ޕްރެޝަރު ބޮޑުވެ ބައްސާމް މަގާމުން އިސްތިއުފާ ދެނީ؟

އެފްއޭއެމް ބޮއްސުންލައި، ފުޓްބޯޅައިގެ ހާލަތު ދަށަށް ދިއުމާއި ގުޅިގެން އަންނަ ޕްރެޝަރާ އެކު އެ އިދާރާގެ ރައީސް ބައްސާމް އަދީލް ޖަލީލް މަގާމުން އިސްތިއުފާ ދިނުމާ މެދު ވިސްނަމުން ދާކަމަށް މައުލޫމާތު ލިބިއްޖެ އެވެ.

ރާއްޖޭގެ ފުޓްބޯޅަ މިއިން ދުވަހަކު ނުދާހާ ދަށަށް ދިއުމާއެކު ބައްސާމްގެ މެނޭޖްމަންޓާ ދެކޮޅަށް ސަޕޯޓަރުން އަންނަނީ އަޑު އުފުލަމުންނެވެ. އަދި، ފުޓްބޯޅައިގައި ހަރަކާތްތެރިވެފައިވާ އަދި މިހާރު ވެސް ފުޓްބޯޅައިގެ ކަންކަމުގައި ޝާމިލްވާ ފަރާތްތަކެއް އިސްނަގައިގެން ދާދިފަހުން ވަނީ “ސޭވް އެފްއޭއެމް” ގެ ނަމުގައި ކެމްޕޭނެއް ފަށައިފަ އެވެ. އެއާ އެކު ބައްސާމް ނޫން ގޮތެއް ހޯދަން ޖެހޭކަމަށް ބުނެ ސޯޝަލް މީޑިއާގައި ގިނަ ބަޔަކު އަންނަނީ ޝުއޫރުފާޅުކުރަމުންނެވެ.

Advertisement

ބައްސާމް މަގާމް ދޫކޮށްލަން އުޅޭކަމުގެ މައުލޫމާތު އިތުބާރު ހުރި މަސްދަރަކުން މި ނޫހަށް ވަނީ ލިބިފަ އެވެ.

އެފްއޭއެމްގެ ރައީސްކަމަށް އަންނަން ރާއްޖޭގެ ތާރީހު ދުށް އެންމެ މޮޅު ކުޅުންތެރިޔާ، އަލީ އަޝްފާގް (ދަގަނޑޭ) ޝައުގުވެރިވާކަމަށް “ދަގަނޑޭ ފޯ އެފްއޭއެމް” ގެ ނަމުގައި ހިންގާ ފޭސްބުކް ޕޭޖަކުން މިއަދު ވަނީ އިއުލާންކޮށްފަ އެވެ. އެއާ އެކު ދަގަނޑޭ އެފްއޭއެމްގެ ރައީސްކަމާ ހަވާލުވުމަށް ގިނަ ބައެއްގެ ތާއީދު ވަނީ ލިބިފަ އެވެ.

އެފްއޭއެމްގެ ހިންގުން ދޯދިޔާވެ ފުޓްބޯޅަ ހަލާކުވެފައިވާ މި ދަނޑިވަޅުގައި އެފްއޭއެމްގެ އެގްޒެކެޓިވް ކޮމިޓީ ނުވަތަ އެކްސްކޯ އިން ދެ މެމްބަރަކު ވަނީ އިސްތިއުފާދީފަ އެވެ. އެކްސޯ ދޫކޮށްލީ ކްލަބް ގްރީން ސްޓްރީޓްސްގެ ރައީސް މުއާވިޔަތު ހަލީލް (މުއާބެ) އާއި މާޒިޔާ ސްޕޯޓްސް އެންޑް ރެކްރިއޭޝަންގެ ސީއީއޯ، ހުސައިން ޝާފިއު (ކޮކީ) އެވެ. ކޮކީ ވަނީ ދަގަނޑޭ އެފްއޭއެމްގެ ރައީސްކަމަށް ގެންނަން ތާއިދުކުރާކަން ހާމަކޮށްފަ އެވެ.

އިސްތިއުފާދިން މުއާބެ އާއި ކޮކީގެ އިތުރުން އެކްސްކޯގައި ހިމެނެނީ ސީނިއާ ނައިބު ރައީސް އަލީ އުމަރު އާއި އާއްމު މެމްބަރުންގެ ގޮތުގައި ހިމެނޭ އަހުމަދު ޝަކީބް އާއި ޓީސީ ސްޕޯޓްސް ކްލަބްގެ އަހުމަދު ނަޝީދު (ޑޭވް) އާއި ކްލަބް އީގަލްސްގެ މުފާވިޒް ހާޝިމް (މުފާ) ގެ އިތުރުން އައިމިނަތު ޝާނީން (ޝާނީ) އަދި މުހައްމަދު ޝިފާއު އެވެ.

އެފްއޭއެމްގައި މިހާރު ބައްސާމް ހޭދަކުރަމުންދާ ހަތަރު އަހަރުގެ ދައުރު ނިމޭނީ އަންނަ އަހަރުގެ މާޗް ހިސާބުގަ އެވެ.

ބައްސާމް އިސްތިއުފާދޭން އުޅޭކަމުގެ އަޑުތައް ގަދަވިޔަސް މީގެކުރިން ބައްސާމް ތަކުރާރުކޮށް ބުނަމުން އައީ އޭނާ އެންޑޯސްކޮށްފައިވަނީ ކްލަބްތަކުން ކަމަށާއި، ކްލަބްތަކުން އޭނާ ވަކިކުރަން އެދޭނަމަ މަގާމް ދޫކޮށްލާނެ ކަމަށެވެ.

Advertisement