ލިވަޕޫލް ބުރެކި ޖެހުނު ވަގުތު ސިޓީ ބާރަށް ކުރިއަށް ޖެހިލައިފި

އިނގިރޭސި ޕްރިމިއާ ލީގުގައި ރޭ ލިވަޕޫލް ކުޅުނު މެޗު އެއްވަރުވިއިރު މެންޗެސްޓަރ އިން ބޮޑު މޮޅެއް ހޯދައި ލީގުގެ އެއް ވަނައިގައި ތިން ޕޮއިންޓުގެ ލީޑެއް ނަގައިފި އެވެ. ލީގުގައި ރޭ ޗެލްސީ ވެސް ވަނީ ކުޅުނު މެޗުން އެއްވަރުވެފަ އެވެ.

އިނގިރޭސި ޕްރިމިއާ ލީގުގެ ފުރަތަމަ ބުރު ނިމުމާ ގާތްވެފައިވާއިރު މިފަހަރުގެ ލީގަށް ވާދަކުރަމުން ސިޓީ، ލިވަޕޫލް އަދި ޗެލްސީ އެވެ. އެކަމަކު ފަހަކަށް އައިސް ޗެލްސީގެ ފޯމު ދަށްވެ އެޓީމު ވަނީ ސިޓިއާ ލިވަޕޫލާ ފެއަށް ޖެހިފަ އެވެ. ލީގުގައި ރޭ ޗެލްސީން ރަށުން ބޭރުގައި ވުލްވްސްއާ ވާދަކުރި މެޗު ނިމުނީ 0-0 އިން އެއްވަރުވެގެންނެވެ. ސިޓީ ވަނީ ރަށުން ބޭރުގައި 4-0 އިން ނިއުކާސަލް ޔުނައިޓެޑް ބަލިކޮށްފަ އެވެ. ޓޮޓެންހަމްގެ ދަނޑުގައި ލިވަޕޫލާ ވާދަކުރި މެޗު ނިމުނީ 2-2 އިން އެއްވަރުވެގެންނެވެ.

ލީގު ތާވަލަށް ބަލާއިރު ސިޓީ އެއް ވަނައިގައި އޮތީ 17 މެޗުން 44 ޕޮއިންޓް ހޯދައިގެންނެވެ. ދެ ވަނައިގައި އޮތް ލިވަޕޫލަށް 18 މެޗުން ލިބިފައިވަނީ 41 ޕޮއިންޓެވެ. 18 މެޗުން 38 ޕޮއިންޓާ އެކު ޗެލްސީ ތިން ވަނައިގައި އޮތްއިރު ހަމަ އެ އަދަދަށް މެޗު ކުޅެގެން ލިބިފައިވާ 32 ޕޮއިންޓާ އެކު އާސެނަލް އޮތީ ހަތަރު ވަނައިގަ އެވެ.

ނިއުކާސަލް އަތުން ފަސޭހަ މޮޅެއް ސިޓީން ހޯދި މެޗުގައި ތަފާތު ދެއްކީ ޑިފެންޑަރު ޔާއޯ ކަންސޭލޯ އެވެ. ފުރަތަމަ ލަނޑު ކަންސޭލޯގެ އެހީތެރިކަމާ އެކު ޖެހީ ރުބެން ޑިއާސް އެވެ. ދެ ވަނަ ކަންސޭލޯ ޖެހިއިރު ތިން ވަނަ ލަނޑު ޖެހީ ރިޔާދް މާރޭޒް އެވެ. ސިޓީގެ ފަހު ލަނޑު ޖެހީ ރަހީމް ސްޓާލިން އެވެ.

ސިޓިގެ ކޯޗު ޕެޕް ގާޑިއޯލާ ބުނީ މެޗުގެ ފުރަތަމަ ހާފުގައި ފެނުނީ މި ސީޒަނުގައި ސިޓީން ފެނުނު އެންމެ ދަށް ކުޅުން ކަމަށެވެ. އެކަމަކު ނިއުކާސަލަށް ރަނގަޅަށް ޑިފެންސް ނުކުރެވުމުން ގޯލު ޖެހުނީ ކަމަށް ގާޑިއޯލާ ބުންޏެވެ.

ޗެލްސީގައި ކޮވިޑް ކޭސްތައް ގިނަވުމާ އެކު އެ ކްލަބުން ވަނީ އިއްޔެ ކުޅެން އޮތް މެޗު ފަސްކޮށްދޭން އެދިފަ އެވެ. އެކަމަކު ޕްރިމިއާ ލީގުން ނިންމީ މެޗު ކުރިއަށްގެންދާށެވެ. މި ނިންމުމާ އެކު ޗެލްސީގެ ކޯޗު ތޯމަސް ޓުކެލް ވަނީ މެޗުގެ ކުރިންނާއި މެޗަށް ފަހު ވެސް ހިތްހަމަނުޖެހުން ފާޅުކޮށްފަ އެވެ. ކޮވިޑަށް ޕޮޒިޓިވްވުމާއި އަނިޔާގެ ސަބަބުން ޗެލްސީގެ ގިނަ ކުޅުންތެރިންތަކެއް ކުޅުމާ ދުރުގައި ހުރިއިރު އިއްޔެގެ މެޗުގައި މެދުތެރޭގައި އެންގޯލޯ ކާންޓޭއާ އެކު ކުޅުނީ ޑިފެންޑަރު ޓްރެވޯ ޗަލޮބާ އެވެ. އެކަމަކު ދެ ވަނަ ހާފުގައި ޓުކެލް ވަނީ ޗަލޮބާގެ ބަދަލުގައި ސައުލް ނިގުއޭޒް ކުޅެން އަރުވައިފަ އެވެ.

