލަބެވެ. އެޓީމު ޗެމްޕިއަންކަން ހޯދީ ފައިނަލުގައި އެރަށުގެ އޯލް ވުލްވްސް 0-4 އިން ބަލިކޮށްގެންނެވެ.