ގޯލްޑަން ފުޓްސަލް: ޒޯން ބުރުގެ މެޗުތައް މިރޭ ފަށަނީ

މުޅި ރާއްޖެ އަށް ހުޅުވާލައިގެން ހުޅުމާލޭގައި ކުރިއަށްގެންދާ ސޮނީ ސްޕޯޓްސް ގޯލްޑަން ފުޓްސަލް ޗެލެންޖުގެ ޒޯން ބުރުގެ މެޗުތައް މިރޭ ފަށާނެ އެވެ.

91 ޓީމު ބައިވެރިވި މުބާރާތުގެ ގްރޫޕް ސްޓޭޖުގެ މެޗުތައް ކުރިއަށްދިޔައީ މިދިޔަ މަހުގެ 19 އިން މި މަހުގެ 11 ވަނަ ދުވަހުގެ ނިޔަލަށެވެ.

ޒޯން ބުރުގައި މިރޭ ހަ މެޗު ކުޅޭނެ އެވެ. މިރޭ 8:15 ގައި ކުޅޭ ފުރަތަމަ މެޗުގައި ބައްދަލުކުރާނީ ށ އަތޮޅުގެ ޗެމްޕިއަން ކަނޑިތީމު އާއި ހއ. ހޯރަފުއްޓެވެ. ހޯރަފުއްޓަކީ ހއ. އަތޮޅު ބުރުގެ ރަނަރަޕް ޓީމެވެ. މިރޭ އެގަޑީގައި ކުޅޭ ދެ ވަނަ މެޗުގައި ބައްދަލުކުރާނީ ކ. އަތޮޅުގެ ރަނަރަޕް ކާށިދޫ އާއި އއ. އަތޮޅުގެ ޗެމްޕިއަން މަތިވެރި އެވެ.

9:15 ގައި ކުޅޭ އެއް މެޗުގައި ށ. މިލަންދޫ އާއި ހދ. ނައިވާދޫ ވާދަކުރާއިރު އަނެއް މެޗުގައި ކުޅޭނީ ކ. ގާފަރު އަދި ޅ. ހިންނަވަރު އެވެ. ނައިވާދޫ އިން އަތޮޅު ޗެމްޕިއަންކަން ހޯދިއިރު މިލަންދޫ އަކީ ށ. އަތޮޅުގެ ދެ ވަނަ ޓީމެވެ. ގާފަރުން ކ. އަތޮޅުގެ ޗެމްޕިއަންކަން ހޯދިއިރު ޅ. އަތޮޅުގެ ޗެމްޕިއަންކަން ހޯދީ ހިންނަވަރު އެވެ.

މިރޭ ފަހު މެޗުތަކުގައި ކުޅޭނީ އދ އާއި މ އަތޮޅު ނިސްބަތްވާ ޒޯނުގެ މެޗުތަކެވެ. މ. އަތޮޅުގެ ޗެމްޕިއަން މުލަކުން މިރޭ އދ. ގެ ރަނަރަޕް، އޮމަދޫއާ ދެކޮޅަށް ނުކުންނައިރު މ. އަތޮޅުގެ ރަނަރަޕް، ދިއްގަރު ނުކުންނާނީ އދ. ގެ ޗެމްޕިއަން މާމިގިއްޔާ ދެކޮޅަށެވެ.

މުބާރާތުގެ ގަވާއިދުގައިވާ ގޮތުން ގަދަ 16 އަށް ހޮވޭނީ ކޮންމެ ޒޯނަކުން ޗެމްޕިއަން އަދި ރަނަރަޕް ޓީމެވެ. ޒޯން ބުރުގެ މެޗުތައް މި މަހުގެ 20 ވަނަ ދުވަހުގެ ނިޔަލަށް ކުރިއަށްދާއިރު ގަދަ 16 ގެ މެޗުތައް އޮންނާނީ މި މަހުގެ 23 ވަނަ ދުވަހު އެވެ. 25 ވަނަ ދުވަހު ކުއާޓާ ފައިނަލް ކުޅޭއިރު ސެމީ ފައިނަލް ދެ މެޗު އޮންނާނީ މާޗް 27 ގަ އެވެ. މުބާރާތުގެ ފައިނަލް ކުޅުމަށް ހަމަޖެހިފައިވަނީ މާޗް 30 ވަނަ ދުވަހު އެވެ.

