ޗެމްޕިއަންސް ލީގު މެޑަލް ލިބުމުން ސިލްވާގެ ޝުކުރު ލަމްޕާޑަށް

ޕީއެސްޖީގައި ހުރި އިރު ޗެލްސީގެ މިހާރުގެ ޑިފެންޑަރު ތިއާގޯ ސިލްވާ އަށް އަބަދުވްސް އޮންނަނީ ބަދުނާމް ބޮލުގައި އަޅަންޖެހިފައި ކަމަށާއި ޗެލްސީ އަށް އޭނާ ގެނައިކަމަށްޓަކައި ޗެލްސީގެ ކުރީގެ ކޯޗް ފްރޭންކް ލަމްޕާޑަށް ޝުކުރު އަދާކުރާ ކަމަށް ސިލްވާ ބުނެފި އެވެ.  މިދިޔަ އަހަރުގެ ހޫނު މޫސުމުގައި ޗެލްސީ އާ ގުޅުނު ބްރެޒިލްގެ ޑިފެންޑަރު މިހެން ބުނެފައިވަނީ މިދިޔަ ހޮނިހިރު ދުވަހުގެ ރޭ އޮތް ޗެމްޕިއަންސް ލީގު ފައިނަލްގައި މެންޗެސްޓަ ސިޓީ ބަލިކޮށް ޗެލްސީން ތަށި ހޯދި މެޗަށް ފަހު ނޫސްވެރިންނާ ވާހަކަދައްކަމުންނެވެ.

އުމުރުން 36 އަހަރުގެ ސިލްވާ ހިމެނުނީ ޔޫރަޕްގެ ބޮޑު މުބާރާތެއްގެ ފައިނަލްގައި ޗެލްސީ ތަމްސީލްކުރި އެންމެ އުމުރުން ދުވަސްވީ ކުޅުންތެރިޔާގެ ގޮތުގަ އެވެ .  މީގެ ކުރިން އެ ނަން ލިބިފައި އޮތީ ފްރާންސްގެ ޑިފެންޑަރު ކްލައުޑިއޯ މަކަލޭލޭ އަށެވެ. 0-1 އިން ސިޓީގެ މައްޗަށް ޗެލްސީން ކުރި ހޯދި މެޗްގެ ފުރަތަމަ 11 ގައި ހިމެނިގެން ސިލްވާ ކުޅެން އެރި ނަމަވެސް މެޗްގެ 38 ވަނަ މިނެޓްގައި ލިބުނު އަނިޔާއަކާ ގުޅިގެން މެޗުގެ ބޮޑު ބައެއް ފުރިހަމަ ނުކޮށް ދަނޑުން ފައިބަން ސިލްވާ އަށް ޖެހުނެވެ.

Advertisement

ޗެލްސީގެ ޖޯޒީގައި ޔޫރަޕްގެ ބޮޑު މުބާރާތެއްގެ ފައިނަލްގައި ކުޅުނު އެންމެ ދުވަސްވީ ކުޅުންތެރިޔާއަށް ވުމުގެ އިތުރުން ސިލްވާ ހިމެނިފައިވަނީ ދެ ޓީމެއްގައި ހިމެނިގެން ޖެހިޖެހިގެން ދެ އަހަރު ޗެމްޕިއަންސް ލީގުގެ ފައިނަލްގައި ކުޅުނު  ފަސްވަނަ ކުޅުންތެރިޔާ އަށެވެ.  މިހާތަނަށް އެކަން ހާސިލްކޮށްފައިވާ އަނެއް ހަތަރު ކުޅުންތެރިންނަކީ  ފްރާންސްގެ މާސެލް ދެސައިލީ، ޕޯޗްގަލްގެ ޕައޮލޯ ސޯސާ އަދި ކެމަރޫންގެ ސެމުއެލް އެޓޫގެ އިތުރުން  ސްޕެއިންގެ އަލްވާރޯ މޮރާޓާ އެވެ.،

