ލިވަޕޫލާއި ޗެލްސީ ޗެމްޕިއަންސް ލީގަށް، އާސެނަލަށް ޔޫރަޕް ގެއްލިއްޖެ

އިނގިރޭސި ޕްރިމިއާ ލީގުގެ ފަހު މެޗުތަކުން މިރޭ މޮޅުވެ ލިވަޕޫލާ ޗެލްސީން އަންނަ ސީޒަނުގެ ޗެމްޕިއަންސް ލީގުގެ ޖާގަތައް ކަށަވަރުކުރިއިރު އާސެނަލަށް ޔޫރަޕްގެ ކްލަބް މުބާރާތްތަކުގެ ފުރުސަތު ގެއްލިއްޖެ އެވެ.

ޕްރިމިއާ ލީގުގެ ކުޅުން މިރޭ ނިމުނުއިރު ލިވަޕޫލުން ވަނީ އަމިއްލަ ދަނޑުގައި 0-2 އިން ކްރިސްޓަލް ޕެލެސް ބަލިކޮށް 69 ޕޮއިންޓާ އެކު ލީގުގެ ތިން ވަނަ ހޯދައިފަ އެވެ. ޗެލްސީ ރަށުން ބޭރުގައި އެސްޓަން ވިލާ އަތުން 2-1 އިން ބަލިވި ނަމަވެސް 67 ޕޮއިންޓާ އެކު އެޓީމަށް ވަނީ ހަތަރު ވަނަ ލިބިފަ އެވެ. ގަދަ ހަތަރަކުން ފުރުސަތު ގެއްލި ފަހު ވަގުތު ޔޫއެފާ ޔޫރޮޕާ ލީގަށް ވެއްޓުނީ 66 ޕޮއިންޓް ލިބުނު ލެސްޓާ ސިޓީ އެވެ. އެޓީމު މިރޭ ވަނީ އަމިއްލަ ދަނޑުގައި 4-2 އިން ޓޮޓެންހަމް ހޮޓްސްޕާސް އަތުން ބަލިވެފަ އެވެ. 65 ޕޮއިންޓާ އެކު ވެސްޓް ހޭމް ޔުނައިޓެޑުން ހަ ވަނަ ހޯދައި ޔޫރޮޕާ ލީގުގެ ކޮލިފައިން ބުރުން ފުރުސަތު ހޯދިއިރު 62 ޕޮއިންޓާ އެކު ހަތް ވަނަ ލިބުނު ޓޮޓެންހަމަށް ފުރުސަތު ލިބުނީ އަންނަ ސީޒަނުގައި އަލަށް ފެށުމަށް ހަމަޖެހިފައިވާ ޔޫއެފާ ކޮންފަރެންސް ލީގުންނެވެ.

އާސެނަލަށް 61 ޕޮއިންޓާ އެކު އަށް ވަނަ ލިބުނުއިރު މިއީ 26 އަހަރުތެރޭ އެޓީމު ޔޫރަޕްގެ މުބާރާތަކަށް ކޮލިފައިނުވި ފުރަތަމަ ފަހަރެވެ. 96-1995 ވަނަ ސީޒަނުން ފެށިގެން ގަވައިދުން ޔޫރަޕްގެ މުބާރާތްތަކުގައި ވާދަކުރަމުން އައިސް ކުރީގެ ކޯޗު އާސެން ވެންގާ ކްލަބް ދޫކޮށްލި ފަހުން އެޓީމަށް ޗެމްޕިއަންސް ލީގުން ވެސް ގަވައިދުން ފުރުސަތު ނުލިބެ އެވެ. އާސެނަލުން މިރޭ 2-0 އިން ބްރައިޓަން ބަލިކުރި މެޗުގައި ދެ ލަނޑު ވެސް ކާމިޔާބުކޮށްދިނީ ފަހަކަށް އައިސް ރަނގަޅު ފޯމެއްގައި ހުރި ނިކޮލަސް ޕެޕޭ އެވެ.

