ފަހަތުން އަރައި ޖަރުމަނުން ޕޯޗުގަލް ހަފުސްކޮށްފި

ޔޫއެފާ ޔޫރޯ ފުޓްބޯޅަ މުބާރާތުގައި މިރޭ ގްރޫޕް އެފްގައި ކުޅުނު މެޗުގައި ޖަރުމަނުން ފަހަތުން އަރައި 2-4 އިން ޕޯޗުގަލް ބަލިކޮށްފި އެވެ.

ބަޔާން މިއުނިކްގެ ސްޓޭޑިއަމްގައި ޕޯޗުގަލްއާ ވާދަކޮށް ހޯދި މުހިއްމު މޮޅާ އެކު ޖަރުމަނަށް ވަނީ ގަދަ 16 އަށް އެރުމުގެ ފުރުސަތު ފަހިވެފަ އެވެ. މި ގްރޫޕުގައި މިރޭ ހަންގޭރީ އާއި ފްރާންސް ވާދަކުރި މެޗު ނިމުނީ 1-1 އިން އެއްވަރުވެގެންނެވެ. ހަތަރު ޕޮއިންޓާ އެކު ފްރާންސް އެއް ވަނައިގައި އޮތްއިރު ދެ ވަނައިގައި އޮތް ޖަރުމަނާއި ތިން ވަނައިގައި އޮތް ޕޯޗުގަލަށް ލިބިފައިވަނީ 3 ޕޮއިންޓެވެ. ޖަރުމަނު ކުރީގައި އޮތީ ޕޯޗުގަލާ ވާދަކޮށް ހެޑް ޓު ހެޑް އުސޫލުން ކުރި ލިބޭތީ އެވެ. އެއް ޕޮއިންޓާ އެކު މިވަގުތު ހަންގޭރީ ފުލުގައި އޮތަސް އެޓީމަށް ވެސް ދެ ވަނަ ބުރު ފުރުސަތު އަދި ނުގެއްލެ އެވެ.

Advertisement

މެޗު ފަށައިގެން ފަސް ވަނަ މިނެޓުގައި ޖަރުމަނުގެ ޑިފެންޑަރު ރޮބިން ގޮސެންސް ޖެހި ގޯލެއް ވަނީ އޮފްސައިޑްވުމުން ކެންސަލްކޮށްފަ އެވެ. އޭގެ ދިހަ މިނެޓު ފަހުން ޕޯޗުގަލުން ވަނީ ކްރިސްޓިއާނޯ ރޮނާލްޑޯ ޖެހި ގޯލުން ލީޑު ނަގައިފަ އެވެ. މިއީ ޔޫރޯ ފުޓްބޯޅަ މުބާރާތުގެ ތާރީހުގައި ރޮނާލްޑޯ ޖެހި 12 ވަނަ ލަނޑެވެ. ޕޯޗުގަލް ކުރީގައި އޮއްވައި ފުރަތަމަ ހާފުގެ ފަހުކޮޅު ރުބެން ޑިއާސް އާއި ރަފައެލް ގަރޭރޯ އަތުން ބައިކޮޅަށް ވަން ގޯލުތަކާ އެކު ޖަރުމަނަށް ވަނީ ލީޑު ލިބިފަ އެވެ. އެޓީމުން ޕްރެޝަރުކޮށްގެން ކުޅުނު ވަގުތު މި ދެގޯލު ވެސް ވަނީ ޖަރުމަނުން ހުރަސްކޮށްލި ދެ ބޯޅައެއް ސާފުކޮށްލަން އުޅުނު ވަގުތު އެވެ.

ދެ ވަނަ ހާފު ވެސް ޖަރުމަނު ފެށީ ވަރުގަދަކޮށެވެ. މި ހާފު ފެށިގެން ހަ ވަނަ މިނެޓުގައި ގޮސެންސް ނަގައިދިން ހިތްގައިމު ހުރަހަކުން ޖަރުމަނުގެ ކައި ހަވާޓްޒް ވަނީ އެޓީމުގެ ތިން ވަނަ ލަނޑު ޖަހައިފަ އެވެ. މި ގޯލާ އެކު އުމުރުން 22 އަހަރުގެ ހަވާޓްޒް ވެފައިވަނީ ތޯމަސް މުލާ އަށް ފަހު ވޯލްޑް ކަޕާއި ޔޫރޯގައި ޖަރުމަނަށް ގޯލު ޖަހައިދިން އެންމެ ހަގު ކުޅުންތެރިޔާއަށެވެ. 60 ވަނަ މިނެޓުގައި ޖަރުމަނުގެ ހަތަރު ވަނަ ލަނޑު ބޮލުން ޖެހީ މެޗުގައި މޮޅު ކުޅުމެއް ދެއްކި ގޮސެންސް އެވެ. ތިން ގޯލުން ފަހަތުގައި އޮއްވައި ޕޯޗުގަލްގެ ދެ ވަނަ ލަނޑު މެޗުގެ 67 ވަނަ މިނެޓުގައި ރޮނާލްޑޯގެ އެހީތެރިކަމާ އެކު ޖެހީ ޑިއޯގޯ ޖޯޓާ އެވެ.

މިއީ ޕޯޗުގަލުން މިހާތަނަށް ވާދަކުރި 67 ބައިނަލްއަގްވާމީ މުބާރާތުގެ ތެރެއިން ބައިކޮޅަށް ހަތަރު ގޯލު މެޗެއްގައި ވަން ދެ ވަނަ ފަހަރެވެ. އެންމެ ފަހުން 2014 ވަނަ އަހަރުގެ ވޯލްޑް ކަޕްގައި ވެސް އެޓީމު ކޮޅަށް ހަތަރު ގޯލު ޖެހީ ޖަރުމަނުންނެވެ. އަނެއްކޮޅުން ޕޯޗުގަލް ވެފައިވަނީ ޗެމްޕިއަން ޓީމުގެ ހައިސިއްޔަތުން ޖެހިގެން އައި މުބާރާތުގައި މެޗެއްގައި ބައިކޮޅަށް ހަތަރު ގޯލު ވަން ފުރަތަމަ ޓީމަށެވެ.

Advertisement