މިފަހަރުގެ ޔޫރޯ އަށް ނުކުންނަ އެންމެ މޮޅު 11

ޔޫރޯ 2020 މިރޭ ފެށޭއިރު ދުނިޔޭގައި ތިބި އެންމެ މަޝްހޫރު މޮޅެތި ގިނަ ކުޅުންތެރިންގެ ކުޅުން ބަލާލުމުގެ ފުރުސަތު އަހަރުމެންނަށް ލިބިގެންދާނެއެވެ. މިހާރު އެންމެ މަޝްހޫރު ކުޅުންތެރިންގެ ކުޅުން މި މުބާރާތުގައި ފެނިގެންދާނެ ގޮތަކާއި މެދު ފޭނުންގެ މެދުގައި މިހާރުވެސް ޒުވާބު ހިނގާނެ އެވެ. ހަމައެއާއެކު ތޮށިގަނޑު ފަޅާލާފައި ނިކުމެ އަލަށް މި ކުޅިވަރުގެ މަތީ ހަރުފަތަށް މި މުބާރާތުގެ ތެރެއިން ވާސިލުވާނޭ ކުޅުންތެރިންނަކީ ކޮބައިތޯވެސް އަހާ އެޒުވާބު ކުރެވޭނެ އެވެ. ކޮންމެއަކަސް މުބާރާތް ފެށިގެންދާއިރު މި މުބާރާތުގެ މިވަގުތުގެ ގަދަ 11 ނުވަތަ ހުވަފެނީ ޓީމަކީ ކޮބައިތޯ އަހައިފިނަމަ ކޮންމެ ބެލުންތެރިއެއްގެވެސް ލިސްޓެއް އޮންނާނެ އެވެ. އަދި މީގެ ގިނަ ލިސްޓުތަކުގައި އެއް ނަންތަކެއް ތަކުރާރުވުމަކީވެސް ވަރަށް އެކަށީގެންވާ ކަމެކެވެ. އަދި ހަމައެއާއެކު މުބާރާތް ފެށޭއިރު އޮންނަ ލިސްޓާއި މުބާރާތް ނިމޭއިރު އޮންނަ ލިސްޓް މުޅިން އެއްގޮތް ވުމަކީ ވުމަށްވުރެ ނުވުން ގާތްކަމެއްކަމަށް ގަބޫލުކުރެވެ އެވެ. މިހާހިސާބުން މުބަރާތްފެށޭއިރު އޮވެދާނެ ގަދަ 11 އިގެ ލިސްޓަކަށް ބަލާލަމާ ހިނގާށެވެ. މިއީ އީއެސްޕީއެންގެ ލިސްޓެވެ.

ގޯލްކީޕަރު: މެނުއަލް ނޯޔާ (ޖަރުމަން)

ޔޫރޯ 2020 ފެށިގެންމިދަނީ ވަރަށް މަޝްހޫރު ގޯލްކީޕަރުންތަކަކާ އެކުގަ އެވެ. އޭގެތެރޭގައި ބެލްޖިއަމްގެ ތިއަބޯ ކޯޓުއާ އާއި ޕޯޗުގަލްގެ ރުއީ ޕެޓްރީސިއޯ، ޑެންމާކްގެ ކެސްޕާ ޝްމައިކަލް އަދި އިޓަލީގެ ޖިއާންލުއީޖީ ޑޮންނަރުއްމާ ހިމެނެ އެވެ. އެހެންނަމަވެސް ވޭތުވެދިޔަ ދިހަ އަހަރެއްހާ ދުވަހުވެސް އެންމެ މަތީގައި ހިފެހެއްޓިގޮތަށް ޖަރުމަނުގެ ކީޕަރު މެނުއަލް ނޯޔާ މިހާރުވެސް އެހެރީ އެންމެ މަތީ ލެވެލްގަ އެވެ. އަދި ޔޫރަޕްގައި ނޯޔާ އާއި އެއް ލެވެލްއެއްގައި ހިފަހައްޓާލެވުނު ކީޕަރެއް ނެތްކަމުގައި ބުނެވިދާނެ އެވެ. އެހެންނޫންނަމަ އުމުރުން 35 އަހަރުގައިވެސް ޓާ ސްޓެގެން ކަހަލަ ކީޕަރުން ތިއްބާ ނޯޔާއަށް ކޯޗު އަންގި ހަވާލެއް ނުކުރީހެވެ.

