ޕެނަލްޓީގައި މާޓީނޭޒް ދެއްކި ހިތްވަރާ އެކު އާޖެންޓީނާ ފައިނަލަށް

ކޮޕާ އެމެރިކާ ފުޓްބޯޅަ މުބާރާތުގެ ސެމީ ފައިނަލުގައި މިއަދު ހެނދުނު ޕެނަލްޓީ ޖަހައިގެން ކޮލަމްބިއާ 3-2 އިން ބަލިކޮށް ފައިނަލުގެ ދެ ވަނަ ޖާގަ އާޖެންޓީނާ އިން ހޯދައިފި އެވެ. މެޗު ޕެނަލްޓީ އަށް ދިޔައީ ފުރިހަމަ ވަގުތު ނިމުނުއިރު 1-1 އިން ދެޓީމު އެއްވަރުވުމުންނެވެ.

ކޮޕާ އެމެރިކާގެ މިފަހަރުގެ ގަވާއިދު ބުނާގޮތުން 90 މިނެޓުގައި މެޗު އެއްވަރުވެއްޖެ ނަމަ އިތުރު ވަގުތުގެ ދެ ހާފު ނުކުޅެ ދާން ޖެހޭނީ ޕެނަލްޓީއަށެވެ. ބްރެޒިލްގެ އެސްޓަޑިއޯ ނަސިއޮނާލްގައި ކުޅުނު މެޗުގެ ހަތް ވަނަ މިނެޓުގައި އާޖެންޓީނާ އިން ވަނީ ލީޑު ނަގައިފަ އެވެ. މުބާރާތުގައި މޮޅު ކުޅުމެއް ދައްކަމުން އަންނަ ލިއޮނަލް މެސީގެ އެހީތެރިކަމާ އެކު މި ލަނޑު ކާމިޔާބުކޮށްދިނީ ލައުޓާރޯ މާޓީނޭޒް އެވެ. އާޖެންޓީނާގެ ގޯލަށް ފަހު ކޮލަމްބިއާ އިން ކުރި ޖެހި އުފެއްދި ހަމަލާތައް ކީޕަރު މާޓީނޭޒް ވަނީ މަތަކޮށްފަ އެވެ. އެކަމަކު މެޗުގެ 60 ވަނަ މިނެޓުގައި ކޮލަމްބިއާގެ ލުއިސް ޑިއާސް ޖެހި ގޯލާ އެކު މެޗުގެ ނަތީޖާ ހަމަހަމަވި އެވެ. މެޗު އެއްވަރުވާން ދަނިކޮށް 80 ވަނަ މިނެޓުގައި މެސީ ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ.

Advertisement

ގޯލު ޖެހުމަށް ފަހު އާޖެންޓީނާގެ ކުޅުންތެރިން އުފާފާޅުކުރަނީ

އެއްވަރުވެގެން ޖެހި ޕެނަލްޓީގައި މާޓީނޭޒް ވަނީ ކޮލަމްބިއާގެ ހަތަރު ޕެނަލްޓީގެ ތެރެއިން ތިން ޕެނަލްޓީ ހުށިޔާރުކަމާ އެކު މަތަކޮށްފަ އެވެ. މާޓީނޭޒް މަތަކުރީ ކޮލަމްބިއާގެ ޑަވިންސަން ސަންޗޭޒް އާއި ޔެރީ މިނާ އާއި އެޑްވިން ކާޑޯނާ ޖެހި ޕެނަލްޓީތަކެވެ. ކޮލަމްބިއާ އަށް ވައްދާލެވުނީ ހުއާން ކުއަޑްރާޑޯ ޖެހި ޕެނަލްޓީ އެކަންޏެވެ. އާޖެންޓީނާގެ ހަތަރު ޕެނަލްޓީގެ ތެރެއިން ރޮޑްރީގޯ ޑެ ޕޯލް ޖެހި ޕެނަލްޓީ ދިޔައީ ހުރަސްދަނޑި މަތިންނެވެ. އެކަމަކު މެސީ އާއި ލެއަންޑްރޯ ޕަރޭޑޭސްގެ އިތުރުން ލައުޓާރޯ މާޓީނޭޒް ވަނީ ޕެނަލްޓީތައް ކާމިޔާބުކޮށްފަ އެވެ.

