ޝެޑިއުލަށް ގެނައި ބަދަލާ އެކު ސާފް ޗެމްޕިއަންޝިޕް ދިގުލައިފި

އޮކްޓޫބަރު މަހު ރާއްޖޭގައި ބޭއްވުމަށް ހަމަޖެހިފައިވާ ސާފް ޗެމްޕިއަންޝިޕް ފުޓްބޯޅަ މުބާރާތުގެ ޝެޑިއުލަށް ބަދަލުގެނައުމާ އެކު މުބާރާތް ދިގުލައިފި އެވެ.

ސަރަހައްދީ ފުޓްބޯޅަ މުބާރާތް ކުރިއަށްގެންދަން ކުރިން ޝެޑިއުލްކޮށްފައި އޮތީ އަންނަ އޮކްޓޫބަރު މަހުގެ 1 އިން 13 އަށެވެ. އެކަމަކު އަލަށް އާއްމުކުރި ޝެޑިއުލްގައި މުބާރާތް ކުރިއަށްދާނީ އޮކްޓޫބަރު މަހުގެ 1 އިން 16 އަށެވެ. މުބާރާތުގެ ޝެޑިއުލަށް ބަދަލު ގެނައީ ފީފާގެ ގަވައިދަށް ފެއްތުމުގެ ގޮތުން ދެ މެޗު ދޭތެރޭ ކޮންމެ ޓީމަކަށް ތިން ދުވަހުގެ ރެސްޓެއް ދިނުމުގެ ގޮތުންނެވެ.

Advertisement

ކުރީގެ ޝެޑިއުލްގައިވާގޮތުން ދެ މެޗު ދޭތެރޭ ކޮންމެ ޓީމަކަށް ތިން ދުވަހުގެ ރެސްޓެއް ނުލިބެ އެވެ. އެކަމަކު އާ ބަދަލާ އެކު ޓީމުތަކުން މެޗުތައް ކުޅޭނީ ކޮންމެ ތިން ދުވަހަކުންނެވެ. އެފްއޭއެމްގެ ޖެނެރަލް ސެކްރެޓަރީ ހުސައިން ޖަވާޒް “އަދަދު” ނޫހަށް ދެއްވި އިންޓަވިއުއެއްގައި ވިދާޅުވީ ޝެޑިއުލަށް ގެނެވުނު ބަދަލާ އެކު ޓީމުތަކަށް ދެ މެޗު ދޭތެރޭ ރަނގަޅު ރިކަވަރީއެއް ހެދޭނެ ކަމަށެވެ.

ފަހުން އާއްމުކުރި ޝެޑިއުލްގައި ވެސް މުބާރާތުގެ ފުރަތަމަ މެޗުގައި އޮކްޓޫބަރު އެއް ވަނަ ދުވަހު ކުޅޭނީ ރާއްޖެ އާއި ނޭޕާލް އެވެ. ރާއްޖެ ކުޅޭ ދެ ވަނަ މެޗުގައި އޮކްޓޫބަރު ހަތް ވަނަ ދުވަހު ނުކުންނާނީ ބަންގްލަދޭޝްއާ ދެކޮޅަށެވެ. ތިން ދުވަސް ފަހުން އޮކްޓޫބަރު 10 ވަނަ ދުވަހު ސްރީ ލަންކާއާ ކުޅޭއިރު ގްރޫޕް ސްޓޭޖުގެ ފަހު މެޗުގައި އޮކްޓޫބަރު 13 ވަނަ ދުވަހު ރާއްޖެއާ ދެކޮޅަށް ނުކުންނާނީ އިންޑިއާ އެވެ. އެންމެ ގިނަ ޕޮއިންޓް ހޯދާ ދެ ގައުމުގެ މެދުގައި ފައިނަލް މެޗު ކުޅުމަށް ހަމަޖެހިފައިވަނީ އޮކްޓޫބަރު 16 ވަނަ ދުވަހު އެވެ.

2018 ވަނަ އަހަރުގެ ސާފް ޗެމްޕިއަންޝިޕްގެ ފައިނަލުގައި 2-1 އިން އިންޑިއާ ބަލިކޮށް ޗެމްޕިއަންކަން ހޯދީ ރާއްޖެ އެވެ. ރާއްޖޭން ވަނީ އެންމެ ފަހުގެ ސާފް ޗެމްޕިއަންޝިޕްގެ އިތުރުން 2008 ވަނަ އަހަރުގެ މުބާރާތް ކާމިޔާބުކޮށްފަ އެވެ. މިފަހަރުގެ މުބާރާތަކީ ސާފްގެ ތާރީހުގައި ރާއްޖޭގައި މުބާރާތް ބާއްވާ ދެ ވަނަ ފަހަރެވެ. މީގެ ކުރިން 2008 ވަނަ އަހަރު ރާއްޖޭގައި މުބާރާތް ބޭއްވީ ލަންކާއާ ގުޅިގެންނެވެ.

ސާފް ޗެމްޕިއަންޝިޕަށް ތައްޔާރުވުމަށް 31 ކުޅުންތެރިންގެ ގައުމީ ޕްރިލިމިނަރީ ސްކޮޑް އިއްޔެ ވަނީ އެކުލަވާލައިފަ އެވެ. މުބާރާތަށް ރާއްޖޭން ތައްޔާރުވާއިރު ގައުމީ ޓީމުގެ ކޯޗިން ޓީމުގައި މިފަހަރު ހިމެނެނީ ހުސް ދިވެހިންނެވެ. ގައުމީ ޓީމުގެ ކޯޗަކަށް ހަމަޖެއްސީ ރާއްޖޭގެ އެންމެ ކާމިޔާބު ކޯޗު އަލީ ސުޒޭން އެވެ. ސުޒޭންއާ އެކު އެސިސްޓެންޓް ކޯޗުންނަށް ހަމަޖެއްސީ މިދިޔަ ދެ ސީޒަނުގައި ދަ ގްރާންޑޭ ސްޕޯޓްސް ކްލަބަށް ކޯޗުކޮށްދިން އިސްމާއީލް މަހުފޫޒް (އިންމަ) އަދި ރާއްޖޭގައި އުފެދުނު އެންމެ މޮޅު ގޯލްކީޕަރު އިމްރާން މުހައްމަދު އެވެ. އެސިސްޓެންޓް ކޯޗުގެ ޒިންމާއާ އެކު ގޯލްކީޕިން ކޯޗެއްގެ ގޮތުގައި ވެސް އިމްރާން މަސައްކަތްކުރާނެ އެވެ. ގޯލްކީޕިންގް ކޯޗުގެ ގޮތުގައި ދެން ހަމަޖެއްސީ އަސްލަމް އަބްދުއްރަހީމް އެވެ. މިފަހަރު ޓީމުގެ ޑޮކްޓަރަކަށް ހަމަޖެއްސީ ޑރ. އަބްދުﷲ ރާފިއު އެވެ.

ރާއްޖޭގެ އިތުރުން ސާފް ޗެމްޕިއަންޝިޕްގައި ވާދަކުރާނީ އިންޑިއާ، ބަންގްލަދޭޝް، ސްރީ ލަންކާ އަދި ނޭޕާލް އެވެ. މިފަހަރުގެ މުބާރާތުގައި ވާދަނުކުރަނީ ކޮވިޑްގެ ސަބަބުން ދަތުރުފަތުރު ކުރުމުގައި އުނދަގޫތަކެއް ހުރި ބޫޓާން އާއި ފީފާގެ ސަސްޕެންޝަނުގައި އޮތް ޕާކިސްތާން އެވެ.

Advertisement