ލިވަޕޫލުން ލީގުގެ ތިން ވަނައިގައި ނިންމާލީ ގަދަ ހަތަރެއްގެ އުއްމީދު ފަނޑުވެފައިވަނިކޮށް އެންމެ ފަހުން ކުޅުނު ފަސް މެޗުން މޮޅުވެގެންނެވެ. މުޅި ސީޒަނުގައި އެޓީމުގެ ގިނަ ކުޅުންތެރިންތަކަކަށް އަނިޔާގެ ގިނަ މައްސަލަތަކެއް ކުރިމަތިވިއިރު އަންނަ ސީޒަނުގެ ޗެމްޕިއަންސް ލީގުން ފުރުސަތު ލިބުމަކީ އެޓީމަށް ލިބުނު ބޮޑު ހިތްހަމަޖެހުމެކެވެ. އިތުބާރު ޑިފެންޑަރު ވާޖިލް ވެން ޑައިކް އާއި ޖޯ ގޯމޭޒް އަށް ދިގު މުއްދަތަކަށް އަނިޔާވުމުން ސީޒަނުގެ ބޮޑު ބައެއްގައި އެޓީމުގެ ޑިފެންސް ބެލެހެއްޓީ ޒުވާން ދެ ޑިފެންޑަރުންނެވެ. ގަދަ ހަތަރެއް ކަށަވަރުކުރި މެޗުގައި ލިވަޕޫލްގެ ދެ ލަނޑު ވެސް ސަޑިއޯ މާނޭ އެވެ.

ޗެލްސީ ކޮޅަށް އެސްޓަން ވިލާގެ ފުރަތަމަ ގޯލު ޖެހީ ބާޓްރަން ޓްރައޯރޭ އެވެ. އެޓީމުގެ ދެ ވަނަ ގޯލު ލިބުނު ޕެނަލްޓީއަކުން ކާމިޔާބުކުރީ އަންވަރު އެލްގާޒީ އެވެ. ޗެލްސީގެ ހަމައެކަނި ލަނޑު ކާމިޔާބުކުރީ ޑިފެންޑަރު ބެން ޗިލްވެލް އެވެ. މެޗުގެ ފަހުކޮޅު ޗެލްސީގެ ސެޒާ އަޒްޕިލިކުއެޓާ އަށް ރެފްރީ ވަނީ ސީދާ ރަތް ކާޑެއް ދައްކައިފަ އެވެ.

މިދިޔަ ސީޒަނެކޭ އެއްގޮތަށް މިފަހަރު ވެސް ލެސްޓާ އަށް ޗެމްޕިއަންސް ލީގުން ފުރުސަތު ގެއްލުނީ ފަހު މެޗުގަ އެވެ. މިރޭ ޓޮޓެންހަމް ކޮޅަށް ލެސްޓާގެ ދެ ގޯލު ވެސް ޖެހީ ލިބުނު ދެ ޕެނަލްޓީން ޖެމީ ވާޑީ އެވެ. ޓޮޓެންހަމްގެ ފުރަތަމަ ލަނޑު ކެޕްޓަން ހެރީ ކޭން ޖެހިއިރު ދެ ވަނަ ލަނޑަކީ ލެސްޓާގެ ގޯލްކީޕަރު ކެސްޕަ ޝްމައިކަލް އަތުން ބައިކޮޅަށް ވަން ގޯލެވެ. ޓޮޓެންހަމް މޮޅުވީ މެޗުގެ ފަހުކޮޅު ގަރެތު ބޭލް ކާމިޔާބުކޮށްދިން ދެ ލަނޑުންނެވެ.

ލެސްޓާ ކޮޅަށް ޖެހި ގޯލާ އެކު ޓޮޓެންހަމްގެ ކޭން ވަނީ 23 ލަނޑާ އެކު ރަން ބޫޓު ކަށަވަރުކޮށްފަ އެވެ. ކޭންގެ ފަހަތުން ދެ ވަނަ ލިބުނީ 22 ލަނޑު ޖެހި ލިވަޕޫލްގެ މުހައްމަދު ސަލާހް އަށެވެ. މިއީ ކޭން ޓޮޓެންހަމްގެ ޖާޒީގައި ލީގުގެ ރަން ބޫޓު ކަށަވަރުކުރި ތިން ވަނަ ސީޒަނެވެ. ކުރިއަށް އޮތް ސީޒަނުގައި ކޭން އެހެން ކްލަބަކުން ފެނުމުގެ ފުރުސަތު ބޮޑުއިރު 27 އަހަރުގެ ކޭން ވަނީ ޓޮޓެންހަމަށް 221 ލަނޑު ކާމިޔާބުކޮށްދީފަ އެވެ.

