ރ. މަޑުއްވަރީގައި މުޅިން އަލަށް ހޭންޑްބޯޅަ މުބާރާތެއް ބާއްވަނީ، ތަރުހީބު ބޮޑު

ރ. މަޑުއްވަރީ އަންހެނުންގެ ތަރައްގީ އަށް މަސައްކަތްކުރާ ކޮމިޓީ އިން އިންތިޒާމުކުރާ ކަނބަލުންގެ ހޭންޑްބޯޅަ މުބާރާތް މިއަދު އެރަށުގައި ފަށާނެ އެވެ.

އެހެން ކުޅިވަރުތައް ވެސް ކުޅެވޭ ގޮތަށް މަޑުއްވަރީގައި ތަރައްގީކޮށްފައިވާ ފުޓްސަލް ދަނޑުގައި މުބާރާތް ކުރިއަށްދާނީ މިއަދުން ފެށިގެން މި މަހުގެ 29 ވަނަ ދުވަހުގެ ނިޔަލަށެވެ. ހަތަރު ޓީމު ވާދަކުރާ ލީގު ބުރުގެ މެޗުތައް ނިމޭނީ ހޯމަ ދުވަހު އެވެ. ފައިނަލުގައި ވާދަކުރާނީ އެންމެ ކުރި ހޯދާ ދެ ޓީމެވެ.

އެރަށަށް ހާއްސަކޮށްގެން ބާއްވާ މުބާރާތުގައި ވާދަކުރަނީ ސެވެން އެޓޭކާސް، ޓީމް ދޮންހިޔަލަ، ޓީމް ރާޅު އަދި ޓީމް ލިލީ އެވެ.

މިރޭ ކުޅޭ ފުރަތަމަ މެޗުގައި ސެވެން އެޓޭކާސް ނުކުންނާނީ ދޮންހިޔަލައާ ދެކޮޅަށެވެ. ރޭގަނޑު އަށެއް ޖަހާއިރު އެ މެޗު ފަށާނީ ހުޅުވުމުގެ ރަސްމިއްޔާތާ އެކު އެވެ. މިރޭ ކުޅޭ ދެ ވަނަ މެޗުގައި ނުވައެއް ޖަހާއިރު ވާދަކުރާނީ ޓީމް ރާޅު އާއި ޓީމް ލިލީ އެވެ.

އަންހެނުންގެ ކޮމިޓީގެ ދުރުވިސްނުމާ އެކު ބާއްވާ ފުރަތަމަ މުބާރާތް

މިއަހަރު ބާއްވަނީ މަޑުއްވަރީގައި އަންހެނުންގެ ކޮމިޓީން އިންތިޒާމުކުރާ ފުރަތަމަ ހޭންޑްބޯޅަ މުބާރާތެވެ. އެ ކޮމިޓީ އިން ބުނީ އެފަދަ މުބާރާތެއް މަޑުއްވަރީގެ އަންހެނުންނަށް އަމާޒުކުރުމުގެ މަގްސަދަކީ “މަޑުއްވަރީ ކަނބަލުންގެ މެދުގައި އެކުވެރިކަމާއި އެއްބައިވަންތަކަން އާލާކޮށް، އިޖުތިމާޢީ ގުޅުން ބަދަހިކޮށް ކުޅިވަރުގެ ރޫހު އާލާކޮށް ދެމެހެއްޓުން” ކަމަށެވެ.

މުބާރާތް ބޭއްވުމުގެ ވިސްނުން އަންހެނުންގެ ކޮމިޓީ އިން ގެނައީ އެރަށުގައި ޓްރެއިނިން ކޭމްޕެއް ބޭއްވުމަށް ފަހު އެވެ. މިދިޔަ އަހަރު އެރަށުގައި ބޭއްވި ހޭންޑްބޯލް ޓްރެއިނިން ކޭމްޕަށް ބޮޑު ތަރުހީބެއް ލިބުނެވެ. އަންހެނުންގެ ކޮމިޓީ އިން ބުނީ ޓެއިނިން ކޭމްޕާ އެކު ކުޅުންތެރިން ހޭންޑްބޯޅަ އަށް އަހުލުވެރިވެ މުބާރާތަށް ތައްޔާރުވާން ފަސޭހަވި ކަމަށެވެ.

ޓީމުތައް މުބާރާތަށް ތައްޔާރުވުމުގެ ގޮތުން އަންހެނުންގެ ކޮމިޓީ އިން ވަނީ ޓީމުތަކަށް ޕްރެކްޓިސް ޝެޑިއުލެއް ނެރެ އަމަލުކޮށްފަ އެވެ. ޓީމުތައް އެ ޝެޑިއުލްގެ ދަށުން ޕްރެކްޓިސް ކުރީ މި މަހުގެ 15 އިން 23 ވަނަ ދުވަހުގެ ނިޔަލަށެވެ.

މުބާރާތަށް ޓީމުތައް ތައްޔާރުވެފައިވާއިރު އަންހެނުންގެ ކޮމިޓީގެ އުއްމީދަކީ ކާމިޔާބުކަމާ އެކު މުބާރާތް ނިންމާލުމެވެ. އެއަށް ފަހު އެ ކޮމިޓީގެ އަމާޒަކީ ހޭންޑްބޯޅައިގެ އިތުރުން ކުޅިވަރުގެ އެކި ހަރަކާތްތައް ކަނބަލުންނަށް އަމާޒުކޮށްގެން އެރަށުގައި ހިންގުމެވެ.

މުބާރާތުގެ ހުރިހާ މެޗެއް “ބައިނަރީ ލައިވް” ފޭސްބުކް ޕޭޖުން ދައްކާގޮތަށް ވަނީ ހަމަޖެހިފަ އެވެ.