ކުއާޓާ ފައިނަލުގައި ނިއު ނުކުންނާނީ ކްލަބް ޕީކޭއާ ދެކޮޅަށް

މިހާރު ކުރިއަށްދާ ދެ ވަނަ ޑިވިޝަން ފުޓްބޯޅަ މުބާރާތުގެ ކުއާޓާ ފައިނަލަށް ޓީމުތައް ހޮވިއްޖެ އެވެ.

ކުއާޓާ ފައިނަލުގެ 8 ޖާގަ ކަށަވަރުކުރީ، ނިއު ރޭޑިއަން ސްޕޯޓްސް ކްލަބް، ވިކްޓްރީ ސްޕޯޓްސް ކްލަބް، ކްލަބް ޕީކޭ، ކުޑަހެންވޭރު ސްޕޯޓްސް ކްލަބް، ބީޖީ ސްޕޯޓްސް ކްލަބް، ޓެންޓް ސްޕޯޓްސް ކްލަބް، މަސް އޮޑި ސްޕޯޓްސް ކްލަބް އަދި ލެގޫންސް ސްޕޯޓްސް ކްލަބެވެ.

ކުއާޓާ ފައިނަލުގެ ފަހު ޖާގަ ލެގޫންސް ހޯދީ އިއްޔެ ހަވީރު ގަލޮޅު ދަނޑުގައި ކުޅުނު މެޗުގައި ލޮރެންޒޯ 5-1 އިން ބަލިކޮށްގެންނެވެ.

އަންނަ ސީޒަނުގެ ފުރަތަމަ ޑިވިޝަނުން ފުރުސަތު ލިބޭނީ ދެ ވަނަ ޑިވިޝަނުގެ ފައިނަލުން ޖާގަ ހޯދާ ދެ ޓީމަށެވެ. ފުރަތަމަ ޑިވިޝަނަށް އެރުމަށް މަސައްކަތް ކުރަމުން އަންނަ ނިއު ރޭޑިއަންޓް ސްޕޯޓްސް ކްލަބް ކުއާޓާ ފައިނަލުގައި ނުކުންނީ ކްލަބް ޕީކޭއާ ދެކޮޅަށެވެ.

ނިއު ވަނީ ގްރޫޕް ސްޓޭޖުގައި ކުޅުނު ހުރިހާ މެޗަކުން މޮޅުވެފަ އެވެ. ގްރޫޕުގެ އެއް ވަނައިގެ ގޮތުގައި ކުއާޓާ ފައިނަލުން ފުރުސަތު ހޯދިއިރު ކްލަބް ޕީކޭ އަށް ކުއާޓާފެ ފުރުސަތު ލިބުނީ ގްރޫޕް ސީގެ ތިން ވަނަ ޓީމުގެ ގޮތުގަ އެވެ. އެ ގްރޫޕުގެ އެއް ވަނަ ހޯދީ ހުރިހާ މެޗަކުން މޮޅުވި ވިކްޓްރީ އެވެ. ދެ ވަނަ ލިބުނީ ލެގޫންސް އަށެވެ.

ކުއާޓާގައި ވިކްޓްރީ ނުކުންނާނީ ކުޑަހެންވޭރު ޔުނައިޓެޑާ ދެކޮޅަށެވެ. ނިއު އާއި ވިކްޓްރީ ކުއާޓާ ފައިނަލް މެޗުތަކުން މޮޅުވެއްޖެ ނަމަ އެ ދެޓީމު ސެމީގައި ވާދަކުރަން ޖެހޭނެ އެވެ. މުބާރާތް ރޭވިފައި އޮތްގޮތުން ނިއު އާއި ވިކްޓްރީގެ ތެރެއިން އަންނަ ސީޒަނުގެ ފުރަތަމަ ޑިވިޝަނުން ފުރުސަތު ލިބޭނީ ކޮންމެވެސް އެއް ޓީމަކަށެވެ.

ކުއާޓާ ފައިނަލް މެޗުތައް ފަށާނީ އަންނަ ހޯމަ ދުވަހު އެވެ. ހުރިހާ މެޗެއް ވެސް ފަށާނީ ހަވީރު 3:50 ގަ އެވެ.

ސެމީ ފައިނަލް މެޗުތައް ކުޅޭނީ މި މަހުގެ 11 އަދި 12 ވަނަ ދުވަހު ކުޅޭއިރު ފައިނަލް މެޗު ކުޅުމަށް ހަމަޖެހިފައިވަނީ މި މަހުގެ 16 ވަނަ ދުވަހު އެވެ.

ކުއާޓާ ފައިނަލް މެޗުތައް:

މަސް އޮޑި ސްޕޯޓްސް ކްލަބް – ބީޖީ ސްޕޯޓްސް ކްލަބް (ހޯމަ)

ނިއު ރޭޑިއަންޓް ސްޕޯޓްސް ކްލަބް – ކްލަބް ޕީކޭ (އަންގާރަ)

ވިކްޓްރީ ސްޕޯޓްސް ކްލަބް – ކުޑަހެންވޭރު ޔުނައިޓެޑް (ބުދަ)

ލެގޫންސް ސްޕޯޓްސް ކްލަބް – ޓެންޓް ސްޕޯޓްސް ކްލަބް (ބުރާސްފަތި)