މިފަހަރުގެ ޔޫރޯ ގައި ރޮނާލްޑޯ އަށް ރެކޯޑް އަތުވާނެބާ؟

ޔޫރޯ 2020 ގެ ފުރަތަމަ މެޗަށް މިރޭ ހަންގޭރީ އާއި ދެކޮޅަށް ޕޯޗުގަލް ޓީމާއެކު ކްރިސްޓިއާނޯ ރޮނާލްޑޯ ނިކުންނައިރު ގައުމީ ޓީމަށް އެންމެ ގިނަ ގޯލް ޖަހައިދިން ކުޅުންތެރިޔާގެ ރެކޯޑާއި އަރާހަމަކުރަން އޭނާއަށް ބޭނުންވަނީ އެންމެ ފަސް ގޯލެވެ. ރޮނާލްޑޯ ގައުމީ ޓީމަށް ޖަހައިދިން ފުރަތަމަ ގޯލް އައީ 2004 ގެ ޔޫރޯގަ އެވެ. އެމުބާރާތުގެ ފުރަތަމަ މެޗުގައި ގްރީސް ކޮޅަށް މެޗްގެ 93 ވަނަ މިނެޓްގައި ލުއިސް ފީގޯ ނަގައިދިން ކޯނަރު ބޮލުން ޖަހައި ގޯލަށް ވައްދާލިޔަސް 2-1 އިން އެމެޗުން ބަލިވުމާއެކު އެގޯލް އެއީ އެމެޗަކަށް މުހިއްމު ގޯލަކަށް ނުވި އެވެ. އެހެންނަމަވެސް އެއީ ރޮނާލްޑޯ ބައިނަލްއަގުވާމީ ކެރިއަރުގެ ފެށުމެވެ. 104 ގޯލާއެކު މިހާރު ލިސްޓުގެ ދެ ވަނައިގައި އޮތްއިރު އެލިސްޓުގެ އެއް ވަނައިގައި އޮތީ 109 ގޯލާއެކު އީރާނުގެ ކުރީގެ ތަރި އަލީ ދާއީ އެވެ. އުމުރުން 36 އަހަރުގެ ކްރިސްޓިއާނޯ ރޮނާލްޑޯ ޕޯޗުގަލް ޓީމަށް އެންމެ ގިނަ ގޯލް ޖަހައިދިން ކުޅުންތެރިޔާގެ ރެކޯޑް 48 ގޯލާއެކު ހެދީ 2013 ގަ އެވެ. އަދި 85 ގޯލާއެކު ޔޫރަޕްގެ ލިސްޓުގެ އެއް ވަނަ ހޯދީ 2018 ގަ އެވެ. ރޮނާލްޑޯ 100 ގޯލް ހަމަކުރީ 2020 ގެ ސެޕްޓެމްބަރުގަ އެވެ. ރޮނާލްޑޯގެ 105 ގޯލުގެ ތެރެއިން 56 ގޯލް ކަނާތު ފައިން ޖެހިއިރު 23 ގޯލްޖެހީ ވާތު ފައިންނެވެ. 25 ގޯލް ބޮލުންޖެހިއިރު ޕެނަލްޓީ ސްޕޮޓުން ޖަހާފައިވަނީ 11 ގޯލެވެ. ރޮނާލްޑޯ މިހާތަނަށް ޕޯޗުގަލް ޓީމަށް 172 މެޗް ކުޅެދީފައިވާއިރު މެޗަކަށް 0.60 ގޯލް ޖަހާފައިވެ އެވެ.

މި ފަހަރުގެ ޔޫރޯގައި ޕޯޗުގަލްއާ އެކު ގުރޫޕް އެފް ގައި ހިމެނޭ ޖަރުމަނު އަދި ފްރާންސް ކޮޅަށް މިހާތަނަށް ރޮނާލްޑޯއަށް ގޯލެއް ޖެހިފައެއް ނުވެ އެވެ. އެހެންނަމަވެސް މިރޭ އިދިކޮޅަށް ނިކުންނަ ޓީމުކަމަށްވާ ހަންގޭރީ ކޮޅަށް 4 ގޯލް ޖަހާފައިވެ އެވެ. ޔޫރޯގައި މިހާތަނަށް އެންމެ ގިނަގޯލް ޖަހާފައިވާ ކުޅުންތެރިޔާގެ ރެކޯޑްވެސް އޮތީ ރޮނާލްޑޯއަތުގަ އެވެ. އެރެކޯޑް މުޅިން އަމިއްލަކުރަން ރޮނާލްޑޯ މިޔޫރޯގައި އެއް ގޯލް ނަމަވެސް ޖަހަން ޖެހެ އެވެ. މިވަގުތު 9 ގޯލް ޖަހައިގެން ރޮނާލްޑޯއާ އެކު އެ ރެކޯޑް ޝެއަރ ކުރަނީ ފްރާންސްގެ ލެޖެންޑް މިޝޭލް ޕްލެޓީނީ އެވެ.

