މި ގައުމުގަ އިރާދަކުރެއްވިއްޔާ އަޅުގަނޑުމެން މިކަން ކުރާނަން: އަކްރަމް

އަމިއްލަ ސަޕޯޓަރުން ކުރިމަތީ ސާފް ޗެމްޕިއަންޝިޕްގެ ތަށި އިރާދަކުރެއްވިއްޔާ ހޯދާނެކަމަށް ރާއްޖޭގެ ގައުމީ ފުޓްބޯޅަ ޓީމުގެ ނަމޫނާ ކެޕްޓަން އަކްރަމް އަބްދުލްގަނީ (އަކޫ) ބުނެފި އެވެ.

ސާފް ޗެމްޕިއަންޝިޕްގެ ކުޅުން މިއަދު ހަވީރު ފަށާއިރު ފުރަތަމަ މެޗުގައި ބައްދަލުކުރާނީ ސްރީ ލަންކާ އާއި ބަންގްލަދޭޝް އެވެ. ރާއްޖޭގެ ފުރަތަމަ މެޗުގައި މިރޭ ނުކުންނާނީ ނޭޕާލާ ދެކޮޅަށެވެ. މެޗުގެ ކުރިން އިއްޔެ އޮތް ނޫސްވެރިންގެ ބައްދަލުވުމުގައި އަކްރަމް ބުނީ އަމިއްލަ ގައުމުގައި ކުޅުމަކީ ހުރިހާ ގޮތަކުން ވެސް އެޑްވާންޓޭޖެއް ކަމަށާއި، ސަޕޯޓަރުން ކުރިމަތީ ތަށި ދިފާއުކުރުމުގެ އުއްމީދު ބޮޑުކަމަށެވެ.

2018 ވަނަ އަހަރު ބަންގްލަދޭޝްގައި އޮތް ސާފް ސުޒުކީ ކަޕް ރާއްޖޭން ކާމިޔާބުކުރިއިރު ސެމީ ފައިނަލުގައި ނޭޕާލް އަތުން 3-0 އިން ރާއްޖެ ވަނީ މޮޅުވެފަ އެވެ. މެޗުގެ ތިން ގޯލުގެ ތެރެއިން އެއް ގޯލު ކާމިޔާބުކުރީ އަކްރަމެވެ. ސާފް ޗެމްޕިއަންޝިޕްގެ ތާރީހަށް ބަލާއިރު ރާއްޖެ އަތުން ނޭޕާލަށް އަދި މޮޅެއް ނުލިބެ އެވެ. އެކަމަކު އުމުރުފުރާތަކުގެ މެޗުތަކުގައި ނޭޕާލް އުޅެނީ ރާއްޖެއަށް ވުރެ ކުރީގަ އެވެ. މެޗަށް ނުކުންނަ ނޭޕާލް ޓީމުގައި އެގައުމުގެ ޒުވާން ޓީމުތަކަށް ކުޅުނު ކުޅުންތެރިން މިފަހަރު ސްކޮޑުގައި ވަނީ ހިމަނާފަ އެވެ.

“އަޅުގަނޑު ދެކޭގޮތުގައި ނޭޕާލުގައި ޔަންގް ޕްލެޔަރުން ގިނެވެގެން އެޑްވާންޓޭޖެއް ވަކި އަޅުގަނޑުމެންނަށް ވުރެ ބޮޑަކަށް ނޯންނާނެ. އެއީ އަޅުގަނޑުމެން ގައުމުގަ މި ކުޅެނީ. އަޅުގަނޑުމެން ވެސް އޮތީ މެޖޯރިޓީގެ ގޮތުން ވަރަށް ޔަންގް ޓީމެއް. ސީނިއާ ހައެއްކަ ޕްލެޔަރުން މިތިބީ. އަޅުގަނޑު ދެކޭގޮތުގައި ހުރިހާ ގޮތަކުން ވެސް މިއީ ވަރަށް ބޮޑު އެޑްވާންޓޭޖެއް އަމިއްލަ ގައުމުގައި ކުޅޭތީވެ. އެކަމަކު އެއްވެސް ވަރަކަށް ނޭޕާލް ޓީމު ދެރަކޮށްލަނީކީ ނޫން” ނޭޕާލުގެ ޒުވާން ކުޅުންތެރިންނާ އެއްވަރަށް ރާއްޖޭގައި ވެސް ޒުވާން ކުޅުންތެރިން ތިބިކަން ހާމަކުރަމުން އަކްރަމް ބުންޏެވެ.

އަކްރަމަކީ ރާއްޖޭން ސަރަހައްދީ މުބާރާތް ކާމިޔާބުކުރި ދެ ފަހަރު ވެސް ގައުމީ ޓީމުގައި ހިމެނުނު ކުޅުންތެރިއެކެވެ. މިފަހަރުގެ މުބާރާތް އަކްރަމްގެ ކެޕްޓަންކަމުގައި ކާމިޔާބުކުރެވިއްޖެ ނަމަ އޭނާ ވެގެންދާނީ ގައުމީ ޓީމުގެ އެންމެ ކާމިޔާބު ކުޅުންތެރިޔާއަށެވެ. ތައްޓަށް ދިއުމަށް މުޅި ޓީމާ އެކު އަކްރަމަށް ލިބޭ ހިތްވަރަކީ ދިވެހި ސަޕޯޓަރުންނެވެ. މީގެ ކުރިން ވެސް ގަލޮޅު ދަނޑުގައި ކުޅުނު މެޗުތަކުގައި ނަތީޖާ ނެރުމުގައި ތަފާތުދެއްކީ ދިވެހިންގެ 12 ވަނަ ކުޅުންތެރިޔާ އެވެ.

ނޫސްވެރިންގެ ބައްދަލުވުމުގައި އަކްރަމް ވަނީ ދިވެހިންނަށް އުއްމީދެއްދީފަ އެވެ.

“އަޅުގަނޑުމެންނަށް ނުވާވަރު ކަމެއް ނޫނޭ މީކީ. މި ގައުމުގަ އިރާދަކުރެއްވިއްޔާ އަޅުގަނޑުމެން މިކަން ކުރާނަން” ނިންމާލަމުން އަކްރަމް ބުންޏެވެ.

ސާފް ޗެމްޕިއަންޝިޕް މުބާރާތުގެ ފައިނަލް މެޗު އޮންނާނީ މި މަހުގެ 16 ވަނަ ދުވަހު އެވެ. މިރޭ ރާއްޖެ ކުޅޭ މެޗަށް ފަހު ދެ ވަނަ މެޗުގައި ބަންގްލަދޭޝްއާ ދެކޮޅަށް ރާއްޖެ ނުކުންނާނީ މި މަހުގެ ހަތް ވަނަ ދުވަހު އެވެ. 10 ވަނަ ދުވަހު ސްރީ ލަންކާއާ ދެކޮޅަށް ނުކުންނައިރު ލީގު ބުރުގެ ފަހު މެޗުގައި މި މަހުގެ 13 ވަނަ ދުވަހު ރާއްޖެ ނުކުންނާނީ އިންޑިއާއާ ދެކޮޅަށެވެ.

ނޭޕާލާ ރާއްޖެ ވާދަކުރާ މެޗު ފަށާނީ މިރޭ 9 ޖަހާއިރު އެވެ.