ގޯލްޑަން ފުޓްސަލް: އެންމެ މޮޅު 16 ޓީމުގެ މެޗުތައް މިރޭ

ސޮނީ ސްޕޯޓްސް ގޯލްޑަން ފުޓްސަލް ޗެލެންޖުގެ ގަދަ 16 ގެ މެޗުތައް މިރޭ ކުޅޭނެ އެވެ.

91 ޓީމު ބައިވެރިވި މުބާރާތުގައި މިހާރު ވަނީ އަތޮޅު ބުރާއި ޒޯން ބުރު ނިމިފަ އެވެ. މިރޭ ދެ ވަނަ ބުރުގެ އަށް މެޗު ކުޅޭއިރު ވާދަވެރި ގިނަ މެޗުތަކެއް އެބަހުއްޓެވެ. ދެ ވަނަ ބުރުގައި ވާދަކުރަނީ އަށް ޒޯނުގެ ތެރެއިން ޗެމްޕިއަން އަދި ރަނަރަޕް ހޯދި ޓީމުތަކެވެ.

8:15 ގައި ކުޅޭ ފުރަތަމަ މެޗުގައި ވާދަކުރާނީ ޒޯން ތިނެއްގެ ޗެމްޕިއަން ކ. ގާފަރާއި ޒޯން ހައެއްގެ ރަނަރަޕް ގއ. ކޮނޑޭ އެވެ. ކޮނޑޭ ޒޯންގެ ދެ ވަނަ ހޯދީ މިދިޔަ އަހަރުތަކުގައި މުބާރާތުގައި ރަނގަޅު ވާދައެއްކުރި ލ. ގަން ފުޓްސަލް ޓީމު ބަލިކޮށްގެންނެވެ. އެގަޑީގައި ކުޅޭ ދެ ވަނަ މެޗުގައި ވާދަކުރާނީ މާލެ މާފަންނު އާއި މ. ދިއްގަރު އެވެ. މާފަންނު ޓީމުން ވަނީ 2018 ވަނަ އަހަރުގެ ގޯލްޑަން ފުޓްސަލް މުބާރާތް ކާމިޔާބުކޮށްފަ އެވެ. މިފަހަރު އެޓީމުން މާލެ ޒޯންގެ ޗެމްޕިއަންކަން ހޯދިއިރު ދިއްގަރު ދެ ވަނަ ބުރަށް ދަތުރުކުރީ ޒޯން ހަތަރެއްގެ ރަނަރަޕް ޓީމުގެ ގޮތުގަ އެވެ.

ފުރަތަމަ މެޗުތަކަށް ފަހު 9:15 ގައި ވެސް ދެ މެޗު ކުޅޭނެ އެވެ. އެގަޑީގައި ކުޅޭ އެއް މެޗަކީ ޒޯން ހަތަރެއްގެ ޗެމްޕިއަން އދ. މާމިގިލި އަދި މާލެ ޒޯންގެ ރަނަރަޕް ހުޅުމާލެ ވާދަކުރާ މެޗެވެ. މާމިގިލިން ޒޯން ހަތަރެއްގެ ޗެމްޕިއަންކަން ހޯދިއިރު މާލެ ސަރަހައްދުން ހުޅުމާލެ ޓީމަށް ލިބުނީ ދެ ވަނަ އެވެ. ހަމަ އެގަޑީގައި ފުވައްމުލަށް މާލެގަން ޓީމާއި ށ. ކަނޑިތީމު ވާދަކުރާނެ އެވެ. މާލެގަން އަށް ޒޯން ބުރުން ސީދާ ޖާގައެއް ލިބުނުއިރު އެޓީމުން ޒޯން ޗެމްޕިއަންކަން ހޯދީ ފައިނަލުގައި ސ. ފޭދޫގެ މައްޗަށް ޕެނަލްޓީ ޖަހައިގެން ކުރި ހޯދައިގެންނެވެ. ކަނޑިތީމު ދެ ވަނަ ބުރަށް ކޮލިފައިވީ ޒޯން އެކެއްގެ ރަނަރަޕް ޓީމުގެ ގޮތުގަ އެވެ. ޒޯން ފައިނަލުގައި ކަނޑިތީމު ބަލިވީ ހއ. އިހަވަންދޫ އަތުންނެވެ.

10:15 ގައި ކުޅޭ ފުރަތަމަ މެޗުގައި ރ. ދުވާފަރާއި ސ. ފޭދޫ ވާދަކުރާއިރު އަނެއް މެޗުގައި ބައްދަލުކުރާނީ ތ. ތިމަރަފުށި އަދި އއ. މަތިވެރި އެވެ. ޒޯން ދޭއްގެ ޗެމްޕިއަންކަން ދުވާފަރުން ކަށަވަރުކުރީ މޮޅު ކުޅުމެއް ދެއްކުމަށް ފަހު އެވެ. އެޓީމާ ދެކޮޅަށް ނުކުންނަ ފޭދޫ ޓީމު މުބާރާތް ފެށީ ވެސް ޒޯން ބުރުންނެވެ. އެންމެ ފަހުގެ ޗެމްޕިއަން ތިމަރަފުށި ވަނީ މިއަހަރުވެސް ޒޯން ފަހެއްގެ ޗެމްޕިއަންކަން ހޯދާފަ އެވެ. އެޓީމަށް ދެކޮޅަށް ނުކުންނަ މަތިވެރި ދެ ވަނަ ބުރަށް ކޮލިފައިވީ ޒޯން ތިނެއްގެ ދެ ވަނަ ޓީމުގެ ގޮތުގަ އެވެ.

