ސްޕެއިންގެ ތާޖު ރެއާލް އަތުން އަވަށްޓެރި އެތުލެޓިކޯ އަތުލައިފި

ސްޕެނިޝް ލީގުގެ ތަށި އެތުލެޓިކޯ މެޑްރިޑުން ކާމިޔާބުކޮށްފި އެވެ. 2014 ވަނަ އަހަރަށް ފަހު ފުރަތަމަ ފަހަރަށް އެތުލެޓިކޯ އިން ލީގު ކާމިޔާބުކޮށްފައި މިވަނީ ލީގުގައި އެތުލެޓިކޯ އިން ކުޅުނު އެންމެ ފަހު މެޗުގައި ރެއާލް ވަލަޑޮލިޑްގެ މައްޗަށް ކުރި ހޯދައިގެންނެވެ.

ލީގަށް އެތުލެޓިކޯ އާ އެންމެ ގާތުން ވާދަކުރި ރެއާލް މެޑްރިޑް ވެސް ވަނީ އެ ޓީމުން މިރޭ ކުޅުނު ލީގުގެ އެންމެ ފަހު މެޗުގައި ވިޔަ ރެއާލް އަތުން މޮޅުވެފަ އެވެ. އެކަމަކު ރެއާލް އަށް ލީގު ޗެމްޕިއަން ކަން ދިފާއު ނުކުރެވުނީ މިރޭގެ މެޗުތަކަށް ނުކުތުމުގެ ކުރިންވެސް ރެއާލްއަށްވުރެ ދެ ޕޮއިންޓް ކުރީގައި އެތުލެޓިކޯ އޮތުމުންނެވެ.

Advertisement

ރެލިގޭޓްވުމުގެ ބިރާ ކުރިމަތިވެފައި އޮތް ރެއާލް ވަލަޑޮލިޑާ ވާދަކޮށް އެތުލެޓިކޯ އިން މިރޭ ކުރި ހޯދައިފައިވަނީ 1-2 އިންނެވެ.  މި މެޗުގައި ފުރަތަމަ ލަނޑު ޖަހައި ކުރި ހޯދީ ވަލަޑޮލިޑުންނެވެ. މެޗުގެ 18 ވަނަ މިނެޓްގައި ވަލަޑޮލިޑުން ޖެހި ލަނޑާއެކު ފުރަތަމަ ހާފު އެ ޓީމުން ނިންމީވެސް ލީޑްގައި އޮވެގެންނެވެ. އެކަމަކު ދެވަނަ ހާފުގައި އެތުލެޓިކޯ އިން އެ ޓީމްގެ ކުޅުން ވަރުގަދަކޮށް  57 ވަނަ މިނެޓްގައި މެޗުގެ ނަތީޖާ ހަމަހަމަކުރި އެވެ. އަދި އޭގެ ދިހަ މިނެޓް ފަހުން އުރުގުއޭގެ ފޯވާޑް ލުއިސް ސުއަރޭޒް ލަނޑެއް ޖަހައި މެޗުގެ ނަތީޖާ އެތުލެޓިކޯ ކޮޅަށް އަނބުރާލި އެވެ.

އެތުލެޓިކޯ އާ ހިލާފަށް ރެއާލަށް މިރޭ ވާދަކުރަންޖެހުނީ ނިސްބަތުން ވަރުގަދަ ޓީމަކާ އެވެ. މި ސީޒަންގެ ޔޫރޮޕާ ލީގުން ޖާގަ ހޯދާފައި އޮތް ވިޔަރެއާލް އާ ދެކޮޅަށް އަމިއްލަ ދަނޑުގައި ރެއާލުން ކުޅުނު މެޗު އެ ޓީމުން ކާމިޔާބުކުރީ 1-2 އިންނެވެ. މެޗުގައި ފުރަތަމަ ލަނޑު ޖަހައި ލީޑް ހޯދީ ވިޔަރެއާލުންނެވެ. ރެއާލަށް މެޗުގެ ނަތީޖާ ހަމަހަމަކުރެވުނީވެސް މެޗް ނިމެން ތިން މިނެޓަށް ވެފައި ވަނިކޮށެވެ. މި ލަނޑު އެ ޓީމަށް ކާމިޔާބުކޮށްދިނީ ހަ އަހަރަށްފަހު އަލުން ފްރާންސްގެ ގައުމީ ޓީމުން ޖާގަ ހޯދި ތަޖުރިބާކާރު ފޯވާޑް ކަރިމް ބެންޒެމާ އެވެ. ރެއާލް މެޗުން މޮޅުކޮށްދިން ލަނޑު އިތުރު ވަގުތުގެ ތެރޭގައި ކާމިޔާބުކުރީ ކްރޮއޭޝިއާގެ މިޑްފީލްޑަރު ލޫކާ މޮޑްރިޗެވެ.

ތިން ވަނައިގައި ލީގު ނިންމާލި ބާސެލޯނާއިން މިރޭ ރަށުން ބޭރުގައި އެއިބާ އާ ދެކޮޅަށް ކުޅުނު މެޗް ވަނީ ކާމިޔާބުކޮށްފަ އެވެ. މި މެޗުގައި ބާސެލޯނާގެ ކެޕްޓަން ލިއޮނަލް މެސީ ކުޅެފައެއް ނުވެ އެވެ.

ރެއާލް މެޑްރިޑަށް ލީގު ޗެމްޕިއަންކަން ދިފާއު ނުކުރެވުމާއެކު އެ ޓީމަށް މިފަހަރު ސީޒަން ނިންމާލަން ޖެހުނީ ހުސް އަތާ އެވެ.

Advertisement