ގިނައީ ބައި ގޯލް، ދެން ރަން ބޫޓު ލިބޭނީ ކާކަށް؟

އެއް އަހަރުގެ ދުވަހުގެ ދިގު އިންތިޒާރަކަށްފަހު ޖޫން 11 ގައި ފެށުނު ޔޫރަޕްގެ ފުޓްބޯޅަ އީދު މިރޭ ނިމުމަކަށް އަންނަނީ އެވެ. ޔޫރަޕްގެ އެކި ސިޓީތަކުގައި 4 ހަފުތާއަށް ދެމިގެން މިދިޔަ އީދުގައި އެންމެ ފާހަގަކުރެވުނު އެއްމަންޒަރަކީ އެކި ކުލަތަކުން ޖަރީވެގެން ކުޅިބަލަން ވަދެ ތިބި ސަޕޯޓަރުންނާއި އެމީހުންގެ ސަޕޯޓްކުރުމެވެ. ކްލަބު ފުޓްބޯޅަ އާއި ބައިނަލްއަގުވާމީ ފުޓްބޯޅައިގެ އެއް ސީޒަން ކޮވިޑްގެ ހާލަތާއި ހެދި ސަޕޯޓަރަކު ނެތި ހުސްދަނޑުތަކުގައި ކުޅެވުނުތަން ޓީވީތަކުން ބެލުމަށްފަހު މިބަދަލުން ހިތަށް ލިބުނީ އިތުރު އުފަލެކެވެ. މެޗުތައް ބަލަން ތިބޭއިރު ކުޅުންތެރިން ލާ ނޭވާގެ އަޑުވެސް އިވޭހާ ހިމޭން ކަމަކުން ނުވަތަ ފޭކް ސަޕޯޓު އަޑަކުން ނިކުމެ އަސްލު ސަޕޯޓަރުންގެ ފޯރީގެ ތެރެއަށް ގޮސް ވަދެވުމުން ފުޓްބޯޅަ ބެލުމުގެ ހަގީގީ ފޯރި އިހުސާސްވި އެވެ. ސަޕޯޓަރުން ނުވައްދާ ދެކުނު އެމެރިކާގައި ކުރިއަށްދިޔަ ކޮޕާ އެމެރިކާ އާއި ޔޫރޯ އާއި މިފަހަރު އެހާތަފާތުވި އެއް ސަބަބަކީ އެއީކަން ޔަގީނެވެ.

މިރޭގެ ފައިނަލަށް މީގެ ކުރިން 1 ފަހަރު ޔޫރޯ ހޯދާފައިވާ އިޓަލީ އާއި މުޅިން އަލަށް ޔޫރޯ ފައިނަލް ކުޅޭ އިނގިރޭސިވިލާތް ނުކުންނައިރު ތަށި އުފުލާލާނީ ކޮންބައެއްތޯ މިހާރު ކުރެވޭ ސުވާލާއެކުހެން ކުރެވޭ ދެ ވަނަ ސުވާލަކީ މުބާރާތުގެ ރަންބޫޓް ގެންދާނީ ކޮން ކުޅުންތެރިއެއްތޯ އެވެ. މުބާރާތް ފެށުމުގެކުރިން މިސުވާލުގެ ޖަވާބުގައި ހިމެނުނު މައިގަނޑު ތަރިންނަކީ ޕޯޗްގަލްގެ ކްރިސްޓިއާނޯ ރޮނާލްޑޯ، ބެލްޖިއަމްގެ ރޮމެލޫ ލުކާކޫ، އިނގިރޭސިވިލާތުގެ ހެރީ ކޭންއާއި ރަހީމް ސްޓާލިންގ، ފްރާންސްގެ ކަރީމް ބެންޒެމާއާއި އޮންޓުއަން ގްރީޒްމަން، އިޓަލީގެ ޗީރޯ އިމޯބިލޭ އާއި ލޮރެންޒޯ އިންސިނިއޭ، ސްޕެއިންގެ އަލްވާރޯ މޮރާޓާ އަދި ޕޮލެންޑްގެ ރޮބަޓް ލެވަންޑޮސްކީ ފަދަ ކުޅުންތެރިންނެވެ.