ދެ ވަނަ ބުރުގެ ފަހު ދެ މެޗުގެ ތެރެއިން އެއް މެޗުގައި ހއ. އިހަވަންދޫ އާއި ދ. ކުޑަހުވަދޫ ވާދަކުރާއިރު އަނެއް މެޗުގައި ގދ. ވާދޫ ނުކުންނާނީ ބ. އޭދަފުއްޓާ ދެކޮޅަށެވެ. އިހަވަންދޫ އިން ވަނީ އަތޮޅު ޗެމްޕިއަންކަމާއި ޒޯން ޗެމްޕިއަންކަން ހޯދާފަ އެވެ. ކަނޑިތީމު ބަލިކޮށް އިހަވަންދޫ އިން ޒޯން ޗެމްޕިއަންކަން ހޯދި ދަތުރުގައި ވަރުގަދަ ހދ. ނާވައިދޫ ވަނީ ބަލިކޮށްފަ އެވެ. ދ. ކުޑަހުވަދޫ އަކީ ތިމަރަފުށީގެ ފަހަތުން ޒޯން ފަހެއްގެ ދެ ވަނަ ޓީމެވެ. ޒޯން ބުރުގައި ކުޑަހުވަދޫ އިން ވަނީ ގަދަފަދަ ތިމަރަފުއްޓާ ވާދަކޮށް 2-2 އިން އެއްވަރުކޮށްފަ އެވެ. މިދިޔަ މުބާރާތުގެ ފައިނަލުގައި ބަލިވި އޭދަފުށި ޒޯން ބުރަށް ކޮލިފައިވީ ޒޯން ދޭއްގެ ދެ ވަނަ ޓީމުގެ ގޮތުގަ އެވެ. މަޝްހޫރު ފުޓްސަލް ތަރި އަޔާޒު އަހުމަދު (އަޔާ) ނިސްބަތްވާ ވާދޫ ޓީމު ދެ ވަނަ ބުރަށް ކޮލިފައިވީ ޒޯން ހައެއްގެ ޗެމްޕިއަން ޓީމުގެ ގޮތުގަ އެވެ. ފަހު މެޗުތައް ފަށާނީ މިރޭ 11:15 ގަ އެވެ.

މިރޭ ކުޅޭ އަށް މެޗުގެ ތެރެއިން ހަތަރު މެޗު ޔެސް ޓީވީ އިން ވަގުތުން ދައްކާނެ އެވެ. އެއީ ގާފަރާއި ކޮނޑޭ ވާދަކުރާ މެޗާއި، މާމިގިލި އަދި ހުޅުމާލެ ވާދަކުރާ މެޗާއި، ދުވާފަރާއި ފޭދޫ ވާދަކުރާ މެޗުގެ އިތުރުން އިހަވަންދޫ އަދި ކުޑަހުވަދޫ ވާދަކުރާ މެޗެވެ. މި ހަތަރު މެޗާއެކު ބާކީ ހަތަރު މެޗު ވެސް ގޯލްޑަން ފުޓްސަލް އެސޯސިއޭޝަނުގެ ފޭސްބުކް ޕޭޖުން ދެއްކުމަށް ވަނީ ހަމަޖެހިފަ އެވެ.

ގޯލްޑަން ފުޓްސަލް ޗެލެންޖު ކުރިއަށްދަނީ ގިނަ ސްޕޮންސަރުންތަކަކާ އެކު އެވެ. ޓައިޓަލް ސްޕޮންސަރަކަށް ސޮނީ ސްޕޯޓްސް ހަމަޖައްސާފައިވާއިރު ގޯލްޑެން ޕާޓްނަރަކީ ކޮކާ ކޯލާ އާއި ކުއިކް އެޒީ މެރިން (ޑޫސަން) އެވެ. މުބާރާތުގެ ބެވަރެޖް ޕާޓްނަރުގެ ގޮތުގައި ވެސް ހަމަޖައްސާފައިވަނީ ކޮކާ ކޯލާ އެވެ. މުބާރާތުގެ ޕްލެޓިނަމް ސްޕޮންސަރަކީ އުރީދޫ މޯލްޑިވްސް އެވެ. ސިލްވާ ޕާޓްނަރުންގެ ގޮތުގައި ކަނޑައަޅާފައިވަނީ އަލްޝާލީ މެރިން އާއި ފެންސީ ފުޑް އަދި މައި ކޮލެޖެވެ. އެހެން ޕާޓްނަރުންގެ ތެރޭގައި ރީޖަނަލް އެއާޕޯޓްސް، އެލައިޑް، ޕިއްޒާ ބޯނާ، ކޭވް ކެފޭ، ޔޫތު އޮންދަ މޫވް އަދި ޒުއްރާ ހިމެނެ އެވެ. އޮފިޝަލް ޖާޒީ ޕާޓްނަރަކަށް ޖާޒިއާ ހަމަޖައްސާފައިވާއިރު ޕްރިންޓިން ޕާޓްނަރަކީ ހަވާސާ ޕްރިންޓެވެ.

މީޑިއާ ޕާޓްނަރުންގެ ގޮތުގައި ހަތަރު މީޑިއާ އެއް ވަނީ ހަމަޖައްސައިފަ އެވެ. އޮފިޝަލް މީޑިއާ ޕާޓްނަރަކީ ވަން އޮންލައިން އެވެ. ސްޕޯޓްސް މީޑިއާ ޕާޓްނަރުގެ ގޮތުގައި ފަހުމިނެޓް ހަމަޖައްސާފައިވާއިރު ޕީއާރު ޕާޓްނަރަކީ އަދަދު ނޫހެވެ. ބްރޯޑްކާސްޓިން ޕާޓްނަރަކީ ޕީއެސްއެމް އެވެ.