މެންޗެސްޓަރ ސިޓީ ސުޕަ ލީގުން ވަކިވެއްޖެ
އަލަށް ތައާރަފްކުރި ޔޫރަޕިއަން ސުޕަރ ލީގުގައި ބައިވެރިވި އިނގިރޭސި ހަ ކްލަބްގެ ތެރެއިން މެންޗެސްޓަ ސިޓީ މުބާރާތުން ވަކިވެއްޖެ އެވެ. ބޮޑު މައްސަލަގަނޑެއްގެ މެދުގައި މިހާރު އޮތް މި މުބާރާތުން ސިޓީ ވަކިވެފައި މިވަނީ މުބާރާތުގައި އެ ކްލަބުން ބައިވެރިކަން އިއުލާންކުރިތާ ގާތްގަނޑަކަށް ދެ ދުވަސް ހަމަވި ތަނާ އެވެ.
ބައެއް މީޑިއާ ރިޕޯޓްތައް ބުނާގޮތުގައި ޗެލްސީންވެސް އަންނަނީ މުބާރާތުން ވަކިވުމަށްޓަކައި ފުރިހަމަކުރަންޖެހޭ ކަންކަން ފުރިހަމަކުރުމުގެ މަސައްކަތްކުރަމުންނެވެ. މިހާރު އިނގިރޭސި ޕްރިމިއަ