ކަނާތުބެކް: ޔާއޯ ކަންސެލޯ (ޕޯޗުގަލް)

އިނގިރޭސި ޓީމުގެ ކައިލް ވޯކާ، ރީސް ޖޭމްސް، ފްރާންސްގެ ބެންޔަމިން ޕަވާޑް އަދި ޖަރުމަނުގެ ޖޯޝުއާ ކިމިޗް އަކީ މި މުބާރާތުގައި ކާނާތު ބެކުން ފެންނާނެ މޮޅެތި ކުޅުންތެރިންނެވެ. އެހެންނަމަވެސް މިކުޅުންތެރިންގެ މައްޗަށް ޕޯޗުގަލްގެ ކަންސެލޯ އިސްކުރެވޭ އެއް ސަބަބަކީ ދިފާއުކުރުމާއެކު ހަމަލާ ދިނުމުގައިވެސް ކަންސެލޯ އަދާކުރާ މުހިއްމު ރޯލެވެ. މެންޗެސްޓާ ސިޓީގެ މި ކުޅުންތެރިޔާއަކީ ވާތުބެކަށް ވެސް ކުޅެން ޖެހިއްޖެނަމަ އެކަމުގެ ޒިންމާ ނެގޭފަދަ މޮޅުކުޅުންތެރިއެކެވެ.

ސެންޓަރ ބެކް: އެންޓޯނިއޯ ރުޑިގާ (ޖަރުމަން) ރުބެން ޑިއާސް (ޕޯޗުގަލް)

މި މުބާރާތުން ފެންނާނެ މަޝްހޫރު ސެންޓަރ ބެކުންގެ ތެރޭގައި ފްރާންސްގެ ރަފައެލް ވަރާން އާއި ޕްރެސްނެލް ކިމްޕެންބޭ، ނެދަލެންޑްސްގެ މެތިއަސް ޑި ލިޓް، އަދި ސްޕެއިންގެ ޕައު ޓޮރޭސް ފާހަގަކޮށްލެވެ އެވެ. އެހެންނަމަވެސް ނިމިގެން ދިޔަ ސީޒަނުގައި ކްލަބުތަކުގައި ކުޅުންތެރިން ދެއްކި ކުޅުމަށް ބަލާއިރު ޗެލްސީގެ އެންޓޯނިއޯ ރުޑިގާ އަދި މެންޗެސްޓާ ސިޓީގެ ރުބެން ޑިއާސް އަށްވުރެ މި މަގާމަށް ވަކިން އެކަށޭނަ ކުޅުންތެރިންތަކެއް ފެންނާކަށް ނެތެވެ. ފަހަރެއްގައި ލިވަޕޫލްގެ ވާޖިލް ވެން ޑައިކް އަނިޔާގައި ނެތްނަމަ މި ލިސްޓް ތަފާތުވީސް ކަންނޭނގެއެވެ.

ވާތު ބެކް: އެންޑީ ރޮބަޓްސަން (ސްކޮޓްލެންޑް)

ފްރާންސްގެ ލޫކަސް ހެނާންޑޭޒް އަދި ޕޯޗްގަލްގެ ރަފައެލް ގަރޭރޯ އަކީ ބައިނަލްއަގުވާމީ ތަޖުރިބާއާއެކު މިމުބާރާތަށް ނިކުންނަ ދެ ކުޅުންތެރިންނެވެ. އަދި ހަމައެއާއެކު އިނގިރޭސި ވިލާތުގެ ލޫކް ޝޯ އާއި ބެން ޗިލްވެލް އަކީވެސް މި މަގާމަށް ވާދަކޮށްފާނެ ކުޅުންތެރިންނެވެ. ލިވަޕޫލަށް ކުޅޭ އެންޑީ ރޮބާޓްސަން ސްކޮޓްލެންޑާ އެކު މި ނިކުންނަނީ 1998 ގެ ވޯލްޑް ކަޕަށް ފަހު އެ ގައުމުގެ ފުރަތަމަ ބޮޑު މުބާރާތަށް ކަމަށް ވީނަމަވެސް ޔޫރޯ 2020ގެ މިވަގުތު އެންމެ ފާހަގަކުރެވޭ ވާތުބެކަކީ އެންޑީ ރޮބާޓްސަން އެވެ.

މިޑްފީލްޑް: އެންގޯލޯ ކާންޓޭ (ފްރާންސް)، ކެވިން ޑި ބްރޭނާ (ބެލްޖިއަމް) ލޫކާ މޮޑްރިޗް (ކްރޮއޭޝިއާ)

