މަރުގެ ގުރޫޕުން ޖަރުމަނު ސަލާމަތްވި އިރު ކުރިމަތީގައި އޮތީ އިންގްލެންޑް

މިފަހަރުގެ ޔޫރޯ ފުޓްބޯޅަ މުބާރާތުގެ އެންމެ ވަރުގަދަ ގްރޫޕްގެ ގޮތުގައި ބެލެވުނު ގްރޫޕް އެފްގެ އެންމެ ފަހު މެޗްގައި ހަންގޭރީ އާ އެއްވަރުކޮށް ޖަރުމަނުން މުބާރާތުގެ ނޮކައުޓް ސްޓޭޖުން ޖާގައެއް ކަށަވަރު ކުރި އިރު ގަދަ 16 ގައި ކުޅެން ޖެހޭ މެޗްގައި އިންގްލެންޑާ ވާދަކުރަން ޖެހިއްޖެ އެވެ. ރޭ ޖަރުމަނުން ހަންގޭރީ އާ ދެކޮޅަށް ކުޅުނު މެޗް އެއްވަރުވީ 2-2 އިންނެވެ.

ޔޫރޯ ފުޓްބޯޅަ މުބާރާތް ތިން ފަހަރު ކާމިޔާބުކޮށްފައިވާ ޖަރުމަނަށް ގަދަ 16 އިން ފުރުސަތު ލިބުނީ ގްރޫޕްގެ ތިން ވަނަ ޓީމްގެ ގޮތުގަ އެވެ. ރޭ ހަންގޭރީ އާ ދެކޮޅަށް ޖަރުމަނު ކުޅުނު މެޗްގައި ޖަރުމަނުން އެއްވަރުކޮށްފައި ވަނީ ހަންގޭރީން ދެ ފަހަރު ލީޑް ނަގައިފައިވަނިކޮށެވެ. މެޗްގައި ޖަރުމަނުން ޖެހި ދެ ލަނޑުގެ ތެރެއިން ފުރަތަމަ ލަނޑު ޗެލްސީއަށް ކުޅެމުން އަންނަ އެޓޭކިންގް މިޑްފީލްޑަރު ކައި ހަވާޓްސް ކާމިޔާބުކުރި އިރު ދެ ވަނަ ލަނޑު މެޗް ނިމެން ހަ މިނެޓަށް ވެފައި ވަނިކޮށް ކާމިޔާބުކުރީ ބަޔާން މިޔުނިކްގެ މިޑްފީލްޑަރު ލިއޮން ގޮރެޒްކާ އެވެ.

Advertisement

ގްރޫޕް އެފްގައި ރޭ ކުޅުނު އަނެއް މެޗްގައި ޕޯޗްގަލް އާ ފްރާންސް ވާދަކޮށްގެންވެސް ވީ ހަމަ 2-2 އިން އެއްވަރެވެ. އެ ނަތީޖާ އާއެކު ފަސް ޕޮއިންޓް ހޯދައިގެން ގްރޫޕްގެ އެއް ވަނަ ފްރާންސަށް ލިބުނު އިރު ހަތަރު ޕޮއިންޓާއި ގޯލްގެ ތަފާތުން ދެވަނަ ލިބުނީ ޕޯޗްގަލަށެވެ. އެންމެ ފަހުގެ ޔޫރޯ މުބާރާތުގެ ފައިނަލްގައި ބައްދަލުކުރި މި ދެ ޓީމްގެ ފޯރިގަދަ ކުރިމަތިލުމުގައި ޕޯޗްގަލުން ޖެހި ދެ ލަނޑު އެ ޓީމްގެ ތަރި ކްރިސްޓިއާނޯ ރޮނާލްޑޯ ކާމިޔާބުކުރި އިރު ފްރާންސުން ޖެހި ދެ ލަނޑު ކާމިޔާބުކުރީ ހަ އަހަރު ދުވަހަށް ފަހު އަލުން ގައުމީ ޓީމުން މިފަހަރު ޖާގަ ލިބުނު ކަރިމް ބެންޒެމާ  އެވެ. ރޭގެ މެޗްގައި ޖެހި ދެ ލަނޑާއެކު ރޮނާލްޑޯ މި މުބާރާތުގައި ޖެހި ގޯލްގެ އަދަދު ފަހަކަށް އެރިއިރު ބެންޒެމާ ރޭ ޕޯޗްގަލް ކޮޅަށް ވައްދާލި ދެ ގޯލަކީ ޔޫރޯ ފުޓްބޯޅަ މުބާރާތުގައި މިހާތަނަށް އޭނާ ކާމިޔާބުކުރި ހަމައެކަނި ދެ ގޯލެވެ.

ޖަރުމަނާއި އިންގްލެންޑް މުބާރާތުގެ ގަދަ 16 ގައި ވާދަކުރާ މެޗް އޮންނާނީ އަންނަ ހަފްތާގެ އަންގާރަ ދުވަހުގެ ރެ އެވެ. އިންގްލެންޑް މުބާރާތުގެ ނޮކައުޓް ބުރުން ޖާގަ ހޯދައިފައިވަނީ ގްރޫޕް ޑީގެ އެއްވަނަ ޓީމްގެ ގޮތުގަ އެވެ.

މަރުގެ ގްރޫޕްގައި ހިެނުނު ޕޯޗްގަލަށް ގަދަ 16 ގައި ދެނިޔޭގެ އެއްވަނައިގައި އޮތް ބެލްޖިއަމާ ވާދަކުރަން ޖެހޭ އިރު ފްރާންސް އަށް ލައްވާލީ ސްވިޒަލޭންޑެވެ.

Advertisement