މެޗުގެ 15 ވަނަ މިނެޓުގައި ވުލްވްސްގެ ޑެނިއެލް ޕޮޑެންސް ގޯލަށް ވައްދާލި ބޯލަ ވީޑިއޯ އެސިސްޓެންޓް ރެފްރީ (ވީއޭއާރު) ގެ އެހީތެރިކަން ހޯދުމަށް ފަހު ރެފްރީ ވަނީ ނިންމުން ބަދަލުކޮށްފަ އެވެ. ގޯލު ކެންސަލްކުރީ ޕޮޑެންސް ގޯލަށް ބޯޅަ ވައްދާލުމުގެ ކުރިން އެ ބޯޅަ އަށް މަސައްކަތްކުރި ރައުލް ހިމެނޭޒް އޮފްސައިޑް މަގާމެއްގައި ހުރުމުންނެވެ. މެޗުގެ ދެ ވަނަ ހާފުގައި ޗެލްސީން ވަނީ މޮޅަށް ކުޅެ ވުލްވްސްގެ ގޯލަށް ނުރައްކާކޮށްފަ އެވެ. އެކަމަކު މި ސީޒަނުގައި ޑިފެންސް ރަނގަޅު ވުލްވްސް އިން ޗެލްސީ ގޯލެއް ޖެހިޔަނުދީ ހިފެހެއްޓި އެވެ.

ޓޮޓެންހަމްއާ ދެކޮޅަށް ނުކުތްއިރު ކޮވިޑަށް ޕޮޒިޓިވްވެގެން ލިވަޕޫލްގެ މުހިއްމު ކުޅުންތެރިންތަކެއް ތިބީ ކުޅުމާ ދުރުގަ އެވެ. އޭގެތެރޭގައި މުހިއްމު ޑިފެންޑަރު ވާޖިލް ވެން ޑައިކް އާއި ފަބީނިއޯ އަދި ތިއާގޯ އަލްކަންޓަރާ ހިމެނެ އެވެ. މިޑްފީލްޑަރު ޖޯޑެން ހެންޑަސަން ރޭގެ މެޗުގައި ނުކުޅުނީ ބަލިކޮށް އުޅޭތީ އެވެ. މެޗަށް ނެރުނު ފުރަތަމަ އެގާރައިގައި ލިވަޕޫލްގެ ޔާގެން ކްލޮޕް ވަނީ އުމުރުން 19 އަހަރުގެ މިޑްފީލްޑަރު ޓައިލާ މޯޓޮން ހިމަނައިފަ އެވެ. ރޭގެ މެޗުގެ ކުރިން ޓޮޓެޓެންހަމް ލީގުގައި ކުޅެން އޮތް ދެ މެޗާއި ޔޫއެފާ ކޮންފަރެންސް ލީގުގެ މެޗެއް ވަނީ ފަސްކޮށްފަ އެވެ. ޓޮޓެންހަމްގައި މިދިޔަ ދެ ހަފްތާ ހަލުވިކަމާ އެކު ކޮވިޑް ފެތުރުނުއިރު ނުވަ ކުޅުންތެރިއަކު ޕޮޒިޓިވްވި އެވެ.

ރޭގެ މެޗުގެ ކުރީކޮޅު ޓޮޓެންހަމަށް ލީޑު ނަގައިދިނީ ހެރީ ކޭން އެވެ. އެކަމަކު ފުރަތަމަ ހާފު ނިމުމުގެ ކުރިން ޑިއޯގޯ ޖޯޓާގެ ގޯލުން ލިވަޕޫލް ވަނީ ނަތީޖާ އެއްވަރުކޮށްފަ އެވެ. 69 ވަނަ މިނެޓުގައި ލިވަޕޫލްގެ ދެ ވަނަ ލަނޑު ކާމިޔާބުކޮށްދިނީ ޑިފެންޑަރު އެންޑީ ރޮބާޓްސަން އެވެ. އެކަމަކު ގޯލްކީޕަރު އެލިސަން ބެކާ އަށް ހެދުނު ގޯހެއްގެ ފައިދާ ނަގައި ސޮން ހުން މިން ވަނީ 74 ވަނަ މިނެޓުގައި ޓޮޓެންހަމަށް ނަތީޖާ އެއްވަރުކޮށްދީފަ އެވެ. މެޗުގެ ފަހުކޮޅު ލިވަޕޫލަށް މައްސަލަތައް ދިމާވީ 77 ވަނަ މިނެޓުގައި ރޮބާޓްސަން އަށް ސީދާ ރަތް ކާޑެއް ދެއްކުމުންނެވެ. މިއީ ޓޮޓެންހަމްގެ އެމަސަން ރޯޔަލް އަށް ކުރި ނުރައްކާތެރި ފައުލަކަށް، ވީއޭއާރު ބެލުމަށް ފަހު ރެފްރީ ދެއްކި ރަތް ކާޑެކެވެ.

ރޭގެ މެޗަކީ ޓޮޓެންހަމާ ހަވާލުވުމަށް ފަހު އެންޓޯނިއޯ ކޮންޓޭގެ ކޯޗުކަމުގައި ލީގުގައި ބަލިނުވެ އެޓީމު ކުޅުނު ފަސް ވަނަ މެޗެވެ. 15 މެޗުން ލިބިފައިވާ 26 ޕޮއިންޓާ އެކު ޓޮޓެންހަމް އޮތީ ތާވަލުގެ ހަތް ވަނައިގަ އެވެ.