އޭއެފްސީ ކަޕްގެ މެޗުތައް ބާއްވާކަށް ރާއްޖެއަކުން ދެން ނޫޅޭނެ

އޭއެފްސީ ކަޕްގެ ދެކުނު އޭޝިއާ ސަރަހައްދަށް ނިސްބަތްވާ ގްރޫޕް ސްޓޭޖުގެ މެޗުތައް ބާއްވަން ހުޅުވާލި ބިޑަށް ރާއްޖޭން ބިޑް ނުކުރާނެކަމަށް ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފި އެވެ. އެފްއޭއެމްގެ ރައީސް ބައްސާމް އަދީލް ޖަލީލް މިގޮތަށް ވިދާޅުވީ “އަދަދު” ނޫހަށް ދެއްވި އިންޓަވިއުއެއްގަ އެވެ.

ރާއްޖޭން ވަނީ އެންމެ ފަހުން އޭއެފްސީން ހުޅުވާލި ދެ ބިޑް ވެސް ކާމިޔާބުކޮށްފަ އެވެ. މިދިޔަ އަހަރުގެ އޭއެފްސީ ކަޕް ރާއްޖޭގައި ބާއްވަން ހަމަޖެހުނު ނަމަވެސް ކޮވިޑާ ގުޅިގެން އެންމެ ފަހުން އެ މުބާރާތް އޭއެފްސީން ކެންސަލްކުރީ އެވެ. މިއަހަރުގެ އޭއެފްސީ ކަޕްގެ ގްރޫޕް ސްޓޭޖުގެ މެޗުތައް ބާއްވަން އެންމެ ފުރަތަމަ ހުޅުވާލި ބިޑް ރާއްޖޭން ކާމިޔާބުކުރީ އިންޑިއާ ފަހަތަށް ޖައްސާލުމަށް ފަހު އެވެ. އެ މެޗުތައް ކުޅެން ޝެޑިއުލްކުރީ މި މަހުގެ ތެރޭގަ އެވެ. އެކަމަކު ކޮލިފައިން ބުރުގައި ކްލަބް އީގަލްސްއާ ދެކޮޅަށް ރާއްޖޭގައި ކުޅެން އޮތް މެޗަށް އައި ބެންގަލޫރު އެފްސީގެ ކުޅުންތެރިން ކޮވިޑްގެ ޕްރޮޓޮކޯލްއާ ހިލާފުވުމުން ފަހު ވަގުތު އެ މެޗާއި ގްރޫޕް ސްޓޭޖުގެ މެޗުތައް އޭއެފްސީން ފަސްކުރީ އެވެ.

Advertisement

މި މަހުގެ 11 ވަނަ ދުވަހު ގަލޮޅު ދަނޑުގައި އީގަލްސްއާ ދެކޮޅަށް ކުޅެން އޮތް މެޗުގެ ކުރިން ބެންގަލޫރު ކުޅުންތެރިން ތިބި ހޮޓެލް ޖެން އިން ނުކުމެ މަގުމަތީގައި އުޅުނު ފޮޓޯތައް ސޯޝަލް މީޑިއާގައި ވަނީ ދައުރުވެފަ އެވެ. އެއާއެކު ޔޫތު އެންޑް ސްޕޯޓްސް މިނިސްޓަރު އަހުމަދު މަހުލޫފް ވަނީ ބެންގަލޫރު ޓީމު ވަގުތުން ރާއްޖެ ދޫކޮށް ދިއުމަށާއި ރާއްޖޭގައި އޭއެފްސީ ކަޕްގެ މެޗުތައް ނުކުޅެވޭނެކަމަށް ވިދާޅުވެފަ އެވެ. މިނިސްޓަރުގެ ނިންމުން ބަލައިގަނެ އެފްއޭއެމުން ފަހުން ވަނީ މެޗުތައް ފަސްކުރަން އޭއެފްސީގައި އެދިފަ އެވެ.

