ގޯލްޑަން ފުޓްސަލް ޗެލެންޖަށް ހޫނު ތަރުހީބެއް، މިފަހަރު 91 ޓީމު

ސިޓީ ތަކަށާއި ރަށްތަކަށް ހުޅުވާލައިގެން ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ކަމަށްވާ ގޯލްޑަން ފުޓްސަލް ޗެލެންޖަށް ބޮޑު ތަރުހީބެއް ލިބި އަންނަ އަހަރުގެ މުބާރާތުގައި 91 ޓީމަކުން ވާދަކުރާނެކަމަށް ގޯލްޑަން ފުޓްސަލް އެސޯސިއޭޝަނުން ބުނެފި އެވެ.

މުބާރާތް ފެށުމަށް ހަމަޖެހިފައިވަނީ އަންނަ އަހަރުގެ ފެބްރުއަރީ 19 ވަނަ ދުވަހު އެވެ. 91 ޓީމު ބައިވެރިވުމާ އެކު މުބާރާތް އެއް މަހަށް ވުރެ ދިގުވާނެ އެވެ. ކޮވިޑާ ގުޅިގެން މިދިޔަ އަހަރާއި މިއަހަރު ގޯލްޑަން ފުޓްސަލް މުބާރާތް ބޭއްވޭގޮތެއްނުވި އެވެ.

އަންނަ އަހަރުގެ މުބާރާތް ވެސް ކުރިއަށް ދާނީ އަށް ޒޯނަކަށް ބަހާލައިގެން އެންމެ ފުރަތަމަ އަތޮޅު ބުރު ކުޅޭ ގޮތަށެވެ. ރާއްޖޭގެ ކޮންމެ ރަށަކަށް އެއް ޓީމު ނަގަން ފުރުސަތުދޭއިރު މާލެ ސިޓީ އާއި ފުވައްމުލައް ސިޓީން ކޮންމެ އަވަށަކަށް މުބާރާތުގައި ވާދަކުރެވޭނެ އެވެ.

އަތޮޅު ބުރުގެ މެޗުތައް ދެ ގްރޫޕަކަށް ބަހާލައިގެން ކުޅޭނީ ހަ ޓީމު ނުވަތަ އެއަށް ވުރެ ގިނައިން ބައިވެރިވެފައިވާނަމަ އެވެ. މިފަހަރުގެ މުބާރާތުގައި ދެ ގްރޫޕަށް ބަހާލައިގެން ކުޅޭނީ ހއ، ހދ، ށ، ކ، އދ، މ، ތ، އަދި ގއ އަތޮޅުގެ މެޗުތަކެވެ. މުބާރާތުގައި އެއްވެސް ރަށަކުން ވާދަނުކުރަނީ ހަމައެކަނި ވ އަތޮޅުންނެވެ. އެއް ޓީމު ބައިވެރިވެފައިވާތީ ނ އަތޮޅު ކުޑަފަރީ އާއި ފުވައްމުލަކުން މާލެގަން މިހާރު ވަނީ ޒޯން ބުރަށް ކޮލިފައިވެފަ އެވެ.

އަތޮޅު ބުރުގެ މެޗުތަކަށް ފަހު ކުޅޭނީ ޒޯން ބުރުގެ މެޗުތަކެވެ. އަށް ޒޯން ހިމެނޭއިރު މާލެ ސަރަހައްދު ހިމަނާފައިވަނީ އެއް ޒޯނުގެ ގޮތުގަ އެވެ. އަދި ފުވައްމުލައް ސިޓީ އާއި އައްޑޫ ސިޓީއަކީ ވެސް އެއް ޒޯނެވެ. ކޮންމެ ޒޯނަކުން ޗެމްޕިއަން އަދި ރަނަރަޕް ގަދަ 16 އަށް ދަތުރުކުރާނެ އެވެ. ގަދަ 16 އިން ފެށިގެން މުބާރާތް ކުރިއަށްދާނީ ނޮކްއައުޓް އުސޫލުންނެވެ. ޓީމު ލިސްޓުގައި ޖެހޭނީ ހަމައެކަނި އެ ރަށަކަށް ނުވަތަ އަވަށަކަށް ނިސްބަތްވާ ކުޅުންތެރިންނެވެ.

އަތޮޅު ބުރާއި، ޒޯން ބުރު ނިމުމުން ޗެމްޕިއަން ޓީމާއި އެންމެ ގިނަ ލަނޑު ޖެހި ކުޅުންތެރިޔާ އަދި އެ ބުރެއްގެ އެންމެ މޮޅު ކުޅުންތެރިޔާ ހޮވައި ތައްޓާއި މެޑަލް ދޭނެ އެވެ. ޖުމްލަ 177 މެޗު ކުޅުމަށް ހަމަޖެހިފައިވާ މި މުބާރާތުގެ ޗެމްޕިއަން ޓީމަށް 65000 ރުފިޔާ ދޭއިރު ރަނަރަޕް ޓީމަށް 25000 ދޭގޮތަށް ވަނީ ހަމަޖެހިފަ އެވެ.