ނިމިގެން ދިޔަ ޗެމްޕިއަންސް ލީގުގެ ފަހު މެޗުތައް ބަލާފައިވާ ކޮންމެ މީހަކުވެސް ޔޫރޯގެ ގަދަ 11އިގެ މެދުތެރެއިން ފްރާންސް އަދި ޗެލްސީގެ މެދުތެރޭގެ މައި ތަނބުކަމުގައިވާ އެންގޯލޯ ކާންޓޭއަށް ޖާގަ ދޭނެކަމީ ޝައްކެއް އޮތްކަމެއްނޫނެވެ. އެމަގާމަށް ކާންޓޭ އާއި ވާދަކުރެވޭ ވަރުގެ ކުޅުންތެރިއަކު މިވަގުތު ނެތްކަމީ ޔަގީންކަމެކެވެ. ކާންޓޭ މިޓީމުގައި އަދާކުރާނީ ޑިފެންސިވް މިޑްފީލްޑަރެއްގެ ރޯލެވެ. އެޓޭކިން މިޑްފީލްޑަރުންނަށް ބަލާނަމަ ބައިވަރު މަޝްހޫރު ކުޅުންތެރިންތަކެއް އެބަފެނެއެވެ. ޕައުލް ޕޮގްބާ، ބްރޫނޯ ފެނާންޑޭޒް، ޓޯނީ ކުރޫސް، ބެނާޑޯ ސިލްވާ، އިލްކާއީ ގުންޑޮގާން، ޖެކް ގްރީލިޝް، ފިލް ފޯޑެން އަދި މޭސަން މައުންޓް މިއީ ހައްތާވެސް މެދުތެރެއަށް ކުޅޭ މަޝްހޫރު ތަރިންނެވެ. އެހެންނަމަވެސް ބެލްޖިއަމްގެ ކެވިން ޑި ބްރޭނާ އާއި ކްރޮއޭޝިއާގެ ލޫކާ މޮޑްރިޗަށްވުރެ މި މަގާމަށް އެކަށީގެންވާ ކުޅުންތެރިންތަކެއް ނެތްކަމުގައި ބުނެވިދާނެ އެވެ. ޑި ބްރޭނާ އަކީ މެންޗެސްޓަރ ސިޓީގެ މެދުތެރޭގެ މައިތަނބު ކަމުގައިވާއިރު އުމުރުން 35 އަހަރުގައިވެސް ލޫކާ މޮޑްރިޗް އަންނަނީ ޓީމުގެ މެދުތެރޭގެ ކޮންޓްރޯލް އޭނާގެ އަތުގައި އޮންނަކަން ސާބިތުކޮށްދެމުންނެވެ.

ފޯވާޑުން: ކްރިސްޓިއާނޯ ރޮނާލްޑޯ (ޕޯޗުގަލް)، ރޮބަޓް ލެވަންޑޮސްކީ (ޕޮލެންޑް) ކިލިއަން އެމްބާޕޭ (ފްރާންސް)

ޔޫރޯއިން ފެންނާނެ ފޯވާޑުންނަށް ބަލާއިރު މިއީ ތަފާތު ކިތަންމެ ސެޓެއް ބޭނުންކޮށްގެންވެސް ދުނިޔޭގެ ފެންވަރުގެ ފޯވާޑް ލައިނެއް ނެގިދާނެ އޭރިއާއެކެވެ. ހެރީ ކޭން، ރޮމެލޫ ލުކާކޫ، އޮންޓުއަން ގްރީޒްމަން، ތޯމަސް މުލާ، މާކަސް ރަޝްފޯޑް، ރަހީމް ސްޓާލިން، ޖޭޑަން ސަންޗޯ، ޔާއޯ ފީލިކްސް، ކަރީމް ބެންޒެމާ، މިތިބީ ހައްތާވެސް މަޝްހޫރު ތަރިންނެވެ. އެހެންނަމަވެސް އިންޓަނޭޝަނަލް ސްޓޭޖްގައި މިކުޅުންތެރިންނަށް އަދި ކްރިސްޓިއާނޯ ރޮނާލްޑޯ، ރޮބަޓް ލެވަންޑޮސްކީ އަދި ކިލިއަން އެމްބާޕޭ އާއި އަރާ ހަމަކުރެވިފައިވާ ކަމަކަށް ނުބެލެވެ އެވެ. އުމުރުން 30ގެ އަހަރުތައް ގުނަމުން ދާއިރުވެސް ރޮނާލްޑޯ އާއި ލެވަންޑޮސްކީ އެދަނީ އެމީހުންގެ ލީގުތަކުގެ ލަނޑު ލިސްޓްތައް ލީޑުކުރަމުންނެވެ. ލެވަންޑޮސްކީ އަކީ ޝައްކެއްނެތް ގޮތުގައި މިވަގުތު ދުނިޔޭގައި ހުރި އެންމެ މޮޅު ސެންޓަ ފޯވާޑެވެ. ބައިނަލްއަގުވާމީ ލަނޑު ލިސްޓްގެ އެންމެ ކުރި ހޯދާ ރެކޯޑު އަމިއްލަކުރަން ރޮނާލްޑޯ އަށް ބޭނުންވަނީ ދެން އެންމެ 6 ގޯލެވެ. އުމުރުން އެންމެ 22 އަހަރުގެ އެމްބާޕޭ އަކީ ވޯލްޑް ކަޕް ކާމިޔާބުކޮށްފައިވާ އަދި ލިއޮނަލް މެސީ އާއި ރޮނާލްޑޯއަށް ފަހު ފުޓްބޯޅައިގެ ރަސްކަން ކުރާނެ ކުޅުންތެރިޔާ ކަމުގައި ގިނަ ބަޔަކު ދެކޭ ކުޅުންތެރިޔާއެވެ. އަދި މިކަމުގައި އެމްބާޕޭ އާއި އެންމެ ވާދަކުރަނީ މިފަހަރު ޔޫރޯއިން ނުފެންނާނެ ނޯވޭގެ އާރލިން ހާލާންޑް ކަމުގައި ގިނަބަޔަކު ދެކެއެވެ.