ރެއާލަށް ގަދަ ފެށުމެއް، އަދިވެސް މީހަކީ ބެންޒެމާ

ސްޕެނިޝް ލީގުގައި ރޭ ކަރީމް ބެންޒެމާ ޖެހި ދެ ލަނޑާ އެކު ރަށުން ބޭރުގައި ރެއާލް މެޑްރިޑުން 4-1 އިން އަލަވޭސް ބަލިކޮށްފި އެވެ.

ރޭގެ މެޗަކީ ރެއާލްގެ ކޯޗުކަމާ ކާލޯ އަންޗެލޮޓީ އަލުން ހަވާލުވުމަށް ފަހު ކުޅުނު ވާދަވެރި ފުރަތަމަ މެޗެވެ. މިދިޔަ ސީޒަނުގައި އަންޗެލޮޓީ ފެނުނީ އިނގިރޭސި ކްލަބްގެ އެވަޓަން އިންނެވެ.

Advertisement

މެޗުގެ ފުރަތަމަ އެގާރައިގައި ރެއާލުން ވަނީ އެޑެން ހަޒާޑާއި ގަރެތު ބޭލް ހިމަނައިފަ އެވެ. ރެއާލްގައި ވިދުން ފަނޑުވެ މިދިޔަ ސީޒަނުގައި ބޭލް ކުޅުނީ ޓޮޓެންހަމް ހޮޓްސްޕާސް އަށެވެ. މީގެ އިތުރުން ބަޔާން މިއުނިކުން ހިލޭ ޓްރާންސްފާއެއްގައި ރެއާލާ ގުޅުނު އޮސްޓްރިއާގެ ޑޭވިޑް އަލާބާ ވެސް ރޭ ވަނީ ފުރަތަމަ އެގާރައިގައި ހިމެނިގެން ކުޅެފަ އެވެ.

ހަޒާޑްގެ އެހީތެރިކަމާ އެކު ރެއާލްގެ ފުރަތަމަ ލަނޑު ދެ ވަނަ ހާފު ފެށިގެން ތިން ވަނަ މިނެޓުގައި ޖެހީ ބެންޒެމާ އެވެ. 56 ވަނަ މިނެޓުގައި ލޫކަ މޮޑްރިޗް ތަނަވަސްކޮށްދިން ފުރުސަތެއްގައި ދެ ވަނަ ލަނޑު ޖެހީ ޑިފެންޑަރު ނަޗޯ ފެނާންޑޭޒް އެވެ. އޭގެ އިރުކޮޅެއް ފަހުން ބެންޒެމާ ވަނީ އޭނާގެ ދެ ވަނަ ލަނޑު ޖަހައި ރެއާލަށް ލީޑް ފުޅާކޮށްދީފަ އެވެ. ރެއާލް ތިން ގޯލު ކުރީގައި އޮއްވައި އަލަވޭސް އަށް ލިބުނު ޕެނަލްޓީއަކުން އެޓީމުގެ ހޮސެލޫ ވަނީ ފަރަގު ކުޑަކޮށްފަ އެވެ. ރެއާލްގެ ފަހު ލަނޑު މެޗުގެ އިތުރު ވަގުތުގައި އަލާބާ ދިން ބޯޅައަކުން ކާމިޔާބުކޮށްދިނީ ވިނީޝިއަސް ޖޫނިއާ އެވެ.

2009 ވަނަ އަހަރު ރެއާލާ ގުޅުމަށް ފަހު މިދިޔަ އަހަރުތަކުގައި އެ ކްލަބުން ހޯދި ގިނަ ކާމިޔާބީތަކުގައި ބެންޒެމާގެ ދައުރު ބޮޑެވެ. ފަހަކަށް އައިސް ރަނގަޅު ފޯމެއްގައި ހުރުމުން ބެންޒެމާ އަށް ވަނީ ޖުލައި މަހު ނިމުނު ޔޫރޯ ފުޓްބޯޅަ މުބާރާތުގައި ފްރާންސް ޓީމުން ވެސް ފުރުސަތު ލިބިފަ އެވެ. ސްޕެނިޝް ލީގުގައި މި އަހަރު މިހާތަނަށް ބެންޒެމާ 17 ގޯލު ޖަހާފައިވާއިރު އޭނާ އަށް ވުރެ ގިނައިން މި އަހަރު ސްޕެނިޝް ލީގުގައި ގޯލު ޖަހާފައިވަނީ 23 ގޯލު ޖަހާފައިވާ ލިއޮނަލް މެސީ އެވެ.

ސްޕެނިޝް ލީގުގެ އެހެން މެޗުތަކަށް ބަލާއިރު ވެލެންސިއާ ވަނީ އަމިއްލަ ދަނޑުގައި ގެޓާފާ 0-1 އިން ބަލިކޮށްފަ އެވެ. ކާޑިޒް އާއި ލެވަންޓޭ ވާދަކުރި މެޗާއި މަޔޯކާ އާއި ރެއާލް ބެޓިސް ވާދަކުރި މެޗުތައް ނިމުނީ 1-1 އިން އެއްވަރުވެގެންނެވެ.

ލިއޮނަލް މެސީ ނުލައި މިފަހަރު ނުކުންނަ ބާސެލޯނާ އިން ލީގުގައި ކުޅޭ މެޗުގައި މިރޭ ނުކުންނާނީ ރެއާލް ސޮސިއެޑާޑްއާ ދެކޮޅަށެވެ. މިއީ ޕީއެސްޖީ އަށް ބަދަލުވި މެސީ ނުލައި ބާސެލޯނާ މިދިޔަ 16 އަހަރުތެރޭ ނުކުންނަ ފުރަތަމަ ސީޒަނެވެ. ބާސެލޯނާ މެޗު ފަށާނީ ރާއްޖެ ގަޑިން މިރޭ 11 ޖަހާއިރު އެވެ.

Advertisement