ޔޫރޯގެ ރެކޯޑް މުގުރާލުމަށް ފަހު ރޮނާލްޑޯ ޕޯޗުގަލް މޮޅުކޮށްދީފި

ޔޫއެފާ ޔޫރޯގެ ދެ ރެކޯޑެއް މުގުރާލުމަށް ފަހު ކްރިސްޓިއާނޯ ރޮނާލްޑޯ މިރޭ ޕޯޗުގަލް މޮޅުކޮށްދީފި އެވެ. މި ފަހަރުގެ ޔޫރޯގައި ޕޯޗުގަލްގެ ފުރަތަމަ މެޗުން އެޓީމު މޮޅުވީ ހަންގޭރީއާ ވާދަކޮށް 3-0 އިންނެވެ.

މިރޭ މެޗު ފެށުމާ އެކު ރޮނާލްޑޯ ވެގެންގޮސްފައިވަނީ ޔޫރަޕިއަން ޗެމްޕިއަންޝިޕްގެ ތާރީހުގެ ފަސް މުބާރާތުގައި ކުޅުނު ފުރަތަމަ ކުޅުންތެރިޔާ އަށެވެ. އެންމެ ފުރަތަމަ 2004 ވަނަ އަހަރު އަމިއްލަ ގައުމުގައި އޮތް މުބާރާތުގައި ރޮނާލްޑޯ ކުޅުނުއިރު އޭގެފަހުން އޭނާ ވަނީ 2008، 2012 އަދި 2016 ވަނަ އަހަރު އޮތް ޔޫރޯގައި ކުޅެފަ އެވެ. 2004 ވަނަ އަހަރުގެ ފައިނަލުގައި ޕޯޗުގަލް ބަލިވިއިރު އެންމެ ފަހުގެ މުބާރާތުގެ ޗެމްޕިއަންކަން ރޮނާލްޑޯ ވަނީ ޕޯޗުގަލާ އެކު ހޯދާފަ އެވެ.

Advertisement

ރޮނާލްޑޯ އަށް ލިބުނު ޝަރަފްވެރި އަނެއް ރެކޯޑަކީ ޔޫރޯގެ ތާރީހުގައި އެންމެ ގިނަ ލަނޑު ޖެހި ކުޅުންތެރިޔާގެ ލަގަބެވެ. ޕޯޗުގަލްގެ ތިން ލަނޑުގެ ތެރެއިން މިރޭ ރޮނާލްޑޯ ޖެހި ދެ ގޯލާ އެކު އޭނާ ވަނީ މިހާތަނަށް މުބާރާތުގައި 11 ލަނޑު ޖަހައިފަ އެވެ. މި ލިސްޓުގެ ދެ ވަނައިގައި 9 ލަނޑާ އެކު އޮތީ ފްރާންސްގެ ކުރީގެ ތަރި މިޝެލް ޕްލަޓީނީ އަތުގަ އެވެ. ޕްލަޓީނީ މި 9 ގޯލު ވެސް ޖެހީ 1984 ވަނަ އަހަރުގެ މުބާރާތުގަ އެވެ. މެޗުގެ އެހެން ރެކޯޑަކަށް ބަލާއިރު ޕޯޗުގަލް ވެފައިވަނީ ޔޫރޯގެ ތާރީހުގައި މެޗުގެ ފަހު 10 މިނެޓުގައި ތިން ލަނޑު ޖެހި ހަމައެކަނި ގައުމަށެވެ.

ހަންގޭރީގެ ޕުސްކަސް ސްޓޭޑިއަމްގައި އެތައް ސަޕޯޓަރުންނެއް ބަލަންތިބި މިރޭގެ މެޗު ފަށައިގެން ކުރީކޮޅު ޕޯޗުގަލްގެ ޑިއޯގޯ ޖޯޓާ ފޮނުވާލި ބާރު ހަމަލާ ހަންގޭރީގެ ގޯލްކީޕަރު ވަނީ މަތަކޮށްފަ އެވެ. އަދި ފުރަތަމަ ހާފުގެ ފަހުކޮޅު ބްރޫނޯ ފެނާންޑޭޒް ނަގައިދިން ހުރަހެއްގައި ހުސްކޮށް ރޮނާލްޑޯ އަށް ލިބުނު ބޯޅަ ފޮނުވާލުމުން ދިޔައީ މާ މަތިންނެވެ.

މެޗުގެ ދެ ވަނަ ހާފުގައި ވެސް ހަންގޭރީން ވަނީ ވަރުގަދައަށް ޑިފެންސްކޮށް ޕޯޗުގަލަށް އުނދަގޫކޮށްފަ އެވެ. އެކަމަކު އެޓީމަށް އެގޮތުގައި ހިފަހައްޓާލެވުނީ 84 ވަނަ މިނެޓާ ހަމައަށެވެ. ޕޯޗުގަލްގެ ފުރަތަމަ ލަނޑު 84 ވަނަ މިނެޓުގައި ކާމިޔާބުކޮށްދިނީ ޑިފެންޑަރު ރަފައެލް ގަރޭރޯ އެވެ. އޭރިޔާ ބޭރުން އޭނާ ފޮނުވާލި ބޯޅަ ގޯލަށް ވަނީ ހަންގޭރީގެ ކުޅުންތެރިއެއްގެ ފައިގައި ޖެހިފައި މިސްރާބު ބަދަލުވެގެންނެވެ. އޭގެ ތިން މިނެޓު ފަހުން ރޮނާލްޑޯ ޕޯޗުގަލްގެ ލީޑު ފުޅާކޮށްދިނީ ރަފާ ސިލްވާ އަށް ކުރި ފައުލަކަށް ރެފްރީ ދިން ޕެނަލްޓީއެއް ވައްދާލައިގެންނެވެ. މެޗުގެ ފަހު ލަނޑު މެޗުގެ އިތުރު ވަގުތުގެ ދެ ވަނަ މިނެޓުގައި ރޮނާލްޑޯ ޖެހީ ރަފާ ސިލްވާގެ އެހީތެރިކަމާ އެކު އެވެ.

ޕޯޗުގަލް އާއި ހަންގޭރީ ހިމެނޭ ގްރޫޕް އެފްގައި މިރޭ 12 ޖަހާއިރު ކުޅޭ މެޗުގައި ބައްދަލުކުރާނީ ޖަރުމަނާއި ފްރާންސެވެ.

Advertisement