މާފަންނު، ނައިވާދޫ އަދި ވާދޫ އިން ޒޯން ޗެމްޕިއަންކަން ހޯދައިފި

ސޮނީ ސްޕޯޓްސް ގޯލްޑެން ފުޓްސަލް ޗެލެންޖުގެ މާލެ ޒޯންގެ ޗެމްޕިއަންކަން މާފަންނު، ޒޯން އެކެއްގެ ޗެމްޕިއަންކަން ހދ. ނައިވާދޫ އަދި ޒޯން ހައެއްގެ ޗެމްޕިއަންކަން ގދ. ވާދޫ އިން ހޯދައިފި އެވެ.

މާލެ ޒޯން (ޒޯން 8) ގެ ޗެމްޕިއަންކަން މާފަންނު ހޯދީ ފައިނަލުގައި ވިލިމާލެއާ ދެކޮޅަށް ކުޅުނު މެޗު 2-2 އިން އެއްވަރުވުމުން ޕެނަލްޓީގައި 5-3 އިން ކުރި ހޯދައިގެންނެވެ.

މެޗުގައި މާފަންނުގެ ދެ ގޯލު ޖެހީ ހުސައިން އަފްސަލް އާއި ހަސަން ސުހައިލް އެވެ. ވިލިމާލޭގެ ގޯލުތައް ކާމިޔާބުކޮށްދިނީ އިސްމާއީލް ވަޖީދު އާއި އިސްމާއީލް ވިފާގު އެވެ. އެއްވަރުވެގެން ޖެހި ޕެނަލްޓީގައި މާފަންނުގެ ފަސް ޕެނަލްޓީ ވެސް ކާމިޔާބުކުރި އެވެ. ވިލިމާލޭގެ އަބްދުﷲ ޝައްފާން (ޝާކާ) ޖެހި ޕެނަލްޓީ މާފަންނުގެ ގޯލްކީޕަރު އިބްރާހީމް ނާޖިހު ވަނީ މަތަކޮށްފަ އެވެ.

ނައިވާދޫ އިން ޒޯން އެކެއްގެ ޗެމްޕިއަންކަން ހޯދީ ފައިނަލުގައި ށ. ކަނޑިތީމު 2-6 އިން ބަލިކޮށްގެންނެވެ. އަތޮޅު ޗެމްޕިއަންކަން ވެސް ހޯދި ނައިވާދޫ އަކީ މިފަހަރު މޮޅު ކުޅުމެއް ދައްކަމުން އަންނަ ޓީމެކެވެ. ރޭ އެޓީމަށް ގޯލުތައް ކާމިޔާބުކޮށްދިނީ ހެޓްރިކް ހެދި އަބްދުﷲ ވިސާމް އާއި އަބްދުﷲ ޝާފިއު (ޝާއްޕެ) އަދި މުހައްމަދު އަސްލަމް އެވެ. މެޗުގައި ޝާއްޕެ ދެ ގޯލު ޖެހި އެވެ. ކަނޑިތީމުގެ ގޯލުތައް ކާމިޔާބުކޮށްދިނީ އަހުމަދު ނިމާލް އާއި އާދަމް ތައުފީގު އެވެ.

ޒޯން އެކެއްގެ އެންމެ ގިނަ ގޯލު ޖެހި ކުޅުންތެރިޔަކީ ނައިވާދޫ ޓީމުގެ ވިސާމް އެވެ. ޒޯންގެ މޮޅު ކުޅުންތެރިޔާގެ މަގާމް ހޯދީ ޝާއްޕެ އެވެ.

ޒޯން ހައެއްގެ ފައިނަލުގައި ވާދޫ ވަނީ 3-1 އިން ގަން ބަލިކޮށްފަ އެވެ. ފޯރިގަދަ ކުޅުމެއް ފެނުނު މެޗުގެ ފުރަތަމަ ލީޑު ނެގީ ގަމުންނެވެ. އެޓީމުގެ އަހުމަދު ހަލީމް ގޯލު ޖަހާފައި ވަނިކޮށް ވާދޫ އިން ވަނީ ފަހަތުން އަރައި ތިން ގޯލު ޖަހައި ޗެމްޕިއަންކަން ކަށަވަރުކޮށްފަ އެވެ. މެޗުގައި ވާދޫގެ ގޯލުތައް ކާމިޔާބުކޮށްދިނީ އިބްރާހީމް ޝައުފް މުހައްމަދު އާއި މުހައްމަދު ނާއިލް އަދި މުސައްނިފު މުހައްމަދު އެވެ.

ޒޯން ހައެއްގެ އެންމެ ގިނަ ގޯލު ޖެހި ކުޅުންތެރިޔަކީ ގަން ޓީމުގެ އަހުމަދު ހަލީމް އެވެ. ޒޯންގެ އެންމެ މޮޅު ކުޅުންތެރިއަކަށް ހޮވުނީ ވާދޫ ޓީމުގެ އަޔާޒް އަހުމަދު (އަޔާ) އެވެ.

ރޭ ނިމުނު ތިން ޒޯނުގެ އިތުރުން ޒޯން ދޭއް އަދި ޒޯން ހަތެއްގެ ޗެމްޕިއަން ޓީމުތައް ވެސް ވަނީ ކަށަވަރުވެފަ އެވެ. ޒޯން ދޭއްގެ ޗެމްޕިއަންކަން އޭދަފުށި ބަލިކޮށް ހޯދީ އިނގުރައިދޫ އެވެ. ޒޯން ހަތެއްގެ ޗެމްޕިއަންކަން ސ. ފޭދޫއާ ވާދަކޮށް ހޯދީ ފުވައްމުލަކު ދަނޑިމަގު އެވެ.

މުބާރާތުގައި މިރޭ ކުޅޭނީ ބާކީ ޒޯން ފައިނަލްތަކެވެ. މިގޮތުން ޒޯން ތިން ފައިނަލް މިރޭ ކުޅޭއިރު، 8 ޖަހާއިރު ކުޅޭ މެޗުގައި ވާދަކުރާނީ ޒޯން ހަތަރެއްގެ ފައިނަލަށް ދަތުރުކުރި މާމިގިލި އާއި ދިއްގަރު އެވެ. އޭގެފަހުން 9 ޖަހާއިރު ކުޅޭނީ ޒޯން ތިނެއްގައި ގާފަރާއި ބޮޑުފޮޅުދޫ ވާދަކުރާ ފައިނަލެވެ. މިރޭ 10 ޖަހާއިރު ކުޅޭ ފައިނަލުގައި ވާދަކުރާނީ ޒޯން ފަހެއްގެ ފައިނަލަށް ދަތުރުކުރި ތިމަރަފުއްޓާއި ކުޑަހުވަދޫ އެވެ.