މުބާރާތުގެ އެންމެ ފަހު މެޗާއި ހަމައަށް ދިޔައިރު މި މުބާރާތް ވެގެންގޮސްފައިވަނީ އެންމެގިނަގޯލް މިހާތަނަށްފެނިގެންދިޔަ ޔޫރޯއަށެވެ. މިމުބާރާތުގައި މިހާތަނަށް 140 ގޯލް ޖަހާފައިވެ އެވެ. މީގެކުރިން އެންމެ ގިނަ ގޯލް ޖަހާފައިވަނީ 108 ގޯލް ފެނިގެންދިޔަ 2016 ގެ ޔޫރޯގަ އެވެ. މުބާރާތުގައި ވާދަކުރާ ޓީމުތަކުގެ އަދަދު 24 އަށް ބަދަލުވިފަހުން މިއީ ކުޅެވޭ ދެ ވަނަމުބާރާތެވެ. އެހެންކަމުން މިދެޔޫރޯގައި ކުޅެވުނު މެޗްތައް ގިނަވުމާއެކު ގޯލްވެސް އިތުރުވުމަކީ ގިނަގޯލްޖެހުން ކަމަށް ނުވެހިނގައިދާނެ އެވެ. އެހެންނަމަވެސް ކޮންމެ މެޗަކަށް ޖެހޭ އެވުރެޖް ގޯލްގެ އަދަދަށް ބެލިޔަސް މި މުބާރާތް އޮތީ އެއް ވަނައިގަ އެވެ. މިމުބާރަތުގައި މިހާތަނަށްވަނީ މެޗަކަށް 2.80 ގޯލް ޖަހާފަ އެވެ. އެއީ ކޮންމެ 32 މިނިޓަކުން ގޯލެކެވެ. ދެ ވަނައިގައި އޮތީ މެޗަކަށް 2.74 ގޯލް ޖެހޭ ފްރާންސް ރަން ގޯލަކުން ތަށި އުފުލާލި ޔޫރޯ 2000 އެވެ. އަދި 3 ވަނައިގައި އޮތީ މެޗަކަށް 2.73 ގޯލް ޖެހުނު މިޝޭލް ޕްލެޓީނީއާއެކު ފްރާންސް ތަށި ނެގި 1984ގެ ޔޫރޯ އެވެ. މި ތަފާސް ހިސާބަކީ ޔޫރޯއަށް ގްރޫޕް ސްޓޭޖް ތައާރަފްކުރިފަހުން ކުޅެވުނު މުބާރާތްތަކުގެ ހިސާބުތަކެވެ.

މިފަހަރުގެ ރަންބޫޓް ލިސްޓުގެ މިވަގުތު އެންމެ ކުރީގައި މިހާރު އޮތީ ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އެވެ. ދެ ވަނަބުރާއި ހަމައިން މިމުބާރާތާއި ވަކިވާން ޖެހުނަސް މިފަހަރުގެ ޔޫރޯގައި ގިނަ ރެކޯޑްތަކެއް ހަދައިގެން ލިސްޓުގެ އެއް ވަނައިގައި އޮތް ރޮނާލްޑޯ އަދިވެސް ވައްޓާލެވޭގޮތެއްނުވެ އެވެ. ރޮނާލްޑޯގެ 5 ގޯލާ އެއްވަރަށް ޗެކް ރިޕަބްލިކްގެ ޕެޓްރިކް ޝިކް ގޯލް ޖަހާފައިވިޔަސް ރޮނާލްޑޯއަށް ކުރިލިބެނީ އޭނާ ގޯލްޖަހަން އެއް އެސިސްޓް ހަދާފައި ވުމުންނެވެ. ޔޫއެފާގެ ގަވާއިދު އޮންނަ ގޮތުން ރަން ބޫޓް ދޭއިރު ގޯލްގެ ގޮތުން ގިނަކުޅުންތެރިން އެއްވަރުވެއްޖެނަމަ ދެން ބަލާނީ އެސިސްޓަށެވެ. އެގޮތުން ވެސް އެއްވަރުވެއްޖެނަމަ ގޯލަކަށް ޖެހޭ އެވްރެޖް މިނެޓަށެވެ. އެގޮތުންވެސް އެއްވަރުވެއްޖެނަމަ ޔޫރޯގެ ކޮލިފައިންގެ ރެކޯޑްތަކަށްބަލާނެ އެވެ. އެގޮތުން ސްޕެއިން ތަށި ދިފާއުކުރި 2012 ގެ ޔޫރޯގައި ފެނާންޑޯ ޓޮރޭސް އަށް އެވޯޑް ލިބުނުއިރު 3 ގޯލާއެކު ލަނޑުލިސްޓުގެ އެންމެ ކުރީގައި 6 ކުޅުންތެރިންގެ ނަން  އޮތެވެ. ގޯލާއި އެސިސްޓަށް ބަލާއިރު ޓޮރޭސް އާއި ޖަރުމަންގެ މާރިއޯ ގޯމޭޒް އެއްވަރެވެ. ޓޮރޭސް އަށް އެވޯޑް ލިބުނީ ގޯމޭޒަށްވުރެ 92 މިނެޓް މަދުން ކުޅެފައިވާތީ އެވެ. މިހާ ހިސާބުން މިފަހަރުގެ ލިސްޓުގައި ތިބި ކުޅުންތެރިންގެ ތެރެއިން ރޮނާލްޑޯ އަތުވާ ހިސާބުގައި ތިބީ ކޮންކުޅުންތެރިންނެއްތޯ ބަލާލަމާ ހިނގާށެވެ. ޔަގީނުންވެސް އެފަދަކުޅުންތެރިއަކު ހުރިނަމަ އެކުޅުންތެރިއަކުވާނީ އިޓަލީ ނުވަތަ އިނގިރޭސި ޓީމުގަ އެވެ.