Advertisement

“ރޯނާލްޑޯއަކީ ހަމައެކަނި މިޖީލުގެ އެންމެ މޮޅުކުޅުންތެރިޔާއެއްނޫން. އަދީކީއް؟ އޭނާއަކީ ފުޓްބޯޅައިގައި މިހާތަނަށްއައި ހުރިހާ ޖީލަކަށް ބެލިޔަސް އެންމެމޮޅުއެކަކު، އޭނާ އަހަރެންގެ ރެކޯޑް މުގުރާލައިފިނަމަ އަހަރެން އޭނާއަށް މަރުހަބާ ކިޔާނަން. އެކަމަކު ފުރަތަމަ ބަލަމާ ހިނގާ އޭނާއަށް އެހިސާބަށް ދެވޭތޯ” އީރާނުގެ އަލީ ދާއީ މިދިޔައަހަރު ރޮނާލްޑޯ 100 ގޯލު ހަމަކުރުމާއެކު އޭނާގެ ޝުއޫރުފާޅުކުރީ މިގޮތަށެވެ.

މި ޔޫރޯގައި އޭނާއަށް އެހިސާބަށް ދެވިދާނެތޯ ނުވަތަ ނޫންތޯ މި ސުވާލަށް ޖަވާބުދޭން ބަލާއިރު ފުރަތަމަ ބުރުގައި ކުރިންވެސް ބުނިހެން ރޮނާލްޑޯ މިނުކުންނަނީ ގޯލު ޖެހުމުގައި އޭނާއަށް އެހާ ކާމިޔާބު ނޫން ޓީމުތަކާއި ދެކޮޅަށެވެ. އަނެއްކޮޅުން ދެވަނަ ބުރަށް ގޮސްފިނަމަ ފަހަރެއްގައި އިނގިރޭސިންނާއި ކުޅެންޖެހުމަކީވެސް އެކަށީގެންވާކަމެކެވެ. ރޮނާލްޑޯއަށް މިހާތަނަށް އިނގިރޭސި ޓީމުކޮޅަށްވެސް ގޯލެއް ޖެހިފައެއްނުވެ އެވެ. އަނެއްކޮޅުން ޔޫރޯގެ ތާރީހުގައި މުބާރާތުގައި އެންމެ ގިނަ ގޯލްޖަހާ ކުޅުންތެރިޔާއަށް 5 ގޯލަށްވުރެ ގިނައިން ޖެހިފައިވަނީ އެންމެ ދެފަހަރު އެވެ. އެއީ 2016ގެ މުބާރާތުގައި 6 ގޯލް ޖެހި އޮންޓުއަން ގްރީޒްމަން އާއި 1984ގެ މުބާރާތުގައި 9 ގޯލްޖެހި މިޝޭލް ޕްލެޓިނީ އެވެ. އެހެންކަމުން ޔޫރޯ 2020ގައި މިރެކޯޑު އަތުވުމަކީ ވުމަށްވުރެ ނުވުން ގާތްކަމެއްކަމަށް ބެލެވެ އެވެ. އެހެންނަމަވެސް 2016 އާއި ބަލާއިރު ގޯލްޖެހުމުގައި ރޮނާލްޑޯއަށް އެހީތެރިވެދޭނެ ކުޅުންތެރިން ޕޯޗްގަލް ޓީމުގައި ގިނަކަމުގައި ބުނެވިދާނެ އެވެ. މިދިޔަ މުބާރާތާއި ހިލާފަށް ރޮނާލްޑޯ ނޫނަސް ޕޯޗްގަލް ޓީމުގައި މަޝްހޫރުތަރިން މިހާރު ގިނަ އެވެ. ބްރޫނޯ ފެނާންޑޭޒް، ޔާއޯ ކަންސެލޯ، ރުބެން ޑިއާސް، ބެނާޑޯ ސިލްވާ، ޔާއޯ ފީލިކްސް، ޑިއޯގޯ ޖޯޓާ މިއީ ހައްތަހާވެސް ރޮނާލްޑޯއަށް އެސިސްޓް ދޭނޭ ކުޅުންތެރިންނެވެ. އެހެންކަމުން ވާގޮތެއް ބަލަން ތިބެމާ ހިނގާށެވެ.