ޕެނަލްޓީގައި ހީރޯ އަކަށްވި މާޓީނޭޒް ވަނީ އާސެނަލް ދޫކޮށް މިދިޔަ ސީޒަނުގައި އިނގިރޭސި ކްލަބް އެސްޓަން ވިލާ އަށް ބަދަލުވެ ގޯލުގައި ތަފާތު މޮޅު ކުޅުމެއް ދައްކައިފަ އެވެ. އެސްޓަން ވިލާގައި ދައްކަމުން އައި މޮޅު ކުޅުމާ އެކު އޭނާ އަށް އާޖެންޓީނާގެ ފުރަތަމަ އެގާރައިން ފުރުސަތު ލިބި އަންނަނީ މޮޅު ކުޅުމެއް ދައްކަމުންނެވެ.

މާޓީނޭޒް ޕެނަލްޓީއެއް މަތަކުރަނީ. އާޖެންޓީނާ ފައިނަލަށް ގެންގޮސްދިނުމުގައި މުހިއްމު ދައުރެއް އަދާކުރި

ފައިނަލުގައި އަންނަ އާދީއްތަ ދުވަހު އާޖެންޓީނާ ނުކުންނާނީ މުބާރާތް ހޯސްޓްކުރާ ބްރެޒިލާ ދެކޮޅަށެވެ. މި ދެޓީމު އެންމެ ފަހުން މި މުބާރާތުގެ ފައިނަލުގައި ވާދަކުރީ 2007 ވަނަ އަހަރު އެވެ. އެފަހަރު ޗެމްޕިއަންކަން ހޯދީ ބްރެޒިލެވެ. އާޖެންޓީނާ އަށް ކޮޕާ އެމެރިކާ އެންމެ ފަހުން ކާމިޔާބުކުރެވުނީ 1993 ވަނަ އަހަރު އެވެ. މެކްސިކޯ ބަލިކޮށް އެފަހަރުގެ މުބާރާތް ކާމިޔާބުކުރިފަހުން ކޮޕާ އެމެރިކާގެ ފައިނަލުގައި އާޖެންޓީނާ ވަނީ ހަތަރު ފަހަރު ބަލިވެފަ އެވެ. 2004 ވަނަ އަހަރާއި 2007 ވަނަ އަހަރުގެ ކޮޕާ އެމެރިކާ ފައިނަލުގައި ބްރެޒިލް އަތުން ބަލިވިއިރު 2015 އަދި 2016 ވަނަ އަހަރު ބަލިވީ ޗިލީއާ ވާދަކޮށެވެ. މި ހަތަރު މުބާރާތުގެ ތެރެއިން ތިން ފަހަރު އާޖެންޓީނާ އަށް ނާކާމިޔާބުވީ ޕެނަލްޓީގަ އެވެ.

މުބާރާތުގެ ތިން ވަނަ ހޮވާ މެޗުގައި އަންނަ ހޮނިހިރު ދުވަހުގެ ފަތިހު ކުޅޭ މެޗުގައި ބައްދަލުކުރާނީ ސެމީގައި ބަލިވި ޕެރޫ އާއި ކޮލަމްބިއާ އެވެ. މެރަކާނާ ސްޓޭޑިއަމްގައި ބްރެޒިލާއި އާޖެންޓީނާ ވާދަކުރާ މެޗު އޮންނާނީ އަންނަ އާދީއްތަ ދުވަހު ރާއްޖެ ގަޑިން ފަތިހު 5 ޖަހާއިރު އެވެ.

Advertisement