އަމިއްލަ ރެކޯޑް މުގުރާލުމަށްފަހު ޗެލްސީން ލުކާކޫ އަލުން ގެނެސްފި

ޗެލްސީން މިހާތަނަށް ގެނައި އެންމެ އަގު ބޮޑު ކުޅުންތެރިޔާގެ ގޮތުގައި، ކުރިން އެ ކްލަބަށް ކުޅުނު ބެލްޖިއަމްގެ ފޯވާޑް ރޮމެލޫ ލުކާކޫ  ސޮއިކޮށްފި އެވެ. އިޓަލީގެ އިންޓަ މިލާނަށް މިދިޔަ ސީޒަންގެ އިޓާލިއަން ލީގު ކާމިޔާބުކޮށްދިނުމުގައި އެންމެ މުހިއްމު ދައުރެއް އަދާކުރި ލުކާކޫ ޗެލްސީއަށް އަލުން މި ސޮއިކުރީ 97.5 މިލިއަން ޕައުންޑަށެވެ. މިއީ ޗެލްސީން މީގެ ގާތްގަނޑަކަށް 10 އަހަރު ކުރިން ފުރަތަމަ ފަހަރަށް ލުކާކޫ ގެނައި އިރު ހަރަދުކުރިވަރަށްވުރެ 80 މިލިއަން ޕައުންޑް އިތުރު އަދަދެކެވެ.

2014 ވަނަ އަހަރު ޗެލްސީ ދޫކޮށް 28 މިލިއަން ޕައުންޑަށް އެވަޓަންއަށް ބަދަލުވުމަށްފަހު އޭގެ ފަހުން މެންޗެސްޓާ ޔުނައިޓެޑަށް ވެސް ކުޅުނު ލުކާކޫ ޕްރިމިއާ ލީގަށް އެނބުރި މިއައީ ފަސް އަހަރު ދުވަހުގެ މުއްދަތަށް ޗެލްސީގައި މަޑުކުރަން އެއްބަސްވެގެންނެވެ.

Advertisement

“އަހަރެން ފުރަތަމަ މި ކްލަބަށް އައީ ޅަކުއްޖެއްގެ ގޮތުގަ ވަރަށް ބައިވަރު އެއްޗެހި ދަސްކުރަން. މފަހަރު އަހަރެން އަލުން އެނބުރި މި އައީ ވަރަށް ބައިވަރު ތަޖްރިބާއާއެކު. އަދި ކުރިއަށްވުރެ މާ ބޮޑަށްވެސް ތަސައްރަފު ފުދިފައި ހުރި މީހެއްގެ ގޮތުގަ” ޗެލްސީއަށް ސޮއި ކުރުމަށްފަހު އުމުރުން 28 އަހަރުގެ ބެލްޖިއަމްގެ ފޯވާޑް ބުންޏެވެ.

ލުކާކޫ 2011 ވަނަ އަހަރު ޗެލްސީ އަށް ބަދަލުވުމަށް ފަހު ޖާޒީ ދައްކާލަނީ. ލުކާކޫ ވަނީ 10 އަހަރު ފަހުން އަލުން ޗެލްސީއާ ގުޅިފައި

ޗެލްސީން މީގެ ކުރިން އެންމެ އަގުބޮޑުކޮށް ކުޅުންތެރިޔަކު ގެނައީ މިދިޔަ އަހަރުގެ ސެޕްޓެމްބަރު މަހު އެވެ. 71 މިލިއަން ޕައުންޑަށް ޖަރުމަނުގެ ބަޔާން ލެވަކޫސަނުން އެޓީމަށް ގެނައި ކައި ހަވާޓްޒް އަންނަނީ މިހާރު ޗެލްސީގައި މޮޅު ކުޅުމެއް ދައްކަމުންނެވެ. ހަވާޓްޒްގެ ރެކޯޑް މުގުރާލުމަށް ފަހު ލުކާކޫ ގެނައި އިރު މިއީ ޗެލްސީން އާ ސީޒަނުގެ ކުރިން އެންމެ ބޭނުންވި ކުޅުންތެރިޔާ އެވެ.

“އަހަރެން އެންމެ ކުޑައިރުވެސް ޗެލްސީއަށް ސަޕޯޓްކުރިން. މިއަދު މި ޓީމަށް އެނބުރި އައިސް އިތުރު ކާމިޔާބީތައް ހޯދުމުގައި އެހީވާން ފުރުސަތު ލިބުމަކީ އަހަރެންނަށް ވަރަށް އުފާވެރި އިހްސާސްތަކެއް ކުރެވޭ ކަމެއް. ” ލުކާކޫ ބުންޏެވެ.

އިންޓަ މިލާނުން ޗެލްސީއަށް ލުކާކޫ ވިއްކާލި އަގަކީ އިޓަލީގެ ކްލަބަކުން ކުޅުންތެރިއަކު މިހާތަނަށް އެހެން ކްލަބަކުން ވިއްކާލި އެންމެ ބޮޑު އަގެވެ. 2010 ވަނަ އަހަރަށް ފަހު އިންޓަ އިން މިދިޔަ ސީޒަނުގެ އިޓާލިއަން ލީގު ކާމިޔާބުކުރިއިރު ލުކާކޫ ވަނީ 24 ގޯލު ޖަހައި 11 ގޯލު ޖަހަން މަގުފަހިކޮށްދީފަ އެވެ. ލުކާކޫ އަށް ވުރެ ގިނައިން އިޓަލީ ލީގުގައި ލަނޑު ޖެހީ ހަމައެކަނި ކްރިސްޓިއާނޯ ރޮނާލްޑޯ އެވެ. މިހާރު ހުރި ފޯމަށް ބަލާއިރު ލުކާކޫ އަކީ ޔޫރަޕްގައި ހުރި އެންމެ ހުނަރުވެރި އެއް ފޯވާޑެވެ.

Advertisement