ގޯލްޑަން ފުޓްސަލް ޗެލެންޖުގެ ޗެމްޕިއަންކަން 2019 ވަނަ އަހަރު ހޯދީ ފައިނަލުގައި ތ. ތިމަރަފުއްޓެވެ. ބ. އޭދަފުއްޓާ ވާދަކޮށް ތިމަރަފުށި ފައިނަލުގައި މޮޅުވީ 5-2 އިންނެވެ. އެއަށްފަހު ކޮވިޑްގެ އާލަމީ ވަބާގެ ސަބަބުން މިދިޔަ ދެ އަހަރު މުބާރާތް ނުބޭއްވުނެވެ. ތިމަރަފުށިން ވަނީ 2016 ވަނަ އަހަރު ވެސް މި މުބާރާތް ކާމިޔާބުކޮށްފަ އެވެ. ދެން މި މުބާރާތް ކާމިޔާބުކުރީ ބ. ހިތާދޫ އާއި މާލެ މާފަންނު އަދި މާލެ ހެންވޭރު އެވެ.

މިއަހަރުގެ މުބާރާތް ކުރިއަށްދަނީ ހުޅުމާލޭ ރެހެންދި ސްކޫލް ޓާފް ފުޓްސަލް ދެ ދަނޑުގަ އެވެ.

ގޯލްޑަން ފުޓްސަލް ޗެލެންޖު ކުރިއަށްދަނީ ގިނަ ސްޕޮންސަރުންތަކަކާ އެކު އެވެ. ޓައިޓަލް ސްޕޮންސަރަކަށް ސޮނީ ސްޕޯޓްސް ހަމަޖައްސާފައިވާއިރު ގޯލްޑެން ޕާޓްނަރަކީ ކޮކާ ކޯލާ އާއި ކުއިކް އެޒީ މެރިން (ޑޫސަން) އެވެ. މުބާރާތުގެ ބެވަރެޖް ޕާޓްނަރުގެ ގޮތުގައި ވެސް ހަމަޖައްސާފައިވަނީ ކޮކާ ކޯލާ އެވެ. މުބާރާތުގެ ޕްލެޓިނަމް ސްޕޮންސަރަކީ އުރީދޫ މޯލްޑިވްސް އެވެ. ސިލްވާ ޕާޓްނަރުންގެ ގޮތުގައި ކަނޑައަޅާފައިވަނީ އަލްޝާލީ މެރިން އާއި ފެންސީ ފުޑް އަދި މައި ކޮލެޖެވެ. އެހެން ޕާޓްނަރުންގެ ތެރޭގައި ރީޖަނަލް އެއާޕޯޓްސް، އެލައިޑް، ޕިއްޒާ ބޯނާ، ކޭވް ކެފޭ، ޔޫތު އޮންދަ މޫވް އަދި ޒުއްރާ ހިމެނެ އެވެ. އޮފިޝަލް ޖާޒީ ޕާޓްނަރަކަށް ޖާޒިއާ ހަމަޖައްސާފައިވާއިރު ޕްރިންޓިން ޕާޓްނަރަކީ ހަވާސާ ޕްރިންޓެވެ.

މީޑިއާ ޕާޓްނަރުންގެ ގޮތުގައި ހަތަރު މީޑިއާ އެއް ވަނީ ހަމަޖައްސައިފަ އެވެ. އޮފިޝަލް މީޑިއާ ޕާޓްނަރަކީ ވަން އޮންލައިން އެވެ. ސްޕޯޓްސް މީޑިއާ ޕާޓްނަރުގެ ގޮތުގައި ފަހުމިނެޓް ހަމަޖައްސާފައިވާއިރު ޕީއާރު ޕާޓްނަރަކީ އަދަދު ނޫހެވެ. ބްރޯޑްކާސްޓިން ޕާޓްނަރަކީ ޕީއެސްއެމް އެވެ.