ސުޕަ ލީގު ކުޅޭ ހިތެއް ނުވޭ: ލިވަޕޫލް ކުޅުންތެރިން

މިދިޔަ އާދީއްތަ ދުވަހު އިއުލާންކުރި ޔޫރަޕިއަން ސުޕަ ލީގު ކުޅެން އެއްވެސް ޝަގުވެރިކަމެއް  ނެތްކަމަށާއި، އެ މުބާރާތް އޮންނަންވެސް ބޭނުން ނުވާ ކަމަށް ލިވަޕޫލްގެ ކުޅުންތެރިން ބުނެފި އެވެ. ލިވަޕޫލްގެ ކުޅުންތެރިން މިހެން ބުނެފައި މިވަނީ ޓީމުގެ ހުރިހާ ކުޅުންތެރިން ޝާމިލްވާ ގޮތުން ޓްވިޓާގައި މީގެ އިރުކޮޅެއް ކުރިން އާންމުކުރި ބަޔާނެއްގަ އެވެ.

ލިވަޕޫލްގެ ކުޅުންތެރިން ސުޕަ ލީގާ ދެކޮޅުކަން ހާމަކޮށްފައިވާ އިރު އެ ކްލަބަކީ މުބާރާތުގައި ބައިވެރިވިކަމަށް އިއުލާންކޮށްފައިވާ 12 ކްލަބްގެ ތެރޭގައި ހިމެނޭ ކްލަބެކެވެ.

Advertisement

ލިވަޕޫލްގެ އިތުރުން އިނގިރޭސި ފަސް ކްލަބަކުން މުބާރާތުގައި ބައިވެރިވާން ނިންމިކަން އިއުލާންކުރިތާ ތިން ދުވަސްވެސް ނުވަނީސް މުބާރާތް ކުރިއަށްދާނެ ކަމާ މެދު މިހާރުވަނީ ސުވާލު އުފެދިފަ އެވެ. ފުޓްބޯޅައިގެ މައި އިދާރާތަކުން ކުރިމަތިކުރަމުން އަންނަ ފިއްތުންތަކާއި، ސަޕޯޓަރުންގެ ނުރުހުން އަންނަނީ އިންތިހާ އަށް އިތުރުވަމުންނެވެ. މި ހުރިހާ ކަމަކާ އެކު މެންޗެސްޓަ ސިޓީން މުބާރާތުން މިހާރު ވަކިވެފައިވާ އިރު ޗެލްސީންވެސް އަންނަނީ އެ ފިޔަވަޅުން ހިނގަމުންނެވެ. މިހާރު މިފެނުނީ ލިވަޕޫލްވެސް މުބާރާތުން ވަކިވާނެ ކަމުގެ ވަރުގަދަ އިޝާރާތެކެވެ.

“އަހަރެމެން އެއްގޮތަކަށްވެސް އެއަކާ ގަޔާއެއް ނުވަން. އެކަން ހަގީގަތަކަށް ވާކަށްވެސް އަހަރެމެން ނޭދެން. މިއީ އަހަރެމެން އެންމެންގެ ބަސް. އަހަރެމެން އަބަދުވެސް ތިބޭނީ ކްލަބަށާއި، ސަޕޯޓަރުންގެ ހިދުމަތުގަ. އެއްވެސް ޝަރުތަކާ ނުލާ. ކްލަބްގެ އެކަކުވެސް އެކަނި ދާކަށް ނުޖެހޭނެ.” ލިވަޕޫލްގެ ކެޕްޓަން ޖޯޑަން ހެންޑަސަން އިސްވެ ހުރެ މުޅި ޓީމުގެ ނަމުގައި ޓްވިޓާގައި ޕޯސްޓްކުރި ބަޔާނެއްގައި ބުނެފައިވެ އެވެ.

Advertisement