ކަރުތާފެނުގައި އޮތް އޯގްސްބާގް އަތުން ބަޔާން ބަލިވެއްޖެ

ޖަރުމަނު ބުންޑަސްލީގާގައި ރަށުން ބޭރުގައި އޯގްސްބާގްއާ ވާދަކުރި މެޗުން ޗެމްޕިއަން ބަޔާން ރޭ 1-2 އިން ބަލިވެއްޖެ އެވެ.

މިއީ ލީގުގައި ބަޔާން މިފަހަރު ބަލިވި ދެ ވަނަ މެޗެވެ. ލީގުގައި ކުޅުނު 12 މެޗުގެ ތެރެއިން ބަޔާން ނުވަ މެޗުން މޮޅުވިއިރު އެއްވަރުވީ އެއް މެޗުންނެވެ. މިހާރު ތާވަލުގެ އެއް ވަނައިގައި އެޓީމު އޮތީ 28 ޕޮއިންޓާ އެކު އެވެ. އެކަމަކު 11 މެޗުން 24 ޕޮއިންޓް ހޯދައި، ދެ ވަނައިގައި އޮތް ބޮރޫޝިއާ ޑޯޓްމަންޑް މި ހަފްތާ ކުޅޭ މެޗުން މޮޅުވެގެން ބަޔާންއާ އޮތް ފަރަގު ޕޮއިންޓަކަށް ކުޑަކުރެވޭނެ އެވެ.

Advertisement

ރޭގެ މޮޅާ އެކު އޯގްސްބާގް ވަނީ 15 ވަނަ އަށް ކުރިއަށް ޖެހިލާފަ އެވެ. ޖަރުމަނު ލީގުގައި 18 ޓީމު ވާދަކުރާއިރު ފުލުގައި އޮންނަ ދެ ޓީމު ރެލިގޭޓް ވާނެ އެވެ. 16 ވަނަ އަށް ދާ ޓީމު ޖެހޭނީ ރެލިގޭޝަން ޕްލޭއޮފް ކުޅޭށެވެ. ރޭގެ މެޗަށް ނުކުތްއިރު އޯގްސްބާގް އޮތީ ރެލިގޭޝަނާ ހިސާބުގަ އެވެ.

މެޗުގެ ފުރަތަމަ ހާފުގައި އޯގްސްބާގުން ވަނީ ދެ ގޯލުގެ ލީޑެއް ނަގައިފަ އެވެ. ފުރަތަމަ ލަނޑު 23 ވަނަ މިނެޓުގައި މެޑްސް ޕެޑަސަން ޖެހިއިރު ދެ ވަނަ ލަނޑު 35 ވަނަ މިނެޓުގައި ޖެހީ އަންދްރޭ ހާން އެވެ. އޭގެ ތިން މިނެޓު ފަހުން ބަޔާންގެ ހަމައެކަނި ލަނޑު ކާމިޔާބުކޮށްދިނީ ރޮބާޓް ލެވަންޑޯސްކީ އެވެ. ރޭގެ މެޗުގެ ކުރިން ލީގުގައި ކުޅުނު ހަތަރު މެޗުން ވެސް ބަޔާން ވަނީ މޮޅުވެފަ އެވެ.

“އޯގްސްބާގަށް ލިބުނީ ހައްގު މޮޅެއް ނޫން. ބަޔާންގެ ކޯޗުގެ ގޮތުގައި މިއީ އަހަރެން މާޔޫސްވި ފުރަތަމަ ފަހަރު. ވަރަށް ހިތްހަމަނުޖެހިފަ މިހުރީ” މި ސީޒަނުގައި ބަޔާންގެ ކޯޗުކަމާ ހަވާލުވި ހޫލިއަން ނާގެލްސްމަން މެޗަށް ފަހު ބުންޏެވެ.

މުޅި މެޗު ބަޔާނުން ޑޮމިނޭޓްކޮށްގެން ކުޅުނުއިރު އެޓީމަށް ދިމާވީ ގޯލު ނުޖެހުމުގެ މައްސަލަ އެވެ. ނާގެލްސްމަން ވަނީ ނަތީޖާ ނެރުމަށް ބަޔާންގެ ކުޅުންތެރިން އެކަށީގެންވާ ވަރަށް މަސައްކަތް ނުކުރާކަމަށް ބުނެފަ އެވެ.

ރޭގެ މެޗަކީ ޖަރުމަނުގެ ފޯވާޑް ތޯމަސް މުލާ ބަޔާންގެ ޓީމަށް ކުޅެދިން 600 ވަނަ މެޗެވެ. މުލާ އަށް ހާއްސަ މެޗަކުން ބަޔާން ބަލިވިއިރު ކޮވިޑާ ގުޅިގެން އެޓީމުގެ ތިން ކުޅުންތެރިއަކު ރޭގެ ޓީމުގައި ނުހިމެނެ އެވެ. އޭގެތެރޭގައި މުހިއްމު މިޑްފީލްޑަރު ޖޯޝުއާ ކިމިޗް ހިމެނެ އެވެ.

Advertisement