ޕީއެސްޖީ އަށް ބަދަލުވި ވައިނަލްޑަމް ލިވަޕޫލް ސަޕޯޓަރުންނަށް ފާޑުކިޔައިފި

ލިވަޕޫލްގައި ހޭދަކުރި ދުވަސްވަރު ސަޕޯޓަރުންގެ އަމަލުތައް ހުރިގޮތުން ކްލަބުގައި އޭނާގެ މުހިއްމުކަން އިހުސާސް ނުކުރެވުނު ކަމަށް މިފަހަރުގެ ޓްރާންސްފާ ބާޒާރުގައި ޕީއެސްޖީ އަށް ބަދަލުވި ނެދަލެންޑްސްގެ މިޑްފީލްޑަރު ޖިއޮޖީނިއޯ ވައިނަލްޑަމް ބުނެފި އެވެ.

ނިއުކާސަލް ޔުނައިޓެޑުން ވައިނަލްޑަމް 2016 ވަނަ އަހަރު ލިވަޕޫލާ ގުޅުނީ 25 މިލިއަން ޕައުންޑަށެވެ. މިދިޔަ އަހަރުތަކުގައި އެއް ފެންވަރެއްގައި މޮޅު ކުޅުމެއް ދައްކައި ވައިނަލްޑަމް ވަނީ ލިވަޕޫލަށް 237 މެޗު ކުޅެދީ އިނގިރޭސި ޕްރިމިއާ ލީގާއި ޔޫއެފާ ޗެމްޕިއަންސް ލީގުގެ އިތުރުން ޔޫއެފާ ސުޕަ ކަޕާއި ފީފާ ކްލަބް ވޯލްޑް ކަޕް ކާމިޔާބުކޮށްފަ އެވެ.

Advertisement

ލިވަޕޫލާ ގުޅޭގޮތުން ވާހަކަދައްކަމުން ވައިނަލްޑަމް ބުނީ މުހިއްމުކަން އިހުސާސް ނުކުރެވުނީ ޓީމުގެ ކުޅުންތެރިންނާއި ޓްރެއިނިން ގްރައުންޑުން ނޫންކަމަށެވެ.

“އަހަރެންނަށް ލޯތްބާއި އިހުތިރާމް ނުލިބޭކަމުގެ އިހުސާސް ކުރެވުނު ދުވަސްތަކެއް ދިޔަ. އެއީ ލިވަޕޫލްގެ ކުޅުންތެރިން ނޫނީ ޓްރެއިނިން ގްރައުންޑުން ދިމާވި ކަމެއް ނޫން. އެމީހުން އަހަރެން ދެކެ ވަރަށް ލޯބިވޭ އަދި އަހަރެން ވެސް ހަމަ އެގޮތަށް އެމީހުން ދެކެ ލޯބިވޭ. އަހަރެންނަށް ކުރެވުނު އިހުސާސް ތަޖުރިބާކުރަން ޖެހުނީ އެހެން ދިމާލަކުން” ސަޕޯޓަރުންނަށް ނިސްބަތްކޮށް އުމުރުން 30 އަހަރުގެ ވައިނަލްޑަމް ބުންޏެވެ.

ވައިނަލްޑަމް ލިވަޕޫލް ދޫކޮށްލުމުގެ މައިގަނޑު ސަބަބަކީ އާ ކޮންޓްރެކްޓްގައި އޭނާ ހުށަހެޅި މުސާރަ އަށް ލިވަޕޫލުން އެއްބަސްނުވުމެވެ. ތިން އަހަރުގެ އެ ކޮންޓްރެކްޓްގައި ހަފްތާއަކު 180،000 ޕައުންޑުގެ މުސާރައަކަށް ވައިނަލްޑަމް އެދުނުއިރު ލިވަޕޫލް ހިންގަމުން އަންނަ ފެންވޭ ސްޕޯޓްސް ގްރޫޕް (އެފްއެސްޖީ) އެގޮތަށް އެއްބަސްނުވީ އެވެ. އެކަމަކު އޭނާ ކްލަބުގައި ބަހައްޓަން ކޯޗު ޔާގެން ކްލޮޕް ބޭނުންވި އެވެ. އޭގެފަހުން ޕީއެސްޖީ އަށް ވައިނަލްޑަމް ބަދަލުވީ ހަފްތާއަކު 200،000 ޕައުންޑުގެ މުސާރައަކަށެވެ.

ލިވަޕޫލްގެ ޖާޒީގައި ވައިނަލްޑަމްގެ ފަހު މެޗަކަށްވީ މިދިޔަ ސީޒަނުގެ އިނގިރޭސި ޕްރިމިއާ ލީގުގައި ކްރިސްޓަލް ޕެލޭސް އަތުން ލިވަޕޫލް 0-2 އިން މޮޅުވި މެޗެވެ. އެ މެޗަށް ވައިނަލްޑަމް ނުކުތްއިރު ޓީމުން ވަނީ އޭނާ އަށް ގާޑް އޮފް އޮނާ އެއް އަރުވައިފަ އެވެ. އަދި ދަނޑުގައި ތިބި ސަޕޯޓަރުން ވަނީ ވައިނަލްޑަމް ކްލަބަށް ކޮށްދިން ހިދުމަތަށް ޝުކުރުއަދާކޮށްފަ އެވެ.

“އަހަރެންނަށް ކުރެވުނު އިހުސާސަކީ ދަނޑުގައި ތިބޭ ސަޕޯޓަރުންނާއި ސޯޝަލް މީޑިއާގައި އުޅޭ ސަޕޯޓަރުން މުޅިން ތަފާތުކަން. ގޯސްކޮށް ދިޔަ ހާލަތްތަކުގައި ކުށްވެރިވީ އަހަރެން. ދަނޑުގައި ތިބޭ ސަޕޯޓަރުން އަހަރެންނަށް އަބަދުވެސް ސަޕޯޓްކުރި. ސަޕޯޓަރުން އަލުން ދަނޑަށް ވަތްއިރު (ކޮވިޑްގެ ހާލަތާއެކު) އެމީހުންނަށް އެނގޭ އަހަރެން ލިވަޕޫލް ދޫކޮށްލަން ނިންމާފައިވާކަން. އެކަމަކު ވެސް އެމީހުން އަހަރެންނަށް ސަޕޯޓްކޮށް އެންމެ ފަހުން ރަނގަޅު ފެއާވެލްއެއް ވެސް ދިން” ސޯޝަލް މީޑިއާގައި ސަޕޯޓަރުންގެ ފަރާތުން ކުރިމަތިވި ކަންކަމަށް އިޝާރަތްކުރަމުން ވައިނަލްޑަމް ބުންޏެވެ.

Advertisement