ލީގު ޗެމްޕިއަންކަން ހޯދި މެންޗެސްޓަރ ސިޓީ މިރޭ ވަނީ އަމިއްލަ ދަނޑުގައި 0-5 އިން އެވަޓަން ބަލިކޮށްފަ އެވެ. މެޗުގައި ސިޓީގެ ލަނޑުތައް ކާމިޔާބުކޮށްދިނީ ކެވިން ޑި ބްރާނާ އާއި ގެބްރިއަލް ޖީސުސްގެ އިތުރުން ފިލް ފޯޑެން އާއި ސާޖިއޯ އަގުއޭރޯ އެވެ. ހަތަރު ސީޒަންތެރޭ ތިން ވަނަ ފަހަރަށް ސިޓީން ލީގު ޗެމްޕިއަންކަން ކަށަވަރުކުރީ 86 ޕޮއިންޓާ އެކު އެވެ.

މި ސީޒަނަށް ފަހު ސިޓީ ދޫކޮށްލަން ނިންމާފައިވާ އަގުއޭރޯ މިރޭ ޖެހި ދެ ގޯލާ އެކު އޭނާ ވެފައިވަނީ އިނގިރޭސި ލީގުގައި އެއް ކްލަބަކަށް އެންމެ ގިނަ ލަނޑު ޖަހައިދިން ކުޅުންތެރިޔާއަށެވެ. އަގުއޭރޯ ސިޓީގެ ޖާޒީގައި 184 ގޯލު ޖަހާފައިވާއިރު ކުރިން މި ރެކޯޑް އޮތީ މެންޗެސްޓަރ ޔުނައިޓެޑްގައި 183 ލަނޑު ޖެހި ވޭން ރޫނީގެ އަތުގަ އެވެ.

ޔުނައިޓެޑުން ރަށުން ބޭރުގައި މިރޭ 2-1 އިން ވުލްވްސް ބަލިކުރި މެޗުގައި ލަނޑުތައް ކާމިޔާބުކޮށްދިނީ ޒުވާން ފޯވާޑް އެންތަނީ އިލާންގާ އާއި ހުއާން މަޓާ އެވެ. މަޓާ ލަނޑު ޖެހީ ލިބުނު ޕެނަލްޓީއަކުންނެވެ. 74 ޕޮއިންޓާ އެކު ލީގުގެ ދެ ވަނައިގައި ޔުނައިޓެޑް ނިންމާލިއިރު މިފަހަރުގެ ލީގުގައި ރަށުން ބޭރުގައި އެޓީމު ބަލިވެފައެއްނުވެ އެވެ. ޔުނައިޓެޑް ވެފައިވަނީ ރަށުން ބޭރުގައި ބަލިނުވެ ލީގު ނިންމާލި ތިން ވަނަ ޓީމަށެވެ. މީގެ ކުރިން ޕްރެސްޓަން އާއި އާސެނަލުން ވަނީ މި ރެކޯޑް ހަދައިފަ އެވެ. ލީގުގައި ރަށުން ބޭރުގައި ކުޅުނު 19 މެޗުގެ ތެރެއިން 12 މެޗު ޔުނައިޓެޑް ކާމިޔާބުކުރިއިރު އެއްވަރުވީ ހަތް މެޗުންނެވެ.

މިފަހަރުގެ ލީގުން ރެލިގޭޓްވީ ފުލަށް ދިޔަ ޝެފީލްޑް ޔުނައިޓެޑާއި ފުލަމް އައި ވެސްޓް ބްރޮމް އެވެ. އަންނަ ސީޒަނުގެ ޕްރިމިއާ ލީގުން މިހާރު ޖާގަ ހޯދާފައިވާ ދެ ޓީމަކީ ނޯވިޗް ސިޓީ އާއި ވެޓްފޯޑެވެ. ފަހު ޖާގަ ލިބޭނީ ޕްލޭއޮފް ފައިނަލުގައި ސްވާންސީ ސިޓީ އާއި ބްރެންޓްފޯޑް ބައްދަލުކުރާ މެޗުން މޮޅުވާ ޓީމަކަށެވެ.