ނެދަލޭންޑްސް ސިއްސުވާލުމަށްފަހު ޗެކް ރިޕަބްލިކް ކުއާޓާ ފައިނަލަށް

ޔޫރޯ ފުޓްބޯޅަ މުބާރާތުގެ ގަދަ 16 ގައި މިރޭ ނެދަލޭންޑްސް އާ ވާދަކޮށް ކުޅުނު މެޗް ކާމިޔާބުކޮށް ޗެކް ރިޕަބްލިކުން މުބާރާތުގެ ކުއާޓާ ފައިނަލުން ޖާގަ ހޯދައިފި އެވެ. ގްރޫޕް ސްޓޭޖްގެ ހުރިހާ މެޗެއް ކާމިޔާބުކޮށް ހްރޫޕްގެ އެއްވަނަ ހޯދައިގެން ގަދަ 16 ގެ ޖާގައެއް ކަށަވަރުކުރި ނެދަލޭންޑްސްގެ މައްޗަށް ޗެކް ރިޕަބްލިކުން ކުރި ހޯދީ 0-2 އިންނެވެ.

މުބާރާތުގެ ކުއާޓާ ފައިނަލްގައި ޗެކް ރިޕަބްލިކް ވާދަކުރަންޖެހޭނީ ޑެންމާކާ އެވެ. ޑެންމާކް މުބާރާތުގެ ކުއާޓާ ފައިނަލުން ޖާގަ ހޯދީ ރޭ ކުޅުނު ގަދަ 16 ގެ ފުރަތަމަ މެޗުގައި 0-4 އިން ވޭލްސް ބަލިކޮށްގެންނެވެ.

Advertisement

މިރޭގެ މެޗްގައި ނެދަލޭންޑްސް އަށް މައްސަލަތަކާ ކުރިމަތިވީ ފަހު ހާފު ފަށައިގެން ދިހަ ވަރަކަށް މިނެޓް ވީ ތަނާ އެ ޓީމްގެ އިތުބާރު ޑިފެންޑަރު މަތިއެސް ޑި ލިޓް އަށް ރަތްކާޑު ދެއްކުމާއެކު 10 ކުޅުންތެރިންނާއެކު ކުޅެން ޖެހުނު ހިސާބުން ފެށިގެންނެވެ. ޔުވެންޓަސް އަށް ކުޅެމުން އަންނަ ޑި ލިޓް އަށް ރަތް ކާޑު ދެއްކީ ޗެކް ރިޕަބްލިކްގެ ކުޅުންތެރިއަކު ނެދަލޭންޑްސްގެ ޕެނަލްޓީ އޭރިޔާ ތެރެއަށް  ބޯޅަ ހިފައިގެން ވަންނަން އުޅެނިކޮށް ގަސްދުގައި ބޯޅައިގައި އަތްލުމުންނެވެ.

ޗެކް ރިޕަބްލިކުން މިރޭގެ މެޗުގައި ޖެހި ދެ ލަނޑުގެ ތެރެއިން ފުރަތަމަ ލަނޑު މެޗްގެ 68 ވަނަ މިނެޓްގައި ކާމިޔާބުކުރީ ސްލާވިއާ ޕްރާގަށް ކުޅެމުން އަންނަ ޑިފެންޑަރު ތޯމަސް ހޯލް ސް އެވެ. ދެވަނަ ލަނޑު މެޗް ނިމެން ދިހަ މިނެޓަށް ވެފައި ވަނިކޮށް ޗެކް ރިޕަބްލިކަށް ކާމިޔާބުކޮށްދިނީ ބަޔާ  ލެވަކޫސަންއަށް ކުޅެމުން އަންނަ ފޯވާޑް ޕެޓްރިކް ޝިކެވެ. މިއީ ޝިކް މިފަހަރުގެ މުބާރާތުގައި ކާމިޔާބުކުރި ހަތަރުވަނަ ގޯލެވެ.

Advertisement