ރަންބޫޓަށް ވާދަކުރާ ލިސްޓް

ކްރިސްޓިއާނޯ ރޮނާލްޑޯ (ޕޯޗްގަލް)

ރޮނާލްޑޯ މި މުބާރާތުގައި 5 ގޯލް ޖަހާ 1 އެސިސްޓްހެދި އެވެ. 4 މެޗްގަ 360 މިނެޓް ފުރިހަމަކުރިއިރު ކޮންމެ 72 މިނެޓަކުން ގޯލެއް ޖަހާފައިވެ އެވެ. މި މުބާރާތުގައި 16 ޝޮޓް ހެދިއިރު 8 ޝޮޓް ގޯލަށް އަމާޒުވި އެވެ. ރޮނާލްޑޯގެ 5 ގޯލްގެ ތެރެއިން 3 ގޯލް ޖަހާފައިވަނީ ޕެނަލްޓީ އިންނެވެ. މި މުބާރާތުގެ ކޮލިފައިންގައި ރޮނާލްޑޯ 11 ގޯލް ޖަހާފައިވެ އެވެ.

ހެރީ ކޭން (އިންގްލެންޑް)

ގްރޫޕް ސްޓޭޖްގައި ގޯލެއް ނުޖެހުނު ކަމުގައިވިޔަސް ދެ ވަނަބުރުން ފެށިގެން ފައިނަލާއި ހަމައަށް އައިއިރު ކޭން ވަނީ 4 ގޯލް ޖަހާފަ އެވެ. 6 މެޗްގައި 529 މިނެޓް ފުރިހަމަކޮށްފައިވާއިރު އެއީ އެއީ ކޮންމެ 132.2 މިނެޓުން ގޯލެކެވެ. 15 ޝޮޓް ހަދާ އެތަނުން 8 ޝޮޓް ގޯލާއި އަމާޒުވެފައިވާއިރު ކޮލިފައިންގަ 12 ގޯލް ޖަހާފައިވެ އެވެ. ކޭން ރަން ބޫޓް ބޭނުންނަމަ އިޓަލީ ކޮޅަށް މަދުވެގެން ދެގޯލް ޖަހަން ޖެހޭނެ އެވެ. ކޭން ވަނީ 2018ގެ ވޯލްޑް ކަޕްގައި ރަން ބޫޓް ހޯދާފަ އެވެ. އެހެންކަމުން މިފަހަރު ރަންބޫޓް ހޯދައިފިނަމަ ޖެހިޖެހިގެން ބޮޑު ދެމުބާރަތުގެ ރަން ބޫޓް ހާސިލްކުރިކަމުގެ ޝަރަފުލިބޭނެ އެވެ. އެންމެފަހުން އެކަން ކޮށްފައިވަނީ 1970ގެ ވޯލްޑް ކަޕާއި 1972 ގެ ޔޫރޯގެ ރަންބޫޓް ހޯދި ޖަރުމަން ލެޖެންޑް ގާޑު މުލާ އެވެ.