މެޗުތަކަށް އަލުން ބިޑް ނުކުރަން ރާއްޖޭން ނިންމިއިރު ކޮލިފައިންގައި އީގަލްސްއާ ބެންގަލޫރު ވާދަކުރާ މެޗު ދެން ކުޅޭނެކަމަށް ބެލެވެނީ އިންޑިއާގަ އެވެ. އޭއެފްސީ ކަޕްގައި ރާއްޖޭގެ ކްލަބްތައް ނިސްބަތްވާ ގްރޫޕްގައި ހިމެނެނީ މާޒިޔާ އާއި އިންޑިއާގެ އޭޓީކޭ މޯހަން ބަގާންގެ އިތުރުން ބަންގްލަދޭޝްގެ ބަޝުންދަރާ ކިންގްސް އެވެ. މި ގްރޫޕުގެ ހަތަރު ވަނަ ޖާގަ ލިބޭނީ ބެންގަލޫރާ އީގަލްސް ވާދަކުރާ ކޮލިފައިން މެޗުން މޮޅުވާ ޓީމަކަށެވެ. މިދިޔަ އަހަރު ކެންސަލްކުރި ގްރޫޕް ސްޓޭޖުގައި ރާއްޖޭގެ މާޒިޔާ އާއި ޓީސީ ސްޕޯޓްސް ކްލަބް ވާދަކުރި އެވެ.

އޭއެފްސީ ކަޕްގައި ބެންގަލޫރާ އީގަލްސް ވާދަކުރާ މެޗު ކުޅެން މިހާރު ޝެޑިއުލްކޮށްފައިވަނީ މި މަހުގެ 27 ވަނަ ދުވަހަށެވެ. އެއަށްފަހު ޖޫން 30 އިން ޖުލައި 6 އަށް ގްރޫޕް ސްޓޭޖުގެ މެޗުތައް ކުޅެން ވަނީ ނިންމައިފަ އެވެ. އިންޑިއާއިން މިފަހަރުގެ ބިޑް ކާމިޔާބުކުރާނެކަމަށް ބެލެވޭއިރު އެގައުމުން މެޗުތައް ބާއްވާނެކަމަށް ބެލެވެނީ ގޯއާގަ އެވެ.

ރާއްޖޭން ބިޑު ނުކުރަން ނިންމި އެންމެ ބޮޑު ސަބަބެއް ކަމަށް ބެލެވެނީ ކޮވިޑްގެ ހާލަތު އިތުރަށް ގޯސްވަމުން ދިއުމެވެ. ކޮވިޑްގެ ހަރުކަށި ފިޔަވަޅުތަކާ އެކު މެޗުތައް ރާއްޖޭގައި ކުޅުން ރަނގަޅު ނޫންކަމަށް ސިއްހީ މާހިރުން ވެސް އައީ ވިދާޅުވަމުންނެވެ. އަނެއްކޮޅުން ރާއްޖޭގެ ގައުމީ ފުޓްބޯޅަ ޓީމު ވޯލްޑް ކަޕާއި އޭޝިއަން ކަޕްގެ ކޮއިންޓް ކޮލިފައިންގެ މެޗުތަކަށް ޗައިނާއަށް ފުރުމުގެ ކުރިން ހޮޓެލް ޖެންގައި ކޭމްޕްކުރިއިރު ޕްރެކްޓިސް ކުރަން ދަނޑެއް ނުލިބުނެވެ. އެހެންގެ ގައުމީ ޓީމުގެ ލުއި ސެޝަންތައް ކުރިއަށް ގެންދިޔައީ ހޮޓެލް ޖެންގެ ބޯލް ރޫމްގަ އެވެ. ޗައިނާގައި މި މަހުގެ 30 ވަނަ ދުވަހުން އަންނަ މަހުގެ 15 ވަނަ ދުވަހުގެ ނިޔަލަށް ކުޅޭ ކޮލިފައިން މެޗުތަކަށް ތައްޔާރުވުމަށް ރާއްޖޭގެ ގައުމީ ފުޓްބޯޅަ ޓީމު މިހާރު ވަނީ ދުބާއީގައި ކޭމްޕްކޮށްފަ އެވެ.

އޭއެފްސީ ކަޕްގެ ގްރޫޕް ސްޓޭޖުގެ މެޗުތައް ބާއްވަން ބިޑް ނުކުރަން ނިންމުމަކީ ކްލަބްތަކަށް ލިބޭނެ ގެއްލުމެކެވެ. ރާއްޖޭގައި މެޗުތައް ކުޅުނު ނަމަ ހޯމް އެޑްވާންޓޭޖާ އެކު މުބާރާތުގެ އަނެއް ބުރަށް ދިއުމުގެ ފުރުސަތު ރާއްޖޭގެ ކްލަބްތަކަށް ފަހިވީހެވެ.

Advertisement