މުޅި ދުނިޔެ ބައިވެރިވާ އިވެންޓެއްގައި ދީމާ ރާއްޖޭގެ ދިދަ އުފުލަނީ

ދުބާއީގައި ބާއްވާ ވޯލްޑް އެކްސްޕޯގައި ރާއްޖޭގެ ގައުމީ ދިދަ އުފުލުގެ ފުރުސަތާ އެކު ރާއްޖޭގެ ޓީޓީ ކުޅުންތެރިޔާ އަށް ފާތިމަތު ދީމާ އަލީ އަށް އަނެއްކާވެސް ބޮޑު ޝަރަފެއް ލިބިއްޖެ އެވެ.

އާކިޓެކްޗާ އާއި ޓެކްނޮލޮޖީގެ އެންމެ ފަހުގެ ވަސީލަތްތައް ތައާރަފްކުރުމާއި ދައްކާލުމުގެ ގޮތުން ބާއްވާ މި އެކްސްޕޯ ހުޅުވުމުގެ އިވެންޓް އޮންނާނީ އަންނަ އޮކްޓޫބަރު މަހު އެވެ. 190 އަށް ވުރެ ގިނަ ގައުމުން މި އެކްސްޕޯގައި ބައިވެރިވާއިރު މިއީ އެތައް ބިލިއަން ޑޮލަރުގެ ފައިދާއަކާއި އެތައް ހާސް ވަޒީފާގެ ފުރުސަތު ހުޅުވިގެން ދާނެ އެކްސްޕޯއެކެވެ. ގާތްގަނޑަކަށް ހަ މަސްދުވަހުގެ މުއްދަތަކަށް ކުރިއަށްގެންދާ މި އެކްސްޕޯ އަށް 25 މިލިއަން މީހުން ޒިޔާރަތްކުރާނެކަމަށް އަންދާޒާކޮށްފައިވެ އެވެ.

Advertisement

އުމުރުން 13 އަހަރުގެ ދީމާ އަށް މި ފުރުސަތު ލިބުނުއިރު، 2019 ވަނަ އަހަރު އޮތް އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގައި ރާއްޖޭގެ ދިދަ އުފުލާލުމުގެ ޝަރަފު ވެސް ލިބުނީ ދީމާ އަށެވެ. ދިދަ އުފުލާނެ އެތުލީޓެއްގެ ގޮތުގައި ދީމާ ހޮވުނީ ޔޫތު މިނިސްޓްރީން ހުށަހެޅި އަންހެން ފަސް އެތުލީޓުންގެ ތެރެއިން އިންޓަވިއު ކުރުމަށްފަހު އެވެ. މި ފުރުސަތު ހޯދައިދިނުމުގައި ޔޫތު މިނިސްޓްރީގެ އިތުރުން އިކޮނޮމިކް މިނިސްޓްރީ ވެސް ވަނީ މެދުވެރިވެފަ އެވެ.

ދީމާ އަކީ ހަގު އުމުރެއްގައި ރާއްޖެއަށް އެންމެ ގިނަ ކާމިޔާބީ ހޯދައިދީފައިވާ ކުޅިވަރު އެތުލީޓެވެ. ދީމާގެ ފާހަގަކޮށްލެވޭ ބައެއް ކާމިޔާބީތަކަށް ބަލާއިރު 2019 ވަނަ އަހަރުގެ އައިއޯއައިޖީ އިން ތިން ރަން މެޑަލް ހޯދުމާއި، ސައުތު އޭޝިއާ ހޯޕްސް މުބާރާތުން ރަން މެޑަލް ހޯދުމާއި، އޭޝިއާ ހޯޕްސް މުބާރާތުން ރިހި މެޑަލް ހޯދުމުގެ އިތުރުން ވޯލްޑް ހޯޕްސް މުބާރާތަށް ކޮލިފައިވުން ހިމެނެ އެވެ.

މި އެކްސްޕޯގައި ރާއްޖޭގެ ކުޅިވަރުގެ ޒުވާން އެތުލީޓަކަށް ދިދަ އުފުލުގެ ޝަރަފް ލިބުމާ ގުޅިގެން ސްޕޯޓްސް މިނިސްޓަރު އަހުމަދު މަހުލޫފް ވަނީ ދީމާ އަށް މަރުހަބާ ދަންނަވައިފަ އެވެ. މަހުލޫފް ވިދާޅުވީ ދީމާ އަށް އެ ޝަރަފް ލިބުމަކީ އޭނާ އަށް ލިބިވަޑައިގެންނެވި ބޮޑު އުފަލެއް ކަމަށެވެ. މިފަދަ ކާމިޔާބީތައް ލިބުމުގައި ދީމާގެ މައިންބަފައިން އަދާކުރާ ދައުރަކީ އެންމެންނަށް މިސާލެއް ކަމަށް މަހުލޫފް ވިދާޅުވި އެވެ.

“ވޯލްޑް އެކްސްޕޯގައި ރާއްޖޭގެ ދިދަ އުފުލާލުމުގެ ޝަރަފު އުމުރުން ހަގު ދީމާ އަށް ލިބުމަކީ ބޮޑު އުފަލެއް. ދީމާގެ ކާމިޔާބީގައި އެންމެ މުހިއްމު ދައުރެއް އަދާކުރާ އޭނާގެ މައިންބަފައިންނަކީ އަޅުގަނޑުމެން އެންމެންނަށް ރަގަޅު މިސާލެއް” މިނިސްޓަރު ކުރެއްވި ޓްވީޓުގައި ވިދާޅުވި އެވެ.

Advertisement