ވާދޫ، ތިމަރަފުށި އަދި ކަނޑުހުޅުދޫ އަތޮޅު ޗެމްޕިއަންކަން ހޯދައިފި

ގޯލްޑަން ފުޓްސަލް ޗެލެންޖް 2024 ގައި ރޭ ކުޅުނު ފައިނަލް މެޗުތަކުން މޮޅުވެ ތ. ތިމަރަފުއްޓާއި ގދ. ވާދޫ އަދި ގއ. ކަނޑުހުޅުދޫ އަތޮޅު ޗެމްޕިއަންކަން ހޯދައިފި އެވެ.

މުބާރާތުގެ ޗެމްޕިއަންކަން ތިން ފަހަރު ހޯދާފައިވާ ތިމަރަފުއްޓަކީ ގޯލްޑަން ފުޓްސަލްގެ އެންމެ ކާމިޔާބު ރަށެވެ. އެރަށުން އަތޮޅު ޗެމްޕިއަންކަން ހޯދީ ރޭ ކުޅުނު އަތޮޅު ފައިނަލުގައި އޮމަދޫއާ ވާދަކޮށް 1-5 އިން މޮޅުވެގެންނެވެ.

މިދިޔަ އަހަރުގެ އަތޮޅު ފައިނަލުގައި ތިމަރަފުށި ވަނީ ކިނބިދޫ އަތުން ބަލިވެފަ އެވެ. އެކަމަކު މިއަހަރު ތިމަރަފުށިން ވަނީ ސެމީ ފައިނަލުގައި ކިނބިދޫ ބަލިކޮށްފަ އެވެ.

އެ އަތޮޅުގެ އެންމެ ގިނަ ގޯލު ޖެހި ކުޅުންތެރިޔާގެ މަގާމާއި އެންމެ މޮޅު ކުޅުންތެރިޔާގެ މަގާމް ވެސް ހޯދީ އިބްރާހީމް ހަމްދާން އެވެ.

މިދިޔަ އަހަރު ގޯލްޑަން ފުޓްސަލް ފައިނަލުގައި ކުޅެ ބަލިވި ވާދޫ ގދ. އަތޮޅު ޗެމްޕިއަންކަން ހޯދީ ފައިނަލުގައި ތިނަދޫ 1-4 އިން ބަލިކޮށްގެންނެވެ.

ގދ. އަތޮޅުގެ އެންމެ ގިނަ ގޯލު ޖެހި ކުޅުންތެރިޔަކީ މުހައްމަދު އިޔާދު އަލީ އެވެ. އެންމެ މޮޅު ކުޅުންތެރިއަކީ ފުޓްސަލްގެ ހުނަރުވެރި ކުޅުންތެރިޔާ އަޔާޒް އަހުމަދު (އަޔާ) އެވެ.

ވާދަވެރި ކުޅުމެއް ފެނުނު ގއ އަތޮޅު ފައިނަލުގައި ގެމަނަފުއްޓާ ވާދަކޮށް ކަނޑުހުޅުދޫ މޮޅުވީ 4-5 އިންނެވެ.

ގއ. އަތޮޅުގެ އެންމެ މޮޅު ކުޅުންތެރިޔާގެ މަގާމާއި އެންމެ ގިނަ ގޯލު ޖެހި ކުޅުންތެރިޔަކީ ކަނޑުހުޅުދޫ ޓީމުގެ އަހުނަފް ޒާހިރު އެވެ.

މުބާރާތުގައި ރޭ ޅ. އަތޮޅުގެ ދެ މެޗު ކުޅުނެވެ. ނައިފަރާއި ކުރެންދޫ ވާދަކުރި މެޗު 0-0 އިން އެއްވަރުވިއިރު އަނެއް މެޗުގައި ހިންނަވަރު ވަނީ އޮޅުވެލިފުށި 3-2 އިން ބަލިކޮށްފަ އެވެ.

ޅ. އަތޮޅު ގްރޫޕުގެ މެޗުތައް ނިމުނުއިރު ފައިނަލުގެ ޖާގަ ހޯދީ ހިންނަވަރާއި ކުރެންދޫ އެވެ.

މުބާރާތުގައި މިރޭ ލ. އަތޮޅު ފައިނަލް މެޗު ކުޅޭނެ އެވެ. އެ މެޗުގައި ވާދަކުރާނީ ގޯލްޑަން ފުޓްސަލްގެ އެންމެ ފަހުގެ ޗެމްޕިއަން ލ. ގަމާއި އިސްދޫ އެވެ.

މިރޭ ދެން ކުޅޭނީ ކ އަތޮޅުގެ ސެމީ ފައިނަލް މެޗުތަކާއި މ އަތޮޅުގެ ސެމީ ފައިނަލް މެޗުތަކެވެ.