ބަދުނަސީބު އަހަރު ބާސެލޯނާ އަށް މޮޅަކުން ނިންމާލެވޭ ގޮތެއްނުވި

ސްޕެނިޝް ލީގުގައި ރޭ ރަށުން ބޭރުގައި ސެވިއްޔާއާ ވާދަކުރި މެޗު 1-1 އިން އެއްވަރުވެ ކަޅު އަހަރެއް ތަޖުރިބާކުރި ބާސެލޯނާ އިން އަހަރު ނިންމާލައިފި އެވެ.

މިއަހަރަކީ ފަހުގެ ތާރީހެއްގައި ބާސެލޯނާ އަށް އެންމެ ބޮޑެތި ގޮންޖެހުންތައް ދިމާވި އަހަރެވެ. އެޓީމުގެ ތަރި ލިއޮނަލް މެސީ ކްލަބް ދޫކޮށްލުމާއި، މާލީ ގޮތުން ކްލަބް ބިކަވެ ކުޅުންތެރިންގެ މުސާރައިގެ ކަންކަން ހަމަނުޖެއްސުމުގެ އިތުރުން ކޯޗުން ބަދަލުކޮށްގެން ވެސް ބާސެލޯނާ މިއަހަރު ކުރީ ހިތި ތަޖުރިބާއެކެވެ. އަދި، ޔޫއެފާ ޗެމްޕިއަންސް ލީގުގެ ގްރޫޕް ސްޓޭޖުން ކަޓައި ޔޫއެފާ ޔޫރޮޕާ ލީގުގައި ކުޅެން ޖެހުނުއިރު މިހާރު ލީގުގައި އެޓީމު އޮތީ އަންނަ ސީޒަނުގެ ޔޫރޮޕާ ލީގުގެ ޖާގައެއް ވެސް ލިބޭ ހިސާބެއްގައެއް ނޫނެވެ.

Advertisement

ރޭގެ މެޗުގެ ފުރަތަމަ ލަނޑު 32 ވަނަ މިނެޓުގައި އިވާން ރަކިޓިޗްގެ އެހީތެރިކަމާ އެކު ޖެހީ ސެވިއްޔާގެ ޕާޕޫ ގޯމޭޒް އެވެ. ބާސެލޯނާ އިން އެއްވަރުކުރި ލަނޑު ފުރަތަމަ ހާފުގެ ފަހުމިނެޓުގައި އުސްމާން ޑެމްބެލޭ ނަގައިދިން ހުރަހަކުން ޖެހީ ރޮނާލްޑް އަރައުހޯ އެވެ. ދެ ވަނަ ހާފުގެ 64 ވަނަ މިނެޓުގައި ސެވިއްޔާގެ މުހިއްމު ޑިފެންޑަރު ޖޫލްސް ކޫންޑޭ އަށް ރެފްރީ ސީދާ ރަތް ކާޑެއް ދެއްކުމުން އެޓީމުން މެޗުގެ ބާކީ ބައި ފުރިހަމަކުރީ 10 ކުޅުންތެރިންނާ އެކު އެވެ. މިދިޔަ ޓްރާންސްފާ ބާޒާރުގައި ޗެލްސީން ފާރަލި ފްރާންސްގެ ކޫންޑޭ އަށް ރަތް ކާޑު ދެއްކީ ބާސެލޯނާގެ ޑިފެންޑަރު ޖޯޑީ އަލްބާއާ ދިމާއަށް ބޯޅަ އެއްލުމުންނެވެ.

ސެވިއްޔާގެ އެއްކުޅުންތެރިއަކު މަދުވި ނަމަވެސް ލިބުނު ފުރުސަތުތަކުގެ ބޭނުންހިފައި ބާސެލޯނާ އަށް މެޗުން މޮޅުވެވޭ ގޮތެއްނުވި އެވެ. ދެ ވަނަ ހާފުގައި ބާސެލޯނާގެ ގަވީ ހުސްކޮށް ހުރެ ބޮލުން ޖެހި ބޯޅައެއް ބޭރަށް ދިޔައިރު ޑެމްބެލޭ ގޯލަށް އަމާޒުކޮށްލި ބޯޅަ ޖެހުނީ ދަނޑީގަ އެވެ. އަދި، ސެވިއްޔާގެ ލޯނު އުސޫލުން ބާސެލޯނާ އަށް ކުޅެމުން އަންނަ ލޫކް ޑި ޔޮން މެޗުގެ އިތުރު ވަގުތުގައި ބޮލުން ފޮނުވާލި ބޯޅަ ދިޔައީ ސެވިއްޔާގެ ކީޕަރު އަތަށެވެ.

ރޭގެ ނަތީޖާއާ އެކު ބާސެލޯނާ މިހާރު އޮތީ 18 މެޗުން ލިބިފައިވާ 28 ޕޮއިންޓާ އެކު ތާވަލުގެ ހަތް ވަނައިގަ އެވެ. މޮޅެއް ނުލިބުމުން އެއް ވަނައިގައި އޮތް ރެއާލް މެޑްރިޑާ ގާތަށް ޖެހިލަން ލިބުނު ފުރުސަތު ސެވިއްޔާ އަށް ވަނީ ބޭކާރުވެފަ އެވެ. ލީގުގެ އެއް ވަނައިގައި 43 ޕޮއިންޓާ އެކު ރެއާލް އޮތްއިރު ދެ ވަނައިގައި ސެވިއްޔާ އޮތީ 38 ޕޮއިންޓާ އެކު އެވެ.

ސްޕެނިޝް ލީގުގައި ބާސެލޯނާ ދެން މެޗެއް ކުޅޭނީ އަންނަ އަހަރުގެ ޖެނުއަރީ ދެ ވަނަ ދުވަހު އެވެ. އެދުވަހު ރަށުން ބޭރުގައި ބާސެލޯނާ ވާދަކުރާނީ މަޔޯކާއާ އެވެ.

Advertisement