ރާއްޖެއިން ފިލިޕީންސްއާ އެއްވަރުކޮށްފި

ވޯލްޑް ކަޕާއި އޭޝިއަން ކަޕް ޖޮއިންޓް ކޮލިފިކޭޝަނުގައި ރާއްޖެ މިއަދު 1-1 އިން ފިލިޕީންސާ އެއްވަރު ކޮށްފިއެވެ.

މިރޭގެ މެޗާ އެކު ރާއްޖެއަށް ވަނީ އޭޝިއާ ސަރަހައްދުގެ ދެ ވަނަ ކޮލިފައިން ބުރު ނިމިފަ އެވެ. ފަސް ޓީމު ހިމެނޭ މި ގްރޫޕުން ހަތް ޕޮއިންޓާ އެކު ރާއްޖެ އަށް ލިބުނީ ހަތަރު ވަނަ އެވެ. މިރޭ ލިބުނު ޕޮއިންޓުގެ އިތުރުން އަނެއް 6 ޕޮއިންޓް ރާއްޖޭން ކަށަވަރުކުރީ ގުއާމާ ދެކޮޅަށް ކުޅުނު ދެ މެޗު ކާމިޔާބުކޮށްގެންނެވެ. ޕޮއިންޓެއް ނުލިބި ގުއާމް ދިޔައީ ގްރޫޕްގެ ފުލަށެވެ. ގްރޫޕުގެ އެއް ވަނަ ކަށަވަރުކުރީ މިހާރު 21 ޕޮއިންޓާ ހޯދާފައިވާ ސީރިއާ އެވެ. ދެ ވަނައިގައި 16 ޕޮއިންޓާ އެކު ޗައިނާ އޮތްއިރު ފިލިޕީންސަށް ތިން ވަނަ ލިބުނީ 11 ޕޮއިންޓާ އެކު އެވެ. މި ގްރޫޕުގެ ފަހު މެޗުގައި މިރޭ ރާއްޖެ ގަޑިން 11 ޖަހާއިރު ޗައިނާ އާއި ސީރިއާ ވާދަކުރާނެ އެވެ.

Advertisement

ހަމްޕު އަތުން ބޯޅަ ހޯދުމަށް ފިލިޕީންސްގެ ކުޅުންތެރިއަކު މަސައްކަތްކުރަނީ. – ފޮޓޯ: އިބްރާހީމް ފާއިދު / އެފްއޭއެމް

ރާއްޖެ ޕްލޭ އޮފް ބުރުގައި ވާދަކުރަން ޖެހުނީ ހަތަރު ވަނަ ކަށަވަރުކުރި ގައުމުތަކުގެ ތެރެއިން އެންމެ ދަށް ނަތީޖާ ލިބުނު ލިސްޓުގައި ހިމެނުމުންނެވެ. ހަތަރު ވަނަ ލިބުނު ގައުމުތަކުގެ ތެރެއިން ކޮލިފައިންގެ ތިން ވަނަ ބުރު ނުވަތަ ގްރޫޕް ސްޓޭޖުން ފުރުސަތު ލިބުނީ އަފްގާނިސްތާނާއި މޮންގޯލިއާގެ އިތުރުން މެލޭޝިއާ އަދި ސިންގަޕޫރެވެ. ރާއްޖޭގެ އިތުރުން ޕްލޭ އޮފް ކުޅެން ޖެހެނީ ނޭޕާލް އާއި ސްރީ ލަންކާ އަށެވެ.

ދުބާއީގައި ކުޅުނު މިރޭގެ މެޗު ރާއްޖޭން ފެށީ އަލީ ފާސިރު (ސެންޓޭ) ފުރަތަމަ އެގާރައިގައި ހިމަނައިގެންނެވެ. ޗައިނާ އާއި ސީރިއާއާ ދެކޮޅަށް ފުރަތަމަ އެގާރައިގައި ކުޅުނު އަހުމަދު ނޫމާން (ހެލްމެޓް) މިރޭ އިނީ ބެންޗުގަ އެވެ. މެޗަށް ރާއްޖެ ނުކުތީ ފިލިޕީންސް ބަލިކޮށް ކޮލިފައިންގެ ގްރޫޕް ސްޓޭޖަށް ދިއުމަށެވެ. މި ޓާގެޓް ހާސިލްކުރުމަށް ކުޅުންތެރިން ބުރަކޮށް މަސައްކަތްކޮށް ރަނގަޅު ކުޅުމެއް ދެއްކި އެވެ. މިދިޔަ ދެ މެޗާ ބަލާއިރު ޖުމްލަކޮށް ރާއްޖޭގެ ޓީމުން ފެނުނީ މޮޅު ކުޅުމެކެވެ.

ސެންޓޭގެ ގޯލަށް ފަހު ރާއްޖޭގެ ކުޅުންތެރިން އުފާފާޅުކުރަނީ. – ފޮޓޯ: އިބްރާހީމް ފާއިދު / އެފްއޭއެމް

މެޗުގައި އެންމެ ފުރަތަމަ ގޯލު ޖެހީ ފިލިޕީންސުންނެވެ. 19 ވަނަ މިނެޓުގައި އެންޖެލް ގިރާޑޯ އޭރިޔާ ބޭރުން ފޮނުވާލި ބޯޅަ ފެނު ޖެހިފައި ގޮސް ވަނީ ގޯލުގެ ތިރީ ކަނަށެވެ. ފިލިޕީންސުން ލީޑު ނެގުމުގެ ކުރިން ރާއްޖޭގެ ޓީމުގެ ހަމްޒާ މުހައްމަދު (ހަމްޕު) ފޮނުވާލި ނުރައްކާތެރި ބޯޅައެއް ފިލިޕީންސްގެ ކީޕަރު ވަނީ މަތަކޮށްފަ އެވެ. ރާއްޖޭން މެޗުގެ ނަތީޖާ ހަމަހަމަ ކުރި ލަނޑު ކާމިޔާބުކޮށްދިނީ ސެންޓޭ އެވެ. އޭރިޔާ ބޭރުން ލިބުނު ބޯޅަ ހިފައިގެން ގޮސް ސެންޓޭ ތިރިތިރިން ފޮނުވާލި ބޯޅަ ވަނީ ގޯލުގެ ތިރީ ކަނަށެވެ. މެޗުގެ ފަހުކޮޅު ފިލިޕީންސުން ކުރިއަށް ޖެހިގެން ކުޅުނުއިރު އެޓިމުން އުފެއްދި ހަމަލާތައް ހުއްޓުވުމުގައި ރާއްޖޭގެ ކުޅުންތެރިން ފެނުނީ ހުށިޔާރުކޮށެވެ.

Advertisement