ބަދަލު ނުވި ރާމޯސް، އެއް މެޗެއްގައި ދެ ރަތް ކާޑު

ސްޕެނިޝް ލީގުގައި ރޭ ރެއާލް ސޮސިއެޑާޑް އަތުން 2-1 އިން ސެވިއްޔާ ބަލިވި މެޗުގައި، ސެވިއްޔާގެ ޑިފެންޑަރު ސާޖިއޯ ރާމޯސް، 37،  އަށް ދެ ފަހަރަށް ރަތް ކާޑު ދައްކައިފި އެވެ.

މެޗުގެ ފުރަތަމަ ހާފުގައި ސެވިއްޔާ ވަނީ ދެ ގޯލުގެ ލީޑެއް ނަގައިފަ އެވެ. ދެވަނަ ހާފުގައި ޔޫސުފް އެއްނަސީރީ ޖަހައިދިން ގޯލުން އެޓީމު ފަރަގު ކުޑަ ކޮށްފައި ވަނިކޮށް، މެޗުގެ ފުރިހަމަ ވަގުތު ހަމަވާން ކުޑަ ވަގުތުކޮޅަކަށް ވެފައި ހުއްޓައި ސޮސިއެޑާޑްގެ ބްރައިސް މެންޑޭޒް އަށް ރާމޯސް ކުރި ސްލައިޑިން ޓެކުލާ އެކު ރެފްރީ ވަނީ ރާމޯސް އަށް ދެވަނަ ރީނދޫ ކާޑަކާ އެކު ރަތް ކާޑެއް ދައްކައިފަ އެވެ.

އެހެން ނަމަވެސް ސެވިއްޔާގެ އެޕީލް އާއެކު ރެފްރީ ވަނީ ވީއޭއާރު މޮނީޓަރު ކައިރިއަށް ގޮސް ރީޕްލޭ ބަލައިފަ އެވެ. ރީޕްލޭ ބެލުމަށް ފަހު ރެފްރީ ވަނީ ރާމޯސް އަށް ދެއްކި ދެ ވަނަ ރީނދޫ ކާޑު ކެންސަލް ކޮށް، ސީދާ ރަތް ކާޑެއް ދައްކައި ދަނޑުން ފޮނުވާލައިފަ އެވެ.

މިއީ ރާމޯސްގެ ކެރިއަރުގައި އޭނާ އަށް ދެއްކި 29 ވަނަ ރަތް ކާޑެވެ. ރެއާލް މެޑްރިޑަށް ކުޅެމުން 26 ރަތް ކާޑު ހޯދި ރާމޯސް ވަނީ ޕީއެސްޖީއަށް ކުޅެމުން ދެ ރަތް ކާޑު ހޯދައިފަ އެވެ.

އެކާވީސް ވަނަ ގަރުނުގައި އެންމެ ގިނަ ރަތް ކާޑު ހޯދާފައިވާ ކުޅުންތެރިއަކީ ވެސް ރާމޯސް އެވެ. އޭނާއާ އެއްމެ ގާތުގައި އޮތީ 21 ރަތް ކާޑު ހޯދި ބާސެލޯނާގެ ކުރީގެ މެކްސިކޯ ޑިފެންޑަރު ރަފައެލް މާކުއޭޒް އެވެ.

ރޭގެ މެޗުގައި ރާމޯސް އަށް ދެއްކި ރަތް ކާޑަކީ ސްޕެނިޝް ލީގު މެޗެއްގައި އޭނާ އަށް ދެއްކި 21 ވަނަ ރަތް ކާޑެވެ. ލީގުގައި މިހާތަނަށް އެންމެ ގިނަ ރަތް ކާޑު ދައްކާފައި ވަނީ ވެސް އޭނާ އަށެވެ. ސްޕެނިޝް ލީގުގައި ރަތް ކާޑު ދެއްކި ކުޅުންތެރިންގެ ތެރޭގައި ރާމޯސްއާ އެންމެ ގާތް ކުރަނީ 18 ކާޑު ދައްކާފައިވާ ކުރީގެ ކުޅުންތެރިން ކަމަށްވާ އަގުއޭޑޯ އާއި ޕަބްލޯ އަލްފާރޯ އެވެ.

ރާމޯސް އާއެކު ސެވިއްޔާގެ ޖީސަސް ނަވާސް އަށް ވެސް ރެފްރީ ވަނީ ރޭގެ މެޗުގައި ރަތް ކާޑު ދައްކައިފަ އެވެ. މިއާ އެކު އެޓީމަށް މެޗު ފުރިހަމަ ކުރަން ޖެހުނީ ނުވަ ކުޅުންތެރިންނާ އެކު އެވެ.

މިހާތަނަށް ލީގުގައި ކުޅުނު 13 މެޗުން ހޯދި 12 ޕޮއިންޓާ އެކު ސެވިއްޔާ އޮތީ ލީގު ޓޭބަލްގެ 15 ވަނައިގަ އެވެ. ސޮސިއެޑާޑް ވަނީ 14 މެޗުން 25 ޕޮއިންޓް ހޯދައި ފަސް ވަނައަށް ޖެހިލައިފަ އެވެ.

ލީގު އެއް ވަނައިގައި މިވަގުތު އޮތީ 14 މެޗުން 35 ޕޮއިންޓް ހޯދާފައިވާ ރެއާލް މެޑްރިޑެވެ. ރެއާލް ވަނީ ރޭ 3-0 އިން ކާޑިޒްގެ މައްޗަށް ކުރި ހޯދައިފަ އެވެ.

ރެއާލަށް ވުރެ އެއް މެޗު މަދުން ކުޅެގެން 34 ޕޮއިންޓް ލިބިފައިވާ ޖިރޯނާ އޮތީ ދެ ވަނައިގަ އެވެ. އެތުލެޓިކް ބިލްބާއޯއާ ދެކޮޅަށް މިރޭ ޖިރޯނާ ކުޅޭ މެޗު ކާމިޔާބު ކޮށްގެން އަލުން އެެޓީމަށް އެއް ވަނައަށް ޖެހިލުމުގެ ފުރުސަތު އެބަ އޮތެވެ.

ލީގުގެ ތިން ވަނައިގައި އޮތީ 13 މެޗުން 31 ޕޮއިންޓް ހޯދާފައިވާ އެތުލެޓިކޯ މެޑްރިޑެވެ. އެތުލެޓިކޯ އިން ވަނީ ހޮނިހިރު ދުވަހުގެ ރޭ 1-0 އިން މަޔޯކާ ބަލިކޮށްފަ އެވެ. ހަމަ އެ ރޭ ބާސެލޯނާ ވަނީ ރަޔޯ ވަޔެކާނޯއާ ދެކޮޅަށް ކުޅެ 1-1 އިން އެއްވަރު ވެފަ އެވެ. ބާސެލޯނާ ހަތަރު ވަނައިގައި އޮތީ 14 މެޗުން 31 ޕޮއިންޓް ހޯދައިގެންނެވެ.