ގޯލްޑަން ފުޓްސަލް އެސޯސިއޭޝަނުން ބުނީ މިފަހަރުގެ މުބާރާތުގައި ވާދަކުރަން ބޭނުންވެގެން ގިނަ ރަށްތަކަކުން އެދުނު ކަމަށާއި، އެކަމަކު އުސޫލުގައި ހިފެހެއްޓުމުގެ ގޮތުން ބައިވެރިވުމުގެ ފުރުސަތު މިހާރު ބަންދުކޮށްފައިވާކަމަށެވެ. މިފަހަރުގެ މުބާރާތް ވެސް ކުރިއަށް ގެންދިއުމަށް ހަމަޖެހިފައިވަނީ ހުޅުމާލެ ރެހެންދި ފުޓްސަލް ދެ ދަނޑުގަ އެވެ. އެއީ މިހާރު ކްލަބް މޯލްޑިވްސް ކަޕް ވެސް ކުޅެމުން އަންނަ ދެ ދަނޑެވެ.

މިމުބާރާތުގެ ޗެމްޕިއަންކަން އެންމެ ފަހުން ހޯދީ ފައިނަލުގައި ބ. އޭދަފުށި ބަލިކޮށް ތ. ތިމަރަފުއްޓެވެ. 2015 ވަނަ އަހަރު ފެށި މުބާރާތުގެ ފުރަތަމަ ޗެމްޕިއަނުންނަކީ ބ. ހިތާދޫ އެވެ. 2016 ވަނަ އަހަރު ތިމަރަފުށި ޗެމްޕިއަންކަން ހޯދިއިރު 2017 ވަނަ އަހަރު ޗެމްޕިއަންކަން ހޯދީ މާލެ ހެންވޭރު އެވެ. 2018 ވަނަ އަހަރު މާލެ މާފަންނު ޗެމްޕިއަންކަން ހޯދިއިރު 2019 ވަނަ އަހަރު އަނެއްކާވެސް ތަށި ހޯދީ ތިމަރަފުއްޓެވެ.

ގޯލްޑަން ފުޓްސަލް އެސޯސިއޭޝަނުން ބުނީ މިއީ މުޅި ރާއްޖޭގެ ބައިވެރިވުން އޮތް މުބާރާތަކަށްވެފައި، މުބާރާތުގެ ތެރެއިން އިސްތިހާރު ކުރަން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާކަމަށެވެ.

 

މުބާރާތުގައި ވާދަކުރާ ޓީމުތައް

ޒޯން 1

ހއ: މާރަންދޫ، ބާރަށް، ހޯރަފުށި، ދިއްދޫ، ވަށަފަރު، މުރައިދޫ، އިހަވަންދޫ، ކެލާ

ހދ: ކުޅުދުއްފުށި، ފިނޭ، ކުމުންދޫ، ނައިވާދު، ނޭކުރެންދޫ، މަކުނުދޫ، ވައިކަރަދޫ، ނެއްލައިދޫ

ށ: މިލަންދޫ، ގޮއިދޫ، ބިލެތްފަހި، މަރޮށި، ފީވަށް، ކަނޑިތީމު، ކޮމަންޑޫ، ފޯކައިދޫ

 

ޒޯން 2

ނ: ކުޑަފަރި

ރ: އިނގުރައިދޫ، އިންނަމާދޫ، ދުވާފަރު

ބ: އޭދަފުށި، ހިތާދޫ، ތުޅާދޫ

 

ޒޯން 3

ޅ: ހިންވަރު، ކުރެންދޫ

ކ: ގުރައިދޫ، ގާފަރު، ކާށިދޫ، ތުލުސްދޫ، މާފުށި، ހުރާ

އއ: ބޮޑުފޮޅުދޫ، ރަސްދޫ، މަތިވެރި، ފެރިދޫ

 

ޒޯން 4

އދ: ފެންފުށި، އޮމަދޫ، ކުނބުރުދޫ، ހަންޏާމީދޫ، ދަނގެތި، މާމިގިލި

ވ: (އެއްވެސް ރަށަކުން ބައިވެރިއެއްނުވޭ)

މ: ދިއްގަރު، މަޑުއްވަރި، މުލި، މުލައް، ނާލާފުށި، ކޮޅުފުށި

 

ޒޯން 5

ފ: ނިލަންދޫ، ބިލެއްދޫ، މަގޫދޫ، ފީއަލި

ދ: ކުޑަހުވަދޫ، ބަނޑިދޫ

ތ: ތިމަރަފުށި، ގާދިއްފުށި، ކިނބިދޫ، އޮމަދޫ، ވޭމަންޑޫ، ބުރުނި

 

ޒޯން 6

ލ: ގަން، އިސްދޫ، ކަލައިދޫ، މާމެންދޫ

ގއ: ނިލަންދޫ، ކަނޑުހުޅުދޫ، ދާންދޫ، ކޮނޑޭ، މާމެންދޫ، ގެމަނަފުށި، ކޮލަމާފުށި، ދެއްވަދޫ

ގދ: މަޑަވެލި، ވާދޫ، ހޯނޑެއްދޫ، ގައްދޫ، ތިނަދޫ

 

ޒޯން 7

އައްޑޫ ސިޓީ: ފޭދޫ، މަރަދޫ

ފުވައްމުލައް ސިޓީ: މާލެގަން

 

ޒޯން 8

މާލެ ސިޓީ: މާފަންނު، ވިލިމާލެ، ހުޅުމާލެ، ހެންވޭރު