ފުރަތަމަ މެޗުގައި ބަންގްލަދޭޝް އިން ލަންކާ ބަލިކޮށްފި

ސާފް ޗެމްޕިއަންޝިޕްގެ ފުރަތަމަ މެޗުގައި މިއަދު ހަވީރު 1-0 އިން ސްރީ ލަންކާ ބަލިކޮށް ބަންގްލަދޭޝް އިން ފެށުން ރަނގަޅުކޮށްފި އެވެ.

ބަންގްލަދޭޝް އިން މުބާރާތަށް ނުކުތީ ކުރިން ރާއްޖޭގެ ނިއު ރޭޑިއަންޓުގައި ގިނަ ކާމިޔާބީތަކެއް ހޯދި އޮސްކާ ބްރުޒޮންގެ ކޯޗުކަމުގަ އެވެ. 2017 ވަނަ އަހަރާއި 2018 ވަނަ އަހަރުގެ ކުރީކޮޅާ ހަމައަށް ނިއުގައި ގިނަ ކާމިޔާބީތަކެއް ހޯދުމަށް ފަހު އޮސްކާ ބަދަލުވީ ބަންގްލަދޭޝްގެ ބަޝުންދަރާ ކިންގްސް އަށެވެ. އެ ކްލަބުގެ ކޯޗުގެ ގޮތުގައި ހުރެ ސްޕެއިނަށް އުފަން ކޯޗު ބަންގްލަދޭޝްގެ ގައުމީ ޓީމާ ހަވާލުވީ ސާފް ޗެމްޕިއަންޝިޕަށެވެ.

Advertisement

ބަންގްލަދޭޝްގެ ގިނަ އަދަދެއްގެ ސަޕޯޓަރުންގެ ތަރުހީބާ އެކު ކުޅެމުން ދިޔަ މެޗުގެ ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ނުޖެހި އެވެ. މި ހާފުގައި މާ ގިނަ ހަމަލާތަކެއް ނުފެނުނުއިރު މެޗު ޑޮމިނޭޓްކޮށްގެން ބޮޑަށް ކުޅުނީ ބަންގްލަދޭޝް އިންނެވެ. ބަންގްލަދޭޝް އިން މި ހާފުގައި އެންމެ ނުރައްކާތެރި ހަމަލާ ފޮނުވާލީ ފުރަތަމަ ހާފުގެ ފަހުކޮޅު އެވެ. އެޓީމުގެ ޔާސީން އަރަފާތު އަރިމަތިން ނަގައިދިން ހުރަސް ތޯޕޫ ބަރްމަން ބޮލުން ޖެހުމުން އެ ބޯޅަ ލަންކާގެ ގޯލްކީޕަރު ސުޖަން ޕެރޭރާ ވަނީ އަތުން ޖައްސައި ކޯނަރަކަށް ބޭރުކޮށްލައިފަ އެވެ.

މެޗުގެ ދެ ވަނަ ހާފު ފެށިގެން ފުރަތަމަ ހަމަލާ ފޮނުވާލީ ލަންކާއިންނެވެ. އެޓީމުގެ ކަވިންދޫ އިޝާން ހާފު މެދުން ކީޕަރު ބޯމަތިން ގޯލަށް ފޮނުވާލި ބޯޅަ ދިޔައީ ހުރަސް ދަނޑި މަތިން ބޭރަށެވެ. ހަމަލަތާއް މަދުވި ނަމަވެސް ދެ ވަނަ ހާފުގައި ބަންގްލަދޭޝް އިން ދިޔައީ ގިނައިރު ބޯޅަ ހިފަހައްޓައިގެން ކުޅެމުންނެވެ. މެޗުގައި އެޓީމުގެ ހަމައެކަނި ލަނޑު ލިބުނު ޕެނަލްޓީއަކުން 56 ވަނަ މިނެޓުގައި ކާމިޔާބުކޮށްދިނީ ޑިފެންޑަރު ތޯޕޫ އެވެ. މިއީ ލަންކާގެ ކުޅުންތެރިއެއް އޭރިޔާ ތެރެއިން ބޯޅައިގައި އަތުން ޖެއްސުމުން ރެފްރީ ދިން ޕެނަލްޓީއެކެވެ. ޕެނަލްޓީ ދިނުމުން ލަންކާ ކުޅުންތެރިން ވަނީ ރެފްރީ ވަށާލައި ވަރަށް ބޮޑަށް ޝަކުވާކޮށްފަ އެވެ.

ލީޑަށް ފަހު ވެސް ބަންގްލަދޭޝް އިން ވަނީ ކޮންމެވެސް ވަރަކަށް ފުރުސަތުތައް ތަނަވަސްކޮށްފަ އެވެ. އެކަމަކު ލިބުނު ޗާންސްތައް އެޓީމަށް ގޯލަކަށް ބަދަލެއް ނުކޮށްލެވުނެވެ. ހާއްސަކޮށް މެޗުގެ ފަހުކޮޅު އެޓީމުން ގިނަ ހަމަލާތަކެއް ލަންކާ ގޯލަށް ފޮނުވާލިއިރު ކީޕަރު ސުޖަން ވަނީ ބައެއް ހަމަލާތައް މަތަކޮށްފަ އެވެ.

13 ވަނަ ސާފް ޗެމްޕިއަންޝިޕް ފެށުމުގެ ރަސްމިއްޔާތު އޮންނާނީ މިރޭ ނޭޕާލާ ރާއްޖެ ކުޅޭ މެޗުގެ ކުރިންނެވެ. މިއީ ހަމައެކަނި ރާއްޖެ ހޯސްޓެއްގެ ގޮތުގައި މި މުބާރާތް ބާއްވާ ފުރަތަމަ ފަހަރެވެ. 2018 ވަނަ އަހަރު ބަންގްލަދޭޝްގައި އޮތް މުބާރާތް ކާމިޔާބުކުރީ ރާއްޖޭންނެވެ.

ނޭޕާލް އާއި ރާއްޖެ ވާދަކުރާ މެޗު ފަށާނީ މިރޭ 9 ޖަހާއިރު އެވެ.

Advertisement