ކޮންމެއަކަސް ރެކޯޑް ހެދުމާއި ގާތަށް ރޮނާލްޑޯ ޖެހިލާފައިވާއިރު ރޮނާލްޑޯ އެރެކޯޑު ހަދާފަހުން އޭނާއަތުން އެރެކޯޑު އަތުލާނެ ކުޅުންތެރިއަކު މިވަގުތު ހުރިތޯވެސް ބަލާލަން އެބަޖެހެ އެވެ. ރޮނާލްޑޯ ފަދައިން ފޯމު ގިނަދުވަސްތަކަކަށް އަދިވެސް ދަމަހައްޓައިފިނަމަ އެތަހުތުން ރޮނާލްޑޯ ބޭލޭނެވަރުގެ ކުޅުންތެރިން އެބަތިއްބެވެ. ލަނޑު ލިސްޓުގެ 3 ވަނައިގައި އޮތީ 74 ގޯލާއެކު އިންޑިއާގެ 36 އަހަރުގެ ސުނިލް ޗެތުރީ އެވެ. ރޮނާލްޑޯ އާއި އެންމެ ވާދަވެރި އާޖެންޓީނާގެ ލިއޮނެލް މެސީ އަށް މިމަހު 34 އަހަރު ފުރޭއިރު ލިސްޓުގެ ހަތަރު ވަނައިގައި އޮތީ 73 ގޯލް ޖަހައިގެންނެވެ. ޕޮލެންޑްގެ 32 އަހަރުގެ ރޮބާޓް ލެވަންޑޮސްކީ (66 ގޯލް) ބްރެޒިލްގެ ނޭމާ (66 ގޯލް)، އުރުގުއޭގެ ލުއިސް ސުއަރޭޒް (62 ގޯލް) އަދި ސްވިޑެންގެ ޒަލަޓާން އިބްރަހިމޮވިޗް (62 ގޯލް) މިއީ ހައްތާވެސް މިލިސްޓުގައި ހިމެނޭ މަޝްހޫރުތަރިންނެވެ. މީގެ ތެރޭގައި ރޮނާލްޑޯ ބަލިކުރެވޭވަރުގެ ކުޅުންތެރިއެއް އެބަހުރިބާވަ އެވެ. ފަހަރެއްގައި މެސީއަށް ނޫނީ ނޭމާއަށް އެކަން ވެދާނެކަންނޭނގެ އެވެ.