ރަހީމް ސްޓާލިން (އިންގްލެންޑް)

އިނގިރޭސި ޓީމުން މި މުބާރާތުގައި ޖެހި ފުރަތަމަ 3 ގޯލް އައީ ސްޓާލިންގެ ފަރާތުންނެވެ. ސެމީ ފައިނަލުގައި 4 ވަނަ ގޯލެއް ޖެހުމާއި ދާދި ގާތަށް އައިކަމުގައިވިޔަސް އެގޯލު ވެގެންދިޔައީ ބައިގޯލަކަށެވެ. ސްޓާލިން ވަނީ މިހާތަނަށް 6 މެޗް ގައި 521 މިނެޓް ކުޅެ ކޮންމެ 173.6 މިނެޓަށް ގޯލެއް ޖަހާފަ އެވެ.  14 ޝޮޓް ހަދާފައިވާއިރު 7 ޝޮޓް ގޯލަށް އަމާޒުވި އެވެ. ކޮލިފައިންގައި ވަނީ 8 ގޯލް ޖަހާފަ އެވެ. ރަންބޫޓް ބޭނުންނަމަ ސްޓާލިން އަށް ޖެހޭނީ ފައިނަލްގައި ހެޓްރިކެއް ހަދާށެވެ.

އިޓަލީ ޓީމުން މިހާތަނަށް ވަނީ މި މުބާރާތުގައި 12 ގޯލް ޖަހާފަ އެވެ. އިޓަލީއަށްވުރެ ގިނައިން ގޯލްޖަހާފައިވަނީ 13 ގޯލްޖެހި ސްޕެއިން އެވެ. އެހެންނަމަވެސް އިޓަލީ ޓީމުގައި 2 ގޯލަށްވުރެ ގިނައިން ޖެހި ކުޅުންތެރިއަކު އަދި ނެތެވެ. އެޓީމުގައި 2 ގޯލްޖެހި 5 ކުޅުންތެރިއަކު އެބަތިއްބެވެ. އެއީ ފެޑެރީކޯ ކިއޭސާ، ޗީރޯ އިމޯބިލޭ، ލޮރެންޒޯ އިންސިނިއޭ، މެނުއަލް ލޮކަޓެލީ އަދި މަތިއޮ ޕެސީނާ އެވެ. ރަން ބޫޓް ބޭނުންނަމަ މިއިން ކޮންމެ ކުޅުންތެރިއަކުވެސް ފައިނަލްމެޗްގައި މަދުވެގެން 4 ގޯލް ޖަހަން ޖެހޭނެ އެވެ. އެހެންކަމަށްވުމާއެކު އިޓަލީ މި މުބާރާތުގެ ތަށި އުފުލާލިޔަސް އެޓީމުގެ ކުޅުންތެރިއަކަށް ރަންބޫޓް ލިބުމުގެ ފުރުސަތު ވަރަށް ހަނިކަމުގައި ބުނެވިދާނެ އެވެ.

ކުރީ އަހަރުތަކާ އަޅާކިޔާއިރު މި މުބާރާތުގައި ފާހަގަކޮށްލެވޭ އެއްކަމަކީ ބައި ގޯލް އާދަޔާ ހިލާފަށް ގިނަވުމެވެ. މި މުބާރާތުގެ ފުރަތަމަ ގޯލަކީ ބައިގޯލެކެވެ. އަދި އެންމެ ފަހުން ކުޅެވުނު ސެމީ ފައިނަލްގައި ވެސް ބައިގޯލެއް ފެނުނެވެ. މި މުބާރާތުގައި ތަފާތު 8 ކުޅުންތެރިންގެ ފަރާތުން 11 ބައިގޯލް ފެނިފައިވެ އެވެ. އެހެންކަމުން ބައިގޯލްގެ ޖުމްލަ މިއުޅެނީ ރޮނާލްޑޯ، ޝިކް، ބެންޒެމާ، ލުކާކޫ، ލެވަންޑޮސްކީ، ކޭން އަދި ސްޓާލިންގަށް ވުރެވެސް މާ ކުރީގަ އެވެ. މި މުބާރާތުގައި ބައިގޯލުގެ 11 ގޯލް ފެނިފައިވާއިރު މީގެ ކުރީގެ ހުރިހާ ޔޫރޯ މުބާރާތްތަކުގައި ޖުމްލަ ފެނިފައިވަނީ އެންމެ 9 ގޯލެވެ. ކުރީގެ 15 މުބާރާތައް ބަލާނަމަ އެއީ މުބާރާތަކަށް އެންމެ 0.6 ގޯލެވެ. އެހެންވީމާ މިފަހަރު މިއީ ބައިގޯލަށް ރަންބޫޓް ދީފައި ނިންމާލަން ޖެހޭ ފަހަރެއް ނޫންހެއްޔެވެ؟