އުދުއްސައިގަންނާނެ ދިމާލެއް އަދި ނުނިންމަން: އެމްބާޕޭ

ފްރާންސްގެ ކްލަބް ޕީއެސްޖީއާ އެކު ހަދާފައިވާ އެއްބަސްވުން އަންނަ ޖޫން މަހު ހަމަވުމުން، ބަދަލުވާނެ ކްލަބެއް އަދި ނުނިންމާ ކަމަށް ކިލިއަން އެމްބާޕޭ ބުނެފި އެވެ.

ފްރާންސްގެ ގައުމީ ފުޓްބޯޅަ ޓީމުގެ ކެޕްޓަން އެމްބާޕޭ، 25، ޕީއެސްޖީގެ އެއްބަސްވުން ހަމަވުމުން، އޭނާ ބޭނުންނަމަ އިތުރު އަހަރަކު އެ ކްލަބުގައި މަޑުކުރެވޭނެ އެވެ. އެމްބާޕޭ ވަނީ އެކަން ޕީއެސްޖީ އަށް ވެސް އަންގައިފަ އެވެ.

“ފުރަތަމަ ކަމަކަށް އަހަރެން މިހުރީ މި ސީޒަން ރަނގަޅަށް ގެންދަން ވަރަށް ބޮޑަށް ބޭނުންވެފަ. އެއީ ވަރަށް މުހިއްމު ކަމެއް” ބުދަ ދުވަހުގެ ރޭ ފްރެންޗް ޗެމްޕިއަންސް ޓްރޮފީ ހޯދި މެޗަށް ފަހު އެމްބާޕޭ ބުންޏެވެ.

ޓުލޫސްއާ ދެކޮޅަށް ކުޅުނު ފައިނަލް ޕީއެސްޖީ ކާމިޔާބުކުރީ 0-2 އިންނެވެ. މެޗުގައި ޕީއެސްޖީގެ ދެ ވަނަ ގޯލު ޖެހީ އެމްބާޕޭ އެވެ.

އެމްބާޕޭ ބުނީ މި ސީޒަނުގައި ޕީއެސްޖީއާ އެކު ހޯދި ފުރަތަމަ ތައްޓަށް ފަހު އެ ޓީމުން ކާމިޔާބުކުރަން ބޭނުންވާ އިތުރު ތަށިތައް އެބަހުރި ކަމަށެވެ. ކާމިޔާބު ސީޒަނަކަށް މަސައްކަތް ކުރާއިރު އަންނަ ސީޒަނުގައި ކުޅޭނެ ކްލަބަކާ މެދު ނުވިސްނާ ކަމަށް އެމްބާޕޭ ބުންޏެވެ.

ފްރާންސްގެ މޮނާކޯ އިން 2017 ވަނަ އަހަރު އެމްބާޕޭ އެންމެ ފުރަތަމަ ޕީއެސްޖީ އަށް ބަދަލުވީ ލޯނު އުސޫލުންނެވެ. އޭގެފަހުން ޕީއެސްޖީ އިން އެމްބާޕޭގެ އެއްބަސްވުން ދާއިމީ ކުރީ 166 މިލިއަން ޑޮލަރަށެވެ.

އެމްޕާބޭ 22-2021 ވަނަ ސީޒަނަށް ފަހު ހިލޭ ޓްރާންސްފާއެއްގައި ކްލަބް ބަދަލުކުރާ އޮތީ ހަމަޖެހިފަ އެވެ. އެކަމަކު އެ ސީޒަނުގެ ފަހުކޮޅު ޕީއެސްޖީގައި އިތުރު ދެ އަހަރު މަޑުކުރަން އެމްބާޕޭ އެއްބަސްވި އެވެ. މި ސީޒަން ފެށުމުގެ ކުރިން އެމްބާޕޭ ޕީއެސްޖީ ދޫކޮށްލާނެ ކަމަށް ބެލެވުނީ، އާ ސީޒަނަށް ތައްޔާރުވި ޕްރީ ސީޒަން ޓުއާގައި އެމްބާޕޭ ބައިވެރި ނުކުރުމުންނެވެ.

އޭރު ސައުދީ އަރަބިއާގެ ކްލަބް އަލް-ހިލާލް އިން އެމްބާޕޭ ހޯދުމަށް 328 މިލިއަން ޑޮލަރުގެ ބޮޑު އަގެއް ހުށަހެޅި އެވެ. އެކަމަކު ސައުދީގެ ބޮޑު ހުށަހެޅުމަށް ނޫނެކޭ ބުނެ ޕީއެސްޖީ އިން އެމްބާޕޭއާ އެކު ކުރި މަޝްވަރާތަކަށް ފަހު ޕީއެސްޖީ އިން އޭނާ އަށް ފުރުސަތު ދިނެވެ.

“ކްލަބަށް އުނދަގޫ ނުވާނޭހެން މި ދަނޑިވަޅުގައި މަސައްކަތް ކުރަންޖެހޭ. އަހަރެން ކްލަބް ބަދަލުކުރުމަކީ މިވަގުތަށް އެންމެ މުހިއްމު ކަމެއް ނޫން” އެމްބާޕޭ ބުންޏެވެ.

މިހާރު އެއްބަސްވުން އޮތް ގޮތުން މި ޖެނުއަރީ މަހު އެމްބާޕޭ އެހެން ކްލަބަކަށް ވިއްކާލަން ޕީއެސްޖީ އަށް މަޖުބޫރުވާނެ އެވެ. މި ޓްރާންސްފާގައި އެމްބާޕޭ ވިއްކާލަން އެއްބަސް ނުވެއްޖެ ނަމަ އަންނަ ޖުލައި މަހުގެ 1 ވަނަ ދުވަހުން ފެށިގެން އެމްބާޕޭ ބޭނުން ކްލަބަކަށް ހިލޭ ބަދަލުވުމުގެ ފުރުސަތު ލިބޭނެ އެވެ. އޭރުން އަގުބޮޑުކޮށް ގެނައި ކުޅުންތެރިޔާ ޕީއެސްޖީ އަށް ގެއްލޭނީ އެއްވެސް އަގެއް ނުލިބި އެވެ.

އެމްބާޕޭ ގެންދަން އެންމެ ޝައުގުވެރިވަނީ ރެއާލް މެޑްރިޑެވެ. ރިޕޯޓްތައް ބުނާގޮތުން މި ޖެނުއަރީ ޓްރާންސްފާގާއި އެމްބާޕޭ ނިންމާ ގޮތެއް އެނގެން ރެއާލުން ބޭނުންވެ އެވެ. އެމްބާޕޭ ގޮތެއް ނުނިންމައިފި ނަމަ މެންޗެސްޓާ ސިޓީ އަށް ކުޅޭ އާލިން ބްރައުޓް ހާލަންޑަށް ބޮޑު އަގެއް ހުށަހަޅަށް ރެއާލް އޮތީ ތައްޔާރަށެވެ.

އެމްބާޕޭ ގެންދަން ޝައުގުވެރިވާ އެހެން ކްލަބްތަކުގެ ތެރޭގައި އިނގިރޭސި ކްލަބް ލިވަޕޫލާއި ޖަރުމަނުގެ ބަޔާން މިއުނިކް އެވެ. ބާސެލޯނާ އިން އެމްބާޕޭ ބޭނުންވި ނަމަވެސް އެ ޓީމުގެ ކޯޗު ޒަވީ ބުނީ އެމްބާޕޭ ގެންނާނެ މާލީ ބާރުވެރިކަން އެ ކްލަބުގައި ނެތް ކަމަށެވެ.