ޔޫރަޕުގައި މިހާރު ހަރަކާތްތެރި މަޝްހޫރު ފޯވާޑުންނަށް ބަލާއިރު ބެލްޖިއަމްގެ ރޮމެލޫ ލުކާކޫ ވަނީ 62 ގޯލް ޖަހާފަ އެވެ. ލުކާކޫ ވަނީ ޔޫރޯ2020ގެ ފުރަތަމަ މެޗުގައިވެސް 2 ގޯލް ޖަހާފަ އެވެ. ފަހަރެއްގައި އަހަރުތަކެއް ފަހުން ރޮނާލްޑޯއަށް އެންމެ ނުރައްކާކުރާނީ ލުކާކޫ ކަމަށްވެސް ވެދާނެ އެވެ. އިނގިރޭސި ޓީމުގެ ހެރީ ކޭން (54 މެޗުން 34 ގޯލް) އާއި ފްރާންސް ޓީމުގެ ކިލިއަން އެމްބާޕޭ (43 މެޗުން 17 ގޯލް) އަކީ ވެސް ލަނޑުޖެހުމުގައި ކާމިޔާބު ކުޅުންތެރިންނެވެ. އެކަމަކު ކޭން އަށް ފުރަތަމަ ޖެހޭނީ 54 ގޯލާއެކު އިނގިރޭސި ޓީމަށް އެންމެ ގިނަގޯލްޖަހައިދިން ކުޅުންތެރިޔާގެ ރެކޯޑު ވޭން ރޫނީ އަތުން އަތުލާށެވެ. ރޮނާލްޑޯއާއި ހަމައަށް ދާން ވިސްނޭނީ އޭގެ ފަހުންނެވެ. 22 އަހަރުގެ އެމްބާޕޭގެ ކުރިމަގު އަދި އޮތްގޮތަށް އޮތީ އެވެ. ކުރިއަށް އޮތްތާގައި ގިނަ ރެކޯޑްތަކެއް ހަދާނެ ކުޅުންތެރިއަކަށް އެމްބާޕޭ ވާނެކަމަށް ގިނަބަޔަކު ބުނެ އެވެ. އިތުރަށް ބަލާނަމަ ނޯވޭގެ އާލިން ހާލާންޑް އަކީވެސް ފާހަގަ ކޮށްލަން ޖެހޭ ތަރިއެކެވެ. ހާލާންޑް ވަނީ މިހާތަނަށް ނޯވޭއަށް ކުޅެދިން 12 މެޗްގައި 7 ގޯލް ޖަހާފައެވެ. އެހެންނަމަވެސް ނޯވޭއަކީ ދުނިޔޭގެ ފުޓްބޯޅައިގެ ބޮޑު ބާރާކަށް ނުވުން އެއީ ހާލާންޑަށް ދިމާވާނެ ހުރަހެއްކަމަށް ވެދާނެ އެވެ.

ކޮންމެއަކަސް ރޮނާލްޑޯއަށް ގައުމީ ޓީމަށް އެންމެ ގިނަ ގޯލްޖެހުމުގެ ރެކޯޑު ޔޫރޯ 2020ގައި މުގުރާލެވިދާނެތޯ ކުރެވޭ ސުވާލުގައި ގިނަބަޔަކު ބުރަވާނީ އޭނާއަށް މި މުބާރާތުގައި އެކަން ނުވާނެ ކޮޅަށް ކަމަށް ހީވެ އެވެ. އެހެންނަމަވެސް ރޮނާލްޑޯގެ ކެރިއަރު ނިމުމުގެ ކުރިން އެރެކޯޑް އޭނާ ހޯދާނެކަމާމެދު ޝައްކުކުރާނީ ވަރަށް މަދުބައެކެވެ. އެއީ ޔޫރޯ ނިމުމާއެކު ވޯލްޑް ކަޕް2022ގެ  ކޮލިފައިން އަނެއްކާވެސް ފެށޭނެ އެވެ. އެހިސާބުން މަންޒިލަށް ވާސިލުވުމަށް ރޮނާލްޑޯއަށް ދާދި ފަސޭހަވާނެއެވެ.

“އަހަރެން 100 ގޯލްގެ ފާހަގައާއި ހަމައަށް އަތުވެއްޖައިން. ދެން އޮތީ ރެކޯޑު.” މިދިޔަ ސެޕްޓެމްބަރުމަހު ރޮނާލްޑޯ ބުނެފައިވެ އެވެ.

“ފިޔަވަޅަކަށްފަހު ފިޔަވަޅެއް، ރެކޯޑަކާއިހެދި އަހަރެން އެވަރަކުން ނޫޅެން، އޭގެ ވަގުތު ޖެހުނީމަ އެ އަންނާނެ.” ރޮނާލްޑޯގެ ބަސްމަގު މިގޮތަށް ހުރިކަމުގައި ވިޔަސް އޭނާގެ އަމަލުތައް ހުންނަގޮތުން ރެކޯޑަކީ އޭނާއަށް ކިހާ މުހިއްމު އެއްޗެއްކަން ބަލާމީހުންނަށް އެނގެ އެވެ. އެންމެފަހުން ވޯލްޑް ކަޕް ކޮލިފައިންގައި ސާބިއާ ކޮޅަށް އެންމެފަހު ވަގުތު އޭނާ ޖެހި ރަނގަޅު ގޯލެއް ރެފްރީ ގަބޫލުނުކުރުމުން ރޮނާލްޑޯ ކަންތައްކުރިގޮތް ފެނުނު މީހަކަށް ވިއްޔާ މިބުނީ ކީކޭކަން އެނގޭނެ އެވެ.

Advertisement