ކަނޑިތީމު ފޯމުގައި، ފޯކައިދޫ ފެށީ ބޮޑު މޮޅަކުން

ށ. އަތޮޅު ކައުންސިލުން އިންތިޒާމުކޮށްގެން ކުރިއަށްގެންދާ މިލައުތުރު ފުޓްސަލް މުބާރާތުގައި މިއަދު ގްރޫޕް އޭގައި ކުޅުނު މެޗުތަކުން ކަނޑިތީމާއި ފޯކައިދޫ މޮޅުވެއްޖެ އެވެ.

ގޮއިދޫގައި ކުޅޭ ގްރޫޕް އޭގެ ތިން މެޗު މިއަދު ވަނީ ކުޅެފަ އެވެ. ހަވީރު ކުޅުނު ފުރަތަމަ މެޗުގައި ކަނޑިތީމުން ވަނީ 1-3 އިން ނޫމަރާ ބަލިކޮށްފަ އެވެ. މުބާރާތުގައި ފޯކައިދޫ ކުޅުނު ފުރަތަމަ މެޗުގައި 0-6 އިން ވަނީ ބިލެތްފަހި ބަލިކޮށްފަ އެވެ. މިރޭ އެ ގްރޫޕުގައި ފީވަކާއި ފޭދޫ ކުޅުނު މެޗު ނިމުނީ 1-1 އިން އެއްވަރުވެގެންނެވެ.

މުބާރާތުގެ ފޭވަރިޓުންގެ ތެރޭގައި ހިމެނޭ ކަނޑިތީމު ވަނީ ފުރަތަމަ މެޗުގައި 1-5 އިން ފީވަށް ބަލިކޮށްފަ އެވެ. ނޫމަރާއާ ދެކޮޅަށް ވެސް ކަނޑިތީމުން ވަނީ މޮޅު ކުޅުމެއް ދައްކައިފަ އެވެ. މެޗުގެ މޮޅު ކުޅުންތެރިޔާގެ މަގާމް ހޯދީ ކަނޑިތީމު ޓީމުގެ މުހައްމަދު ޝާން އެވެ.

ކަނޑިތީމު އަތުން ބަލިވި ނޫމަރާ ވަނީ ފުރަތަމަ މެޗުގައި ފޭދޫ ބަލިކޮށްފަ އެވެ.

ކުރިން ދިވެހި ޕްރިމިއާ ލީގުގައި ވާދަކުރި ފޯކައިދޫ ޓީމު ހޯދި މޮޅުގައި، މޮޅު ކުޅުންތެރިޔާގެ މަގާމް ހޯދީ މުހައްމަދު އަފްރާހު އެވެ. އެ ގްރޫޕުގައި ފޭދޫ އާއި ފީވައް ކުޅުނު މެޗު އެއްވަރުވިއިރު މޮޅު ކުޅުންތެރިއަކީ ފޭދޫ ޓީމުގެ އިސްމާއީލް ފަޒީން އެވެ.

ހަތް ޓީމު ވާދަކުރާ ގްރޫޕުގައި ހަ މެޗު މިހާތަނަށް ކުޅެފައިވާއިރު ޕޮއިންޓެއް ނުލިބެނީ ހަމައެކަނި ބިލެތްފައްސަށެވެ. އެޓީމު ވަނީ ފުރަތަމަ މެޗުގައި ގޮއިދޫ އަތުން 1-3 އިން ބަލިވެފަ އެވެ. ގްރޫޕުގެ ގަދަ ހަތަރު ޓީމުގައި ހިމެނިގެން ކުއާޓާ ފައިނަލަށް ދަތުރުކުރަން އެޓީމަށް އޮތީ އުނދަގޫ ދަތުރެކެވެ.

ފޭދޫ އާއި ފީވައް ވެސް ފުރަތަމަ މެޗުން ބަލިވުމުން މިރޭ ނުކުތީ މޮޅެއް ހޯދާށެވެ. އެކަމަކު މެޗު އެއްވަރުވުމުން ބާކީ ހުރި މެޗުތަކުގައި އެ ދެ ޓީމުން ނަތީޖާ ރަނގަޅުކުރަން ޖެހޭނެ އެވެ.

ގްރޫޕް އޭގައި މާދަމާ ވެސް ތިން މެޗު ކުޅޭނެ އެވެ. ހަވީރު ހަތަރެއް ޖަހާއިރު ފަށާ މެޗުގައި ގޮއިދޫ ނުކުންނާނީ ފޯކައިދޫއާ ދެކޮޅަށެވެ. އެ ދެޓީމުގެ މެޗު ވާދަވެރިވާނެ އެވެ. މާދަމާ ހަވީރު ފަހެއް ޖަހާއިރު ކުޅޭ މެޗުގައި ބައްދަލުކުރާނީ ފީވަކާއި ނޫމަރާ އެވެ. މާދަމާ ރޭ 8:15 ގައި ފަށާ މެޗުގައި ކަނޑިތީމު ނުކުންނާނީ ފޭދޫއާ ދެކޮޅަށެވެ.

މިއަދު ގޮއިދޫގައި ކުޅުނު މެޗުތައް ބަލާލުމަށް ރާއްޖޭގެ އެއްވަނަ ކުޅުންތެރިޔާ އަލީ އަޝްފާގް (ދަގަނޑޭ) ވަނީ އެރަށަށް ގޮސްފަ އެވެ. މިލައުތުރު ފުޓްސަލް މުބާރާތް މިއަހަރު ޝަރަފްވެރި ކޮށްދެއްވީ ދަގަނޑޭ އެވެ.

މިލައުތުރު ފުޓްސަލްގެ މެއިން ސްޕޮންސަރަކީ ށ. އަތޮޅު ކައުންސިލެވެ. ކޯ ސްޕޮންސަރުންނަކީ އައިލެންޑް އެޕެރަލްސް އަދި ބޭންކް އޮފް މޯލްޑިވްސް އެވެ. އޮފިޝަލް މީޑިއާ ޕާޓްނަރަކަށް ފަހުމިނެޓް ހަމަޖެއްސިއިރު މީޑިއާ ޕާޓްނަރަކީ މިލައުތުރު.ކޮމް އެވެ.

މިއަހަރުގެ މުބާރާތް ކުރިއަށްދަނީ ގޮއިދޫގެ އިތުރުން މާއުނގޫދޫގަ އެވެ.