ގަތަރުގެ މަހުޖަނު ޔުނައިޓެޑް ނުގަންނަން ނިންމައިފި

މެންޗެސްޓާ (އޮކްޓޫބަރ 15) – ދުނިޔޭގެ ހައިބަތު ބޮޑު ކްލަބް، މެންޗެސްޓާ ޔުނައިޓެޑް ގަންނަން އެތައް ދުވަހެއް ވަންދެން މަސައްކަތްކޮށް، އެކަން ކޮޅެއްގައި ނުޖެހުމުން އެ ކްލަބް ގަންނަން ކުރި މަސައްކަތް ގަތަރުގެ މަހުޖަނު ޝެއިޚް ޖަސީމް ބިން ހަމަދް އަލް ތާނީ ހުއްޓާލައިފި އެވެ.

ގަތަރުގެ ބޭންކިން ވިޔަފާރީގައި ހިމެނޭ ނުޒޫފުގަދަ ވިޔަފާރިވެރިޔާ، ޖަސީމް ޔުނައިޓެޑް ގަންނަން ބިޑްކުރީ އޭނާގެ ހިއްސާ އޮންނަ ނައިންޓޫ ފައުންޑޭޝަންގެ ފަރާތުންނެވެ. ޔުނައިޓެޑް ގަންނަން ޖަސީމް ހުށަހެޅި ފަސް ބިލިއަން ޕައުންޑެވެ. އެކަމަކު ޔުނައިޓެޑްގެ އޯނަރުންގެ ގޮތުގައި ތިބި އެމެރިކާގެ ގްލޭޒާ އާއިލާއިން އެ އަގާ މެދު އެއްބަހެއް ނުވި އެވެ.

ޖަސީމް ޔުނައިޓެޑް ގަންނަން ބޭނުންވަނީ ކްލަބުގެ ފުރިހަމަ ކޮންޓްރޯލް ލިބޭގޮތަށް 100 އިންސައްތަ އެވެ. ރިޕޯޓްތައް ބުނާގޮތުން ޖަސީމް ޔުނައިޓެޑް ގަތުމުގެ މަސައްކަތް ހުއްޓާލީ ގްލޭޒާ ފެމިލީ އިން ހަ ބިލިއަން ޕައުންޑް ހުށަހެޅުމަށް ޑިމާންޑް ކުރުމުންނެވެ.

ގްލޭޒާ އާއިލާއިން 2005 ވަނަ އަހަރު ޔުނައިޓެޑް ގަތީ 790 މިލިއަން ޕައުންޑަށެވެ. ޔުނައިޓެޑް ވިއްކާލުމުގެ ވިސްނުން ގެންގުޅޭކަން ގްލޭޒާ އާއިލާއިން އިއުލާންކުރީ މިދިޔަ ނޮވެމްބަރު މަހު އެވެ.

ޖަސީމް ޔުނައިޓެޑަށް ހުށަހެޅީ ފަސް ބިލިއަން ޕައުންޑްގެ ފައިސާ އެއްފަހަރުން ދައްކާ ގޮތަށެވެ. އަދި ކްލަބުގެ ކޮންޓްރޯލް ހޯދުމަށް ފަހު ދަރަނީ އެއްކޮށް ދައްކަން ނިންމާފައިވެ އެވެ. މިދިޔަ މާޗް މަހުގެ ނިޔަލަށް ޔުނައިޓެޑްގެ ދަރަނީގެ އަދަދަކީ 969 މިލިއަން ޕައުންޑެވެ.

ދަރަނި ދެއްކުމުގެ އިތުރުން ޖަސީމް ވަނީ ސްޓޭޑިއަމް ތަރައްގީ ކުރުމަށާއި އާ ޓްރެއިނިން ފެސިލިޓީތައް ގާއިމް ކުރުމުގެ އިތުރުން ކުޅުންތެރިން ގަތުމަށް 1.4 ބިލިއަން ޕައުންޑް ހިމަނައިފަ އެވެ.

ޔުނައިޓެޑް ގަންނަން ޖަސީމްއާ އެކު ބިޑްކުރީ އިނގިރޭސި ބިލިއަނަރު ސާ ޖިމް ރަޓްކްލިފް އެވެ. އެކަމަކު ރަޓްކްލިފް ހުށަހެޅީ ކްލަބުގެ ހިއްސާ ގަތުމަށެވެ. ރަޓްކްލިފް ހުށަހެޅި އަގަކީ ވެސް ޖަސީމް ހުށަހެޅި ފަސް ބިލިއަން ޑޮލަރެވެ.

އެންމެ ފަހުގެ ރިޕޯޓްތައް ބުނާގޮތުން ރަޓްކްލިފްގެ ވިސްނުން ހުރީ ޔުނައިޓެޑްގެ 25 އިންސައްތަ ގަތުމަށެވެ. އޭރުން ރަޓްކްލިފް ވާނީ އެ ކްލަބުގެ މައިނޯރިޓީ ހިއްސާދާރަށެވެ.

ޔުނައިޓެޑް ވިއްކާލުމަށް އެދި އެ ކްލަބުގެ ސަޕޯޓަރުން އަންނަނީ ތަކުރާރުކޮށް އެދެމުންނެވެ. އެ ޓީމު މެޗުތައް ކުޅޭ ގަޑީގައި ސްޓޭޑިއަމްގައި އެފަދަ މެސެޖުތައް އާއްމުކުރާއިރު، މީގެކުރިން ސްޓޭޑިއަމްގެ ބޭރުގައި ވެސް ޔުނައިޓެޑް ވިއްކާލުމަށް އެދި ސަޕޯޓަރުން ހަރަކާތްތައް ހިންގާފައިވެ އެވެ.

ޔުނައިޓެޑްގެ ސަޕޯޓަރުންގެ ޓްރަސްޓް ގްރޫޕުގެ ފަރާތުން އާއްމުކުރި ބަޔާނުގައި ބުނީ ޔުނައިޓެޑަށް އާ އިންވެސްޓްމަންޓަކާ އެކު އާ އޯނަޝިޕެއް ބޭނުންވާ ކަމަށެވެ. އަދި، އެކަމުގެ މަޝްވަރާތައް އަވަހަށް ނިމެއް ބޭނުންވާކަން އެ ގްރޫޕުގެ ބަޔާނުގައިވެ އެވެ.

ޔުނައިޓެޑް ވިއްކާލުމުގެ މަޝްވަރާތައް ދިގުލައިގެން ދާއިރު، އެ ކްލަބުގެ ނަތީޖާތައް ދަށްވެ ކޯޗާއި ކުޅުންތެރިން ތިބީ ޕްރެޝަރުގަ އެވެ. އިނގިރޭސި ޕްރިމިއާ ލީގުގެ 10 ވަނައިގައި މިވަގުތު އެޓީމު އޮތްއިރު ޔޫއެފާ ޗެމްޕިއަންސް ލީގުގެ ގްރޫޕް ސްޓޭޖުގައި ކުޅުނު ފުރަތަމަ ދެ މެޗުން ވެސް ވަނީ ބަލިވެފަ އެވެ.