ރަސްގެފާނަށް މިފަހަރުވެސް ފުރުސަތެއް ނެތް، ޗެލްސީ ފައިނަލަށް

ޔޫއެފާ ޗެމްޕިއަންސް ލީގު 13 ފަހަރު ކާމިޔާބުކޮށްފައިވާ ސްޕެއިންގެ ރެއާލް މެޑްރިޑް ބަލިކޮށް  މުބާރާތުގެ ފައިނަލުން ޗެލްސީ ޖާގަ ހޯދައިފި އެވެ.

މުބާރާތުގެ ފައިނަލުން ޗެލްސީ ޖާގަ ހޯދީ ފުރަތަމަ ލެގުގައި ރަށުން ބޭރުގައި ކުޅުނު މެޗު 1-1 އިން އެއްވަރުވެފައިވަނިކޮށް ދެވަނަ ލެގުގައި މިރޭ އަމިއްލަ ދަނޑުގައި ކުޅުނު މެޗު 0-2 އިން ކާމިޔާބުކޮށްގެންނެވެ.

Advertisement

މިއީ 2012 ވަނަ އަހަރު ޗެމްޕިއަންސް ލީގުގެ ފައިނަލްގައި ކުޅެ ޗެލްސީން ތަށި ހޯދި ފަހުން އެ ޓީމު މުބާރާތުގެ ފައިނަލަށް ދަތުރުކުރި ފުރަތަމަ ފަހަރެވެ. އަނެއްކޮޅުން މިއީ ޗެލްސީގެ ކޯޗް ތޯމަސް ޓުޗެލް ޗެމްޕިއަންސް ލީގުގެ ފައިނަލްގައި ޖެހިޖެހިގެން އިރުޝާދު ދޭނެ ދެވަނަ އަހަރެވެ. ޓުޗެލް ވަނީ މިދިޔަ އަހަރު ޕީއެސްޖީގެ ކޯޗުކަމުގެ މަގާމުގައި ހުރެ އެ ޓީމު މުބާރާތުގެ ފައިނަލަށް ގެންގޮސްދީފަ އެވެ.

މިރޭގެ މެޗުގައި ޗެލްސީން ޖެހި ދެ ލަނޑުގެ ތެރެއިން ފުރަތަމަ ލަނޑު މެޗުގެ 28 ވަނަ މިނެޓްގައި ކާމިޔާބުކޮށްދިނީ ކައި ހަވާޓްސް ތަނަވަސްކޮށްދިން ފުރުސަތަކުން ޓީމޯ ވާނާ އެވެ. މި ދެ ކުޅުންތެރިންނަކީވެސް މިދިޔަ އަހަރު ޖަރުމަނު ލީގުގައި ކުޅުނު ދެ ކުޅުންތެރިންނެވެ. ޗެލްސީން ފައިނަލްގެ ޖާގަ ކަށަވަރު ކުރި ގޯލް މެޗު ނިމެން ފަސް މިނެޓަށް ވެފައިވަނިކޮށް ކާމިޔާބުކުރީ ކްރިސްޓިއަން ޕުލިސިޗް ދިން ބޯޅައަކުން މޭސަން މައުންޓެވެ.

މުބާރާތުގެ ފައިނަލްގައި ޗެލްސީ ވާދަކުރާނީ ރޭ ޕީއެސްޖީ ބަލިކޮށް ފައިނަލުން ޖާގަ ހޯދި މެންޗެސްޓަ ސިޓީ އާ އެވެ.

Advertisement