ސިލްވާ އަށް އަނިޔާވެގެން ދަނޑުން ބޭލިތާ ތިން މިނެޓް ފަހުން ކައި ހަވާޓްސް ސިޓީ ކޮޅަށް ވައްދާލި ގޯލުން ޗެމްޕިއަންސް ލީގުގެ ތަށި އުފުލާލުމުގެ ޝަރަފް ސިލްވާއަށް ލިބުނު އިރު މިދިޔަ އަހަރު އޭނާ ޗެމްޕިއަންސް ލީގުގައި ޕީއެސްޖީގެ ކުޅުންތެރިއެއްގެ ގޮތުގައި ހުރެ ކުޅުނު ފައިނަލުން ވަނީ ބަލިވެފަ އެވެ. ހިލޭ ޓްރާންސްފާ އެއްގައި ޗެލްސީއަށް ބަދަލުވުމުގެ ކުރިން ސިލްވާ ޕީއެސްޖީގެ ޖޯޒީގައި ކުޅުނު އެންމެ ފަހު މެޗަކީ އެއީ އެވެ.  ޕީއެސްޖީގައި އަށް އަހަރު ސިލްވާ ހޭދަކުރި އިރު ޗެމްޕިއަންސް ލީގުގެ އެންމެ ދުރަށްވެސް ޕީއެސްޖީ އަށް އާދެވުނު ހިސާބަކީ އެއީ އެވެ. މަންޒަރު . ޗެލްސީއަށް ބަދަލުވި ފަހުން މަންޒަރު ބަދަލުވީ ސިލްވާ ހީކޮށްގެންވެސް ނެތްހާ އަވަހަށެވެ.

“މިއީ އަހަރެންގެ ކެރިއަރުގެ އެންމެ މުހިއްމު ވަގުތުކޮޅު. މިއީ ހަނޑާނުން ފިލައިގެންދާނެ ވަގުތުކޮޅެއް ނޫން. ޕީއެސްޖީގައި ހުރެގެން އަހަރެންނަކަށް މިކަމެއް ނުކުރެވުނު. އެކަމަކު މިއަދު އަހަރެން މިހިރީ އުފަލުން. އަހަރެން އުއްމީދުކުރަން ކޮންމެވެސް ދުވަހަކުން ޕީއެސްޖީ އަށްވެސް މިކަން ވާނެކަމަށް.” މެޗަށް ފަހު ވާހަކަދައްކަމުން ސިލްވާ ބުނެފައިވެ އެވެ.

“މިއީ ވަރަށް ހާއްސަ ކާމިޔާބެއް. އަހަރެން މި ކްލަބްގައި ހޭދަކުރި ފުރަތަމަ އަހަރު މި ލިބުނީ . ޓީމް ބަދަލުކޮށްލީ ޓުޗެލް. އެކަމަކު ލަމްޕާޑާ ގުޅޭގޮތުންވެސް ވާހަކަދެއްކުމަކީ މިވަގުތު މުހިއްމު ކަމެއް. އޭނަ ނެތް ނަމަ އަހަރެން މި ޓީމުގައި އަހަރެން ނުހިމެނުނީސް ކަންނޭގެ. އެހެންވީމަ މި ކްލަބަށް އަހަރެން ގެނައިކަމަށްޓަކައި ލަމްޕާޑަށް ޝުކުރުއަދާކުރަން. އަހަރެން މިހިރީ ވަރަށް އުފާވެފަ. އަހަރެން ހީކުރަން ލަމްޕާޑްވެސް  އުފާވާނެކަމަށް.” ސިލްވާ ބުންޏެވެ.

މި ސީޒަން ފެށުނު އިރު ޗެލްސީގެ ކޯޗަކަށް ހުރި ލަމްޕާޑްގެ އިރުޝާދުގެ ދަށުން ޗެމްޕިއަންސް ލީގުގެ ނޮކައުޓް ސްޓޭޖަށް ޓީމް ދަތުރުކުރި ނަމަވެސް ޖެނުއަރީ މަހުގެ ތެރޭގައި ލަމްޕާޑް ވަނީ މަގާމުން ވަކިކޮށްފަ އެވެ.

Advertisement