ނެދަލެންޑްސްއާ އެކު އޮސްޓްރިއާ އިން ގަދަ 16 ޔަގީންކޮށްފި

ޔޫއެފާ ޔޫރޯ ފުޓްބޯޅަ މުބާރާތުގެ ގްރޫޕް ސީ އިން ގަދަ 16 ގެ ޖާގަ ނެދަލެންޑްސްއާ އެކު އޮސްޓްރިއާ އިން ހޯދައިފި އެވެ.

މިރޭ ކުޅުނު މެޗުގައި ނެދަލެންޑްސް އިން 0-3 އިން ނޯތު މެސަޑޯނިއާ ބަލިކުރިއިރު އޮސްޓްރިއާ އިން ވަނީ 1-0 އިން ޔޫކްރޭން ބަލިކޮށްފަ އެވެ.

މި ގްރޫޕްގެ އެއް ވަނަ 9 ޕޮއިންޓާ އެކު ނެދަލެންޑްސް ކަށަވަރު ކުރިއިރު ދެ ވަނަ ހޯދި އޮސްޓްރިއާ އަށް ވަނީ 6 ޕޮއިންޓް ލިބިފަ އެވެ. 3 ޕޮއިންޓާ އެކު މިވަގުތު ތިން ވަނައިގައި އޮތް ޔޫކްރޭނަށް ގަދަ 16 ގެ ފުރުސަތު އަދި ނުގެއްލެ އެވެ. ފުލަށް ދިޔަ ނޯތު މެސަޑޯނިއާ ވަނީ ގްރޫޕް ސްޓޭޖުގެ ތިން މެޗުން ވެސް ބަލިވެފަ އެވެ.

ނެދަލެންޑްސްގެ އަމްސްޓެޑަމްގައި އޮންނަ ޔޯހަން ކްރައިފް އެރީނާގައި 12 ހާސް ސަޕޯޓަރުން ކުރިމަތީ ކުޅުނު މެޗަށް ނުކުތުމުގެ ކުރިން އެޓީމުން އޮތީ ގްރޫޕްގެ އެއް ވަނަ ކަށަވަރުކޮށްފަ އެވެ. މެޗުގައި ނެދަލެންޑްސްގެ ތިން ގޯލުގެ ތެރެއިން ދެ ގޯލު ގިނީ ވައިނަލްޑަމް ޖެހިއިރު އަނެއް ގޯލު ކާމިޔާބުކޮށްދިނީ ދާދިފަހުން ބާސެލޯނާ އަށް ބަދަލުވި މެމްފިސް ޑިޕާއި އެވެ. އެންމެ ފަހުން ކުޅުނު 10 މެޗުގައި ޑިޕާއި ވަނީ ނެދަލެންޑްސް އަށް ނުވަ ލަނޑު ޖަހައިދީ ތިން ލަނޑު ޖަހަން އެހީތެރިވެދީފަ އެވެ.

މުބާރާތުގެ ގަދަ 16 ގައި ނެދަލެންޑްސް ވާދަކުރަން ޖެހޭނީ ގްރޫޕް ޑީ، އީ ނުވަތަ އެފް ގްރޫޕުން ތިން ވަނަ ހޯދާ ޓީމަކާ އެވެ. މި ގްރޫޕްތަކުގެ ތެރެއިން ގްރޫޕް އެފްގައި ޕޯޗުގަލް އާއި ފްރާންސް އަދި ޖަރުމަނު ހިމެނެ އެވެ. ނެދަލެންޑްސް ކުޅޭ ގަދަ 16 ގެ މެޗު ޖޫން 17 ވަނަ ދުވަހު ކުޅޭނީ ހަންގޭރީގަ އެވެ.

ޔޫރޯ އަށް އަލަށް ކޮލިފައިވުމުގައި މުހިއްމު ދައުރެއް އަދާކުރި ނޯތު މެސަޑޯނިއާގެ އުމުރުން 37 އަހަރުގެ ފޯވާޑް ގޯރަން ޕަންޑޭވް ވަނީ މި މުބާރާތަށް ފަހު ގައުމީ ޓީމަށް ކުޅުން ރަސްމީކޮށް ހުއްޓާލާފަ އެވެ. މެޗުގެ 69 ވަނަ މިނެޓުގައި ޕަންޑޭވް ބަދަލުކުރި ވަގުތު ނޯތު މެސަޑޯނިއާގެ ކުޅުންތެރިން ވަނީ އޭނާ އަށް ގާޑް އޮފް އޮނާއެއް އަރުވައިފަ އެވެ. އެގައުމަށް 122 މެޗު ކުޅެދިން ޕަންޑޭވް އަކީ 38 ގޯލާ އެކު އެގައުމުގެ ތާރީހުގައި އެންމެ ގިނަ ލަނޑު ޖަހައިދިން ކުޅުންތެރިޔާ އެވެ.

އޮސްޓްރިއާ އިން މިރޭ ހޯދި ހަނި މޮޅުގައި ހަމައެކަނި ލަނޑު އެޓީމަށް ކާމިޔާބުކޮށްދިނީ ކްރިސްޓޯފް ބައުމްގާޓްނާ އެވެ. މި ގޯލާ އެކު އުމުރުން 21 އަހަރުގެ ބައުމްގާޓްނާ ވެފައިވަނީ މިފަހަރުގެ ޔޫރޯގައި ގޯލު ޖެހި އެންމެ ޒުވާން ކުޅުންތެރިޔާ އަށެވެ. އަދި އޭނާ އަކީ އޮސްޓްރިއާގެ ފުޓްބޯޅަ ތާރީހުގައި ވެސް މި މުބާރާތުގައި ގޯލު ޖެހި އެންމެ ޒުވާން ކުޅުންތެރިޔާ އެވެ.

މިއީ އޮސްޓްރިއާ ޔޫރޯ ފުޓްބޯޅަ މުބާރާތުގެ ދެ ވަނަ ބުރުން ފުރުސަތު ހޯދި ފުރަތަމަ ފަހަރެވެ. އެންމެ ފަހުން އެޓީމަށް ބައިނަލްއަގްވާމީ މުބާރާތެއްގެ ދެ ވަނަ ބުރުން ފުރުސަތު ލިބިފައިވަނީ މީގެ 39 އަހަރު ކުރިންނެވެ. 1982 ވަނަ އަހަރު އެޓީމު ދަތުރުކުރީ އެ އަހަރު އޮތް ވޯލްޑް ކަޕްގެ ދެ ވަނަ ބުރަށެވެ.