ޓިކެޓް ރަނަށްވެ، އޭދަފުށީގައި މިއަދު ކުޅޭ ފައިނަލުގެ ފޯރި ގަދަވެއްޖެ

ކައުންސިލުން އިންތިޒާމުކޮށްގެން ބ. އޭދަފުށީގައި ކުރިއަށްގެންދާ އޭދަފުށި ކަޕްގެ ފައިނަލް މިއަދު އެރަށުގައި ކުޅޭނެ އެވެ.

އޭދަފުށި ކަޕްގައި ހަތަރު ޓީމު ބައިވެރިވިއިރު ފައިނަލުގައި ވާދަކުރަނީ ހުސް ސޮންގުންނާއި ވެލާ ސްޕޯޓްސް ކްލަބެވެ. ވާދަވެރި ދެ ޓީމުގެ ފައިނަލް މިއަދު ހަވީރު ކުޅޭނީ އޭދަފުށީގައި ތަރައްގީ ކޮށްފައިވާ ޒަމާނީ ފެންވަރުގެ ސްޓޭޑިއަމްގަ އެވެ.

އޭދަފުއްޓަށް އުފަން ވިޔަފާރިވެރިޔާ އަހުމަދު ނަޒީރު ހަދިޔާކުރި ދަނޑުގައި ސިޑިބަރި އާއި ރޮސްޓްރަމް ތަރައްގީކޮށް ނިންމާލުމަށް ފަހު މިފަހަރުގެ މުބާރާތް ކުޅެނީ ޓިކެޓް ވިއްކައިގެންނެވެ. ރާއްޖޭގެ ރަށެއްގައި ޓިކެޓް ވިއްކައިގެން ކުޅޭ ތާރީހީ މުބާރާތް ފެންނަނީ ވަރަށް ފޯރިގަދަކޮށެވެ.

ސްޓޭޑިއަމްގެ ކެޕޭސިޓީ އަކީ ވީއަޕީއާ އެކު ގާތްގަނޑަކަށް 1000 ޖާގަ އެވެ. ސިޑިބަރީގައި ގާތްގަނޑަކަށް 800 ސަޕޯޓަރުންނަށް ތިބެވެ އެވެ. އެކަމަކު ފައިނަލް މެޗަށް ވިއްކީ 700 ޓިކެޓެވެ.

ފައިނަލަށް ނުކުންނައިރު ދެ ޓީމުގެ ވާދަވެރިކަމަށް އިތުރުވީ ޓިކެޓްގެ ފޯރި އެވެ. ފައިނަލް މެޗަށް ޓިކެޓް ވިއްކަން ފެށިތާ ކުޑައިރުކޮޅެއްތެރޭ ހުރިހާ ޓިކެޓެއް ވަނީ ވިކި ހުސްވެފަ އެވެ. ގްރޫޕް ސްޓޭޖުގެ މެޗުތަކަށް 10 ރުފިޔާގެ ރޭޓުން ޓިކެޓް ވިއްކިއިރު ފައިނަލުގެ ޓިކެޓް ވިއްކީ 20 ރުފިޔާ އަށެވެ.

ޓިކެޓްގެ ބާރު ބޮޑުވެ މިހާރު ވަނީ ބްލެކްމާކެޓްގައި ވެސް ޓިކެޓް ވިއްކަން ފަށައިފަ އެވެ. މައުލޫމާތު ލިބިފައިވާ ގޮތުގައި ބްލެކްމާކެޓްގައި ޓިކެޓްގެ އަގު 500 އަށް ވަނީ އަރައިފަ އެވެ.

ފައިނަލުގެ ޖާގަ ހުސް ސޮންގުން ހޯދީ ލީގު ބުރުގެ ތިން މެޗުން ވެސް މޮޅުވެގެންނެވެ. ވެލާ ސްޕޯޓްސް ފައިނަލުގެ ޖާގަ ކަށަވަރުކުރީ ސެމީ މެޗުގައި 1-2 އިން އިރުމަތި އެފްސީ ބަލިކޮށްގެންނެވެ.

ލީގު ބުރުގައި ހުސް ސޮންގުން ވަނީ ވެލާ ސްޕޯޓްސް 1-0 އިން ބަލިކޮށްފަ އެވެ.

ދެ ޓީމުގައި ވެސް ރާއްޖޭގެ މަޝްހޫރު ފުޓްބޯޅަ ކުޅުންތެރިން ހިމެނެ އެވެ. ވެލާ ޓީމުގައި ކްލަބް އީގަލްސްގެ ޒައިން ޒަފަރު އާއި އޭދަފުއްޓަށް އުފަން ގައުމީ ފުޓްބޯޅަ ޓީމުގެ ކުޅުންތެރިޔާ ނިޝާމް މުހައްމަދު ރަޝީދު (ޕޮގްބާ) ހިމެނެ އެވެ.

ހުސް ސޮންގުން ޓީމުގެ ގޯލްކީޕަރަކީ ފުޓްސަލް އާއި ފުޓްބޯޅައިގައި ފާހަގަކޮށްލެވޭ މުހައްމަދު ޝަފީއު (ޗެކް) އެވެ. ޗެކްގެ އިތުރުން އިބްރާހީމް ވަހީދު ހަސަން (އިއްބެ ވަހީދު) އާއި ސަސް އަށް ކުޅޭ އަހުމަދު އައިހަމް (އައިހު) އަދި ކުރިން ފުރަތަމަ ޑިވިޝަނުގައި ކުޅުނު އެރަށަށް އުފަން އިޝާން އިބްރާހީމް (ސައްޓު) ހިމެނެ އެވެ.

ކައުންސިލުން އިންތިޒާމުކޮށްގެން އޭދަފުށި ކަޕް ބާއްވާ މިއީ ތިން ވަނަ ފަހަރެވެ. ފުރަތަމަ ދެ މުބާރާތުގެ ޗެމްޕިއަންކަން ހޯދި އެމްވީ ޔުނައިޓެޑް މިފަހަރުގެ މުބާރާތުގައި ވާދައެއް ނުކުރެ އެވެ.

އޭދަފުށި ކަޕްގައި ހުސް ސޮންގުންނާއި ވެލާ ސްޕޯޓްސް ކްލަބް ވާދަކުރާ ފައިނަލް މެޗު ފަށާނީ ހަވީރު 3:45 ގަ އެވެ. އެ މެޗު ޔެސް ޓީވީ އިންނާއި އޭދަފުށި ކައުންސިލް ފޭސްބުކް ޕޭޖުން ލައިވްކުރާނެ އެވެ.