އީގަލްސް ބަލިކޮށް ބެންގަލޫރު ގްރޫޕް ސްޓޭޖަށް

ޕްލޭއޮފް މެޗުގައި ކްލަބް އީގަލްސް 1-0 އިން ބަލިކޮށް އޭއެފްސީ ކަޕްގެ ދެކުނު އޭޝިއާ ސަރަހައްދަށް ނިސްބަތްވާ ގްރޫޕުން އިންޑިއާގެ ބެންގަލޫރު އެފްސީ ފުރުސަތު ހޯދައިފި އެވެ.

ބެންގަލޫރު އަތުން ބަލިވުމުން އޭއެފްސީ ކަޕްގެ ގްރޫޕް ސްޓޭޖުގައި ފުރަތަމަ ފަހަރަށް ކުޅުމުގެ ފުރުސަތު އީގަލްސް އަށް ވަނީ ގެއްލިފަ އެވެ. ބެންގަލޫރާ އެކު އޭއެފްސީ ކަޕްގެ ގްރޫޕް ޑީގައި ވާދަކުރާނީ ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނާއި އިންޑިއާގެ އޭޓީކޭ މޯހަން ބަގާންގެ އިތުރުން ބަންގްލަދޭޝްގެ ޗެމްޕިއަން ބަޝުންދުރާ ކިންގްސް އެވެ.

މިރޭ މެޗުގައި އަލީ އަޝްފާގް (ދަގަނޑޭ) އީގަލްސްގެ ޓީމުގައި ހިމަނާފައެއްނުވެ އެވެ. އެންމެ ފަހު ވަގުތު ދަގަނޑޭ ޓީމުގައި ނުހިމެނީ ބަލިކޮށް އުޅޭތީ ކަމަށް ވަނީ މައުލޫމާތު ލިބިފަ އެވެ. އީގަލްސްގެ ފުރަތަމަ އެގާރައިގައި ހިމެނީ ގޯލްކީޕަރު މުހައްމަދު ފައިސަލް، ހުސައިން ޝިފާއު (ކުރޯ)، އަހުމަދު ނޫމާން (ހެލްމެޓް). އަކްރަމް އަބްދުލްގަނީ (އަކޫ)، ހައިޝަމް ހަސަން (ބިޑި)، މުހައްމަދު އާރިފް (ބަކާ)، އަސްހަދު އަލީ (އަޑޭ)، އިސްމާއީލް އީސާ (މެސީ)، އަލީ ފާސިރު (ސެންޓޭ)، މުހައްމަދު ނާއިމް އަދި ހަސަން ރާއިފް އަހުމަދު (ހަންނަ) އެވެ.

މެޗު ފަށައިގެން ފުރަތަމަ ފަސް މިނެޓު ބެންގަލޫރުން ވަނީ ބޯޅަ ހިފަހައްޓައިގެން މޮޅަށް ކުޅެފަ އެވެ. އެޓީމުގެ ފުރަތަމަ ހަމަލާ ފެނުނީ 11 ވަނަ މިނެޓުގަ އެވެ. ކޯނަރެއްގައި އުފެއްދި ހަމަލާއެއްގައި އޭރިޔާތެރެއިން ރޮންދޫ މުސާވީ ކިންގް ބޮލުން ޖެހި ބޯޅަ ދިޔައީ ކީޕަރު ފައިސަލް އަތަށެވެ. އޭގެ މިނެޓެއް ފަހުން ކެޕްޓަން ސުނިލް ޗެތުރީ ނަގައިދިން ހުރަހެއްގައި ބްރެޒިލްގެ ފޯވާޑް ކްލެއިޓަން އޮގަސްޓޯ އަށް ގޯލު ޖަހާނެ ހުސް ފުރުސަތެއް ލިބުނެވެ. އޭރިޔާތެރޭ ހުސްކޮށްހުރެ އޮގަސްޓޯ ފޮނުވާލި ބޯޅަ ދިޔައީ މަތިންނެވެ.

ބެންގަލޫރުގެ ހަމަލާތަކަށް ފަހު އީގަލްސް އިން ވަނީ ކުޅުން ރަނގަޅުކޮށްފަ އެވެ. އެގޮތުން އެޓީމުން އުފެއްދި ހަމަލާއެއްގައި މެސީ ގޯލުގެ ތެރެއަށް ބޯޅަ ވައްދާލިއިރު އޭނާ އެވަގުތު ހުރީ އޮފްސައިޑްގަ އެވެ. 24 ވަނަ މިނެޓުގައި އޮގަސްޓޯ ގޯލަ އަމާޒުކޮށްލި ބޯޅަ ކީޕަރު ފައިސަލް ވަނީ މަތަކޮށްފަ އެވެ. ބެންގަލޫރުން މެޗުގައި ލީޑު ނެގީ 26 ވަނަ މިނެޓުގައި މިޑްފީލްޑަރު ޖަޔޭޝް ރަނޭ ޖެހި ލަނޑުންނެވެ. ބެންގަލޫރަށް ލިބުނު އެއްލުމެއްގައި އޭރިޔާ ތެރެއަށް އައި ބޯޅަ ބަކާ ބޮލުގައި ޖެހިފައި ރަނޭ އަށް ލިބުމުން އޭނާ ވަނީ އެއް ފަހަރުން ޖަހައި ގޯލުގެ ތިރީ ކަނަށް ބޯޅަ ވައްދާލައިފަ އެވެ. މި ބޯޅަ ބްލޮކްކުރަން އީގަލްސްގެ ދެ ކުޅުންތެރިއަކު ވަނީ މަސައްކަތްކޮށްފަ އެވެ.

ބެންގަލޫރުން ލީޑު ނެގުމުން ފުރަތަމަ ހާފުގެ ބާކީ ބައިގައި އީގަލްސް އިން ވަނީ ކުޅުން ރަނގަޅުކޮށް ގޯލު ޖަހާނެ ފުރުސަތުތައް ތަނަވަސްކޮށްފަ އެވެ. މެޗުގެ 36 ވަނަ މިނެޓުގައި މެސީ އޭރިޔާ ތެރެއަށް ހުރަސްކޮށްލި ބޯޅަ އަޑޭ އަށް ލައްވާ ނުލުމުން ގޯލަށް ވައްދާލެވޭގޮތެއްނުވި އެވެ. އެ ބޯޅަ ދިޔައީ ގޯލު ހުރަސްވެގެންނެވެ. ފުރަތަމަ ހާފު ނިމެން މިނެޓަކަށް ވެފައިވަނިކޮށް އީގަލްސްގެ ނާއިމް ނެގި ކޯނަރެއްގައި ބެންގަލޫރުގެ ޑިފެންޑަރަކު ބޯޅަ ދިފާއުކުރަން ޖައްސާލި ވަގުތު ކީޕަރު ގައިގައި ޖެހިފައި ގޯލަށް ނުވަނީ ކިރިޔާ އެވެ. އެ ބޯޅަ ކީޕަރު އަތުގައި ޖެހިފައި ގޯލުގެ ދަނޑި ކައިރިން ދިޔައީ ކޯނަރަކަށް ބޭރަށެވެ.

ދެ ވަނަ ހާފު ފަށައިގެން އީގަލްސް އިން ބޯޅަ ހިފަހައްޓައިގެން ގިނަވަގުތު ކުޅުނުއިރު ބެންގަލޫރުން ދިޔައީ ކައުންޓަ އެޓޭކުގައި ހަމަލާ އުފައްދަމުންނެވެ. މި ހާފުގައި ބެންގަލޫރުން ބޮޑަށް މަސައްކަތްކުރީ ލީޑު ހިފަހައްޓައިގެން ބޮޑަށް ޑިފެންސަށް ވިސްނައިގެން ކުޅުމަށެވެ. މި ހާފުގައި އީގަލްސްގެ އެންމެ ނުރައްކާތެރި ހަމަލާ 66 ވަނަ މިނެޓުގައި އުފެއްދީ ސެންޓޭ އެވެ. ބެންގަލޫރުގެ ޑިފެންސުގެ ތެރެއިން ހަންނަ ދިން ބޯޅަ ހޯދައި ބެންގަލޫރުގެ ދެ ޑިފެންޑަރުން ކަޓުވާލުމަށް ފަހު ސެންޓޭ ގޯލުގެ ތިރީ ކަނަށް ފޮނުވާލި ބޯޅަ ދަނޑި ކައިރިން ދިޔައީ ބޭރަށެވެ. ބަދަލު ކުޅުންތެރިއެއްގެ ގޮތުގައި ކުޅެން ނުކުމެ 83 ވަނަ މިނެޓުގައި ބެންގަލޫރުގެ ލިއޯން އޮގަސްޓިން ހުސްކޮށްހުރެ ގޯލާ އަމާޒުކޮށްލި ބޯޅަ ދިޔައީ ހުރަސްދަނޑި މަތިން ބޭރަށެވެ. މެޗު ނިމެން މިނެޓަކަށް ވެފައިވަނިކޮށް ސެންޓޭ ފޮނުވާލި ބޯޅަ ދިޔައީ ގޯލުގެ މާ މަތިން ބޭރަށެވެ.

ގަލޮޅު ދަނޑުގައި ގްރޫޕް ސްޓޭޖުގެ މެޗުތައް އޮންނާނީ މި މަހުގެ 18، 21 އަދި 24 ވަނަ ދުވަހު އެވެ.

އޭއެފްސީ ކަޕްގެ ގްރޫޕް ޑީގެ މެޗުތައް

18 އޮގަސްޓް 2021

މޯހަން ބަގާން – ބެންގަލޫރު (16:00)

ބަޝުންދުރާ – މާޒިޔާ (21:00)

21 އޮގަސްޓް 2021

ބެންގަލޫރު – ބަޝުންދުރާ (16:00)

މާޒިޔާ – މޯހަން ބަގާން (21:00)

24 އޮގަސްޓް 2021

މޯހަން ބަގާން – ބަޝުންދުރާ (16:00)

މާޒިޔާ – ބެންގަލޫރު (21:00)