ޗެލްސީން ކިތަންމެ ބޭނުންވިޔަސް މިފަހަރު ހާލަންޑް ލިބޭކަށް ނެތް

ނޯވޭގެ އުމުރުން 20 އަހަރުގެ ހުނަރުވެރި ފޯވާޑް، އާލިން ބްރައުޓް ހާލަންޑް ގެންދަން ޔޫރަޕްގެ ބޮޑެތި ކްލަބްތަކުން ކިތަންމެ ބޭނުންވި ނަމަވެސް އެ ކުޅުންތެރިޔާ ވިއްކާނުލާނެ ކަމަށް ޖަރުމަނުގެ ބޮރޫޝިއާ ޑޯޓްމަންޑުން ބުނެފި އެވެ.

ޔޫރަޕްގެ މަޝްހޫރު ޓީމުތަކުގެ ތެރެއިން ހާލަންޑް ގެންދަން އެންމެ ބޮޑަށް މަސައްކަތްކުރަނީ ޔޫރަޕްގެ ޗެމްޕިއަން ޗެލްސީންނެވެ. ޗެލްސީން ހާލަންޑަށް ރަސްމީކޮށް ބިޑެއް ހުށަހަޅާފައި ނުވިނަމަވެސް ރިޕޯޓުތައް ބުނާގޮތުން އެ ކްލަބުގެ އޯނަރު ރޯމަން އަބްރޮމޮވިޗް އެންމެ ގަޔާވާ ކުޅުންތެރިއަކީ ހާލަންޑް އެވެ. ޗެލްސީން ހާލަންޑަށް 100 މިލިއަން ޑޮލަރު ހުށަހަޅަން ތައްޔާރަށް އޮތްއިރު އޭގެ ބަދަލުގައި ކުޅުންތެރިންތަކެއް އެ ޑީލުގެ ތެރޭގައި ހިމަނަން ވެސް އެ ކްލަބް އޮތީ ތައްޔާރަށެވެ. އެކަމަކު އެ ޑީލަށް ޑޯޓްމަންޑުން އެއްބަސްނުވާއިރު، އިތުރު އަގެއް ހުށަހަޅައިގެން ވެސް ހާލަންޑް ދޫ ނުކުރާނެކަމަށް އެ ކްލަބުން ވަނީ ބުނެފަ އެވެ.

Advertisement

ޗެލްސީގެ އިތުރުން ޗެމްޕިއަންސް ލީގުގެ ފައިނަލުގައި ބަލިވި މެންޗެސްޓަރ ސިޓީގެ ކޯޗު ޕެޕް ގާޑިއޯލާ ވެސް އަންނަނީ ހާލަންޑް އެޓީމަށް ގެނައުމާ މެދު ވިސްނަމުންނެވެ. އެޓީމަށް ފޯވާޑެއް ބޭނުންވަނީ ގިނަ ކާމިޔާބީތަކެއް ހޯދައިދިން އާޖެންޓީނާގެ ފޯވާޑް ސާޖިއޯ އަގުއޭރޯ މިދިޔަ ސީޒަނަށް ފަހު ސިޓީ ދޫކޮށް ބާސެލޯނާ އަށް ބަދަލުވުމާ ގުޅިގެންނެވެ. އަގުއޭރޯގެ ރީޕްލޭސްމަންޓަށް ހާލަންޑްގެ އިތުރުން ހެރީ ކޭން އަށް ވެސް ސިޓީން އަންނަނީ ފާރަލަމުންނެވެ.

އޮސްޓްރިއާގެ ރެޑްބުލް ސާލްސްބާގްގައި ދައްކަމުން އައި މޮޅު ކުޅުމާ އެކު ހާލަންޑް ހޯދަން ޔޫރަޕްގެ މަޝްހޫރު ކްލަބްތަކުން ބޭނުންވި އެވެ. އެކަމަކު އެ ކްލަބްތަކަށް ނޫނެކޭ ބުނެ ހާލަންޑް ޑޯޓްމަންޑަށް ބަދަލުވީ މިދިޔަ އަހަރުގެ ޖެނުއަރީ މަހު އެވެ. ޑޯޓްމަންޑުގައި ހާލަންޑް އަންނަނީ މޮޅު ކުޅުމެއް ދައްކައި ގިނަ ލަނޑުތަކެއް ޖަހަމުންނެވެ.

ހާލަންޑް ދޫ ނުކުރާނެކަމަށް ޑޯޓްމަންޑުން ބުނިއިރު މިދިޔަ އަހަރުތަކުގައި އެޓީމުގައި މޮޅު ކުޅުމެއް ދެއްކި އުމުރުން 21 އަހަރުގެ އިނގިރޭސި ފޯވާޑް، ޖޭޑޮން ސަންޗޯ މިހާރު ވަނީ މެންޗެސްޓަރ ޔުނައިޓެޑަށް ވިއްކާލައިފަ އެވެ. ގިނަ މަޝްވަރާތަކަށް ފަހު ޑޯޓްމަންޑުން ސަންޗޯ ދޫކޮށްލީ 73 މިލިއަން ޕައުންޑަށެވެ.

ހާލަންޑުގެ ޓްރާސްފާގައި އަދިވެސް ގިނަ ވާހަކަތަކެއް ފެންމަތިވާނެކަމަށް ބެލެވޭއިރު އޭނާގެ އޭޖެންޓަކީ މަޝްހޫރު ގިނަ ކުޅުންތެރިންތަކެއްގެ އޭޖެންޓްކަން ކުރަމުން އަންނަ މިނޯ ރައިއޯލާ އެވެ.

Advertisement