އިއްބެ ވަހީދުގެ ހެޓްރިކާ އެކު މާޒިޔާ އިން ފައިނަލުގެ ފުރުސަތު ބޮޑުކޮށްފި

މިހާރު ކުރިއަށްދާ ޕްރެޒިޑެންޓްސް ކަޕް ފުޓްބޯޅަ މުބާރާތުގައި މިއަދު ހަވީރު އިބްރާހީމް ވަހީދު ހަސަން (އިއްބެ ވަހީދު) ގެ ހެޓްރިކާ އެކު 0-4 އިން ޔުނައިޓެޑް ވިކްޓްރީ (ޔޫވީ) ބަލިކޮށް މާޒިޔާ އިން ފައިނަލުގެ ޖާގައެއް ގާތްގަނޑަކަށް ޔަގީންކޮށްފި އެވެ.

ފުރަތަމަ ޑިވިޝަނުގެ އަށް ޓީމުގެ މެދުގައި ލީގު ބުރެއް ކުޅުމަށް ފަހު ފައިނަލަށް ހޮވޭނީ އެންމެ ގިނަ ޕޮއިންޓް ހޯދާ ދެ ޓީމެވެ. މާޒިޔާގެ އިތުރުން ކްލަބް ވެލެންސިއާ އިން ވެސް އަންނަނީ ސަތޭކަ ޕަސެންޓް ރެކޯޑް ދަމަހައްޓަމުންނެވެ. ކުޅުނު ފަސް މެޗުން މޮޅުވެ މި ދެޓީމަށް ވެސް 15 ޕޮއިންޓް ލިބިފައިވާއިރު ލަނޑުގެ ތަފާތުން އެއް ވަނައިގައި އޮތީ މާޒިޔާ އެވެ. ފައިނަލުގެ ޖާގައެއް ކަށަވަރުކުރަން މި ދެޓީމަށް ވެސް ދެން ބޭނުންވަނީ ތިން ޕޮއިންޓެވެ. ކޮންމެ ޓީމަކަށް ބާކީ ދެން އޮތީ ދެ މެޗެވެ. އެތަނުން އެއް މެޗަކީ މާޒިޔާ އާއި ވެލެންސިއާގެ ކުރިމަތިލުމެކެވެ.

Advertisement

މިހާރު ތާވަލު އޮތްގޮތަށް ބަލާއިރު މާޒިޔާ އާއި ވެލެންސިއާގެ ފަހަތުން ފައިނަލުގެ ޖާގައަކަށް ވާދަކުރަނީ ކްލަބް ގްރީން ސްޓްރީޓްސް އެވެ. އެޓީމު ތިން ވަނައިގައި އޮތީ 12 ޕޮއިންޓާ އެކު އެވެ. ގްރީން އިން ރޭ ވަނީ ފަސޭހަކަމާ އެކު ޓީސީ ސްޕޯޓްސް ކްލަބް ބަލިކޮށްފަ އެވެ.

މެޗުގައި މާޒިޔާގެ ފުރަތަމަ ލަނޑު 10 ވަނަ މިނެޓުގައި ޖެހީ ކޮނޭލިއަސް ސްޓެވާޓް (ކޯނޭ) އެވެ. ފުރަތަމަ ހާފު މި ނަތީޖާގައި ނިމުނުއިރު މާޒިޔާގެ އަނެއް ތިން ގޯލު ޖަހައި އިއްބެ ވަހީދު ހެޓްރިކް ހެދީ ދެ ވަނަ ހާފުގަ އެވެ. ދެ ވަނަ ހާފު ފެށިގެން ފުރަތަމަ މިނެޓުތެރޭ އިއްބެ ވަހީދު ފުރަތަމަ ގޯލު ޖެހީ ހުސްކޮށް ލިބުނު ބޯޅަ ގޯލުގެ ދުރު ކަނަށް އަމާޒުކޮށްލައިގެންނެވެ. އޭގެ ގާތްގަނޑަކަށް ފަސް ވަރަކަށް މިނެޓު ފަހުން އިއްބެ ވަހީދު އަށް ލިބުނު އިތުރު ފުރުސަތެއްގެ ބޭނުންހިފައި ނަތީޖާގެ ފަރަގު ބޮޑުކުރި އެވެ. އިއްބެ ވަހީދު ހެޓްރިކް ފުރިހަމަކުރީ 72 ވަނަ މިނެޓުގައި އިބްރާހީމް އައިސަމް ނަގައިދިން ކޯނަރަކުން ބޮލުން ގޯލު ޖަހައިގެންނެވެ. މިދިޔަ ސީޒަނުގައި ދަށް ފޯމެއްގައި ހުރިނަމަވެސް އިއްބެ ވަހީދު މި ސީޒަނުގައި އަންނަނީ އޭނާގެ ކުރީގެ މޮޅު ކުޅުން ތަކުރާރުކުރަމުންނެވެ. މިއަދުގެ ހެޓްރިކާ އެކު އިއްބެ ވަހީދު މި ސީޒަނުގައި ޖެހި ގޯލުގެ އަދަދު ހަތަކަށް އެރީ އެވެ.

މުބާރާތުގައި މިރޭ ކުޅޭ މެޗުގައި ބައްދަލުކުރާނީ ކްލަބް އީގަލްސް އާއި ދަ ގްރާންޑޭ ސްޕޯޓްސް ކްލަބް އެވެ. ޕްރެޒިޑެންޓްސް ކަޕްގެ ފައިނަލް މެޗު މި މަހުގެ 23 ވަނަ ދުވަހު ކުޅުމަށް ހަމަޖެހިފައިވަނީ ރ. އަލިފުށީގައި ސަރުކާރުން ގާއިމްކުރި ޓާފް ފުޓްބޯޅަ ދަނޑުގަ އެވެ.

Advertisement