ގޯލްޑަން ފުޓްސަލް: ގއ. އަތޮޅުގެ ސެމީ ޖާގަތައް ކަށަވަރުވެއްޖެ

މިހާރު ކުރިއަށްދާ ގޯލްޑަން ފުޓްސަލް ޗެލެންޖް 2024 ގައި ގއ. އަތޮޅުގެ ސެމީ ފައިނަލުގެ ޖާގަތައް ރޭ ކަށަވަރުވެއްޖެ އެވެ.

މިއަހަރު ގއ. ގެ ސެމީ ފައިނަލުން ފުރުސަތު ހޯދީ ނިލަންދޫ އާއި ކަނޑުހުޅުދޫ އަދި ދެއްވަދޫގެ އިތުރުން ގެމަނަފުއްޓެވެ.

ރޭ ގެމެނަފުށިން ވަނީ މާމެންދޫ 4-0 އިން ބަލިކޮށްފަ އެވެ. މާމެންދޫ އަކީ މިދިޔަ އަހަރު އަތޮޅު ޗެމްޕިއަންކަން ހޯދި ރަށެވެ. ނިލަންދޫ ސެމީ ފައިނަލް ކަށަވަރުކުރީ ކޮނޑޭ 1-2 އިން ބަލިކޮށްގެންނެވެ.

ދެއްވަދޫ އޮތީ ރޭގެ ވިލިގިއްޔާ ދެކޮޅަށް ނުކުތްއިރު ވެސް ސެމީ ޔަގީންކޮށްފަ އެވެ. ދެއްވަދޫ އިން ރޭ ވިލިނގިލި ބަލިކުރީ 0-3 އިންނެވެ. ކަނޑުހުޅުދޫ ސެމީގެ ޖާގަ ކަށަވަރުކުރީ 3-6 އިން ކޮލަމާފުށި ބަލިކޮށްގެންނެވެ.

އިއްޔެ ކުޅުނު އެހެން މެޗުތަކަށް ބަލާއިރު ކ. އަތޮޅު ބުރުގެ މެޗުތަކުން ގާފަރާއި ދިއްފުށި ވަނީ މޮޅުވެފަ އެވެ. ކާށިދޫއާ ވާދަކޮށް ގާފަރު ފަހަތުން އަރައި މޮޅުވީ 1-2 އިންނެވެ. ދިއްފުށި ވަނީ ފަސޭހަކަމާ އެކު ގުޅި 9-3 އިން ގުޅި ބަލިކޮށްފަ އެވެ.

މ. އަތޮޅު ބުރުގައި ރޭ ކޮޅުފުއްޓާއި މުލި ބައްދަލުކުރި މެޗު ނިމުނީ 2-2 އިން އެއްވަރުވެގެންނެވެ. އަނެއް މެޗުގައި ދިއްގަރާ ވާދަކޮށް ނާލަފުށި ވަނީ 2-1 އިން މޮޅުވެފަ އެވެ.

އެ އަތޮޅު ވޭވަށުން ރޭ ވަނީ ރަތްމަންދޫ 2-5 އިން ބަލިކޮށްފަ އެވެ. މަޑުއްވަރީއާ ވާދަކޮށް މުލައް ވަނީ 2-1 އިން މޮޅުވެފަ އެވެ.

މުބާރާތުގައި މިއަދު ވެސް ގިނަ މެޗުތަކެއް ކުޅޭނެ އެވެ. މިއަދު ހަވީރު ފ އަތޮޅާއި ދ އަތޮޅުގެ މެޗުތައް ކުޅޭއިރު މިރޭ ކުޅޭނީ ތ އަދި ލ އަތޮޅުގެ މެޗުތަކެވެ. އެންމެ ފަހުގެ ދެ ޗެމްޕިއަނުން ކަމަށްވާ ތިމަރަފުށި އަދި ގަން މިރޭ ކުޅޭ މެޗު ފާހަގަކޮށްލެވެ އެވެ.