އޮޅުންއެރި ދެ ވަނަ ޑިވިޝަން އަންގާރަ ދުވަހު ފަށަނީ

އެކި ސަބަބުތަކާއި ހެދި ތަކުރާރުކޮށް ފަސްކުރަން ޖެހުނު ދެ ވަނަ ޑިވިޝަން ފުޓްބޯޅަ މުބާރާތް އެންމެފަހުން އަންނަ އަންގާރަ ދުވަހު ފަށަން ނިންމައިފި އެވެ.

ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން މީގެކުރިން ވަނީ މުބާރާތް ބާއްވާނެ ތިން ތާރީހެއް ކަނޑައަޅައިފަ އެވެ. އެކަމަކު އެއިން އެއްވެސް ތާރީހެއްގައި މުބާރާތެއް ނުބޭއްވުނެވެ. އެކަމުގެ ކަންބޮޑުވުމާ އެކު ދެ ވަނަ ޑިވިޝަނުގެ ކްލަބްތަކުން ސްޕޯޓްސް މިނިސްޓަރު އަބްދުﷲ ރާފިއު (ރާއްޕެ) އާ ވެސް ބައްދަލުކުރި އެވެ.

އެތައް ދުވަހެއްގެ އިންތިޒާރަށް ފަހު 15 ޓީމާ އެކު އަންނަ އަންގާރާ ދުވަހު މުބާރާތް ފަށާ ގޮތަށް މިހާރު ވަނީ ހަމަޖެހިފަ އެވެ. މުބާރާތުގެ މެޗުތައް ކުޅޭނީ ގަލޮޅު ދަނޑުގަ އެވެ. އެކަމަކު ގަލޮޅު ދަނޑުގެ ލައިޓްތައް މައްސަލަ ޖެހިފައިވާތީ ހުރިހާ މެޗެއް ވެސް ކުޅޭނީ ހަވީރު އެވެ.

ހަމައެކަނި ހަވީރު މެޗުތައް ކުޅެން ޖެހުމާ އެކު މުބާރާތް ދިގުލައިގެންދާނެ އެވެ. މިހާރު ޝެޑިއުލްގައިވާ ގޮތުން ފައިނަލް މެޗު ކުޅޭނީ އަންނަ ފެބްރުއަރީ މަހުގެ 15 ވަނަ ދުވަހު އެވެ. ހީކުރި ވަރަށްވުރެ މުބާރާތް ދިގުލައިގެން ދިއުމަކީ ދެ ވަނަ ޑިވިޝަނުގެ ޓީމުތަކަށް މާލީގޮތުން ކުރިމަތިވާނެ ގެއްލުމެކެވެ.

މުބާރާތުގެ ގުރު ނެގުމުގެ ރަސްމިއްޔާތު އިއްޔެ ގަލޮޅު ދަނޑުގައި ވަނީ ބާއްވައިފަ އެވެ. ކޮންމެ ގްރޫޕެއްގައި ފަސް ޓީމު ހިމެނޭހެން ޓީމުތައް ބަހާލީ ތިން ގްރޫޕަށެވެ. ކުއާޓާ ފައިނަލުން ފުރުސަތު ލިބޭނީ ކޮންމެ ގްރޫޕަކުން ކުރި ހޯދާ ދެ ޓީމަށާއި، ތިން ގްރޫޕުގެ ތެރެއިން އެންމެ ރަނގަޅު ނަތީޖާއާ އެކު ތިން ވަނަ އަށް ދާ ދެ ޓީމަށެވެ.

މިއަހަރުގެ މުބާރާތުގެ ފައިނަލަށް ދާ ދެ ޓީމަށް އަންނަ އަހަރުގެ ފުރަތަމަ ޑިވިޝަނުން ފުރުސަތު ލިބޭނެ އެވެ. ޗެމްޕިއަން އާއި ރަނަރަޕް ޓީމަށް ފުރަތަމަ ޑިވިޝަނުން ފުރުސަތު ލިބޭނެކަން އެފްއޭއެމުން ހާމަކުރީ އިއްޔެ އެވެ. އިތުރު މައުލޫމާތު ފަހުން ހިއްސާކުރާނެ ކަމަށް އެފްއޭއެމުން ވަނީ ބުނެފަ އެވެ.

ގްރޫޕް އޭ:

މަސްއޮޑި ސްޕޯޓްސް ކްލަބް، މަހިބަދޫ ސްޕޯޓްްސް ކްލަބް، ޖޭޖޭ ސްޕޯޓްސް ކްލަބް، ކުޑަހެންވޭރު ޔުނައިޓެޑް، އެލްޓީ ސްޕޯޓްސް ކްލަބް

ގްރޫޕް ބީ:

ބީޖީ ސްޕޯޓްސް ކްލަބް، ދަ ގްރާންޑޭ ސްޕޯޓްސް ކްލަބް، ނިއު ރޭޑިއަންޓް ސްްޕޯޓްސް ކްލަބް، ކްލަބް ޓީނޭޖް، ޓެންޓް ސްޕޯޓްސް ކްލަބް

ގްރޫޕް ސީ:

ކްލަބް ޕީކޭ، ވިކްޓަރީ ސްޕޯޓްސް ކްލަބް، ލޮރެންޒޯ، ބިސް ބުރު ސްޕޯޓްސް، ލެގޫންސް

މުބާރާތުގެ ފުރަތަމަ މެޗުގައި އަންނަ އަންގާރަ ދުވަހުގެ ހަވީރު ކުޅޭނީ މަސްއޮޑި ސްޕޯޓްސް ކްލަބާއި މަހިބަދޫ ސްޕޯޓްސް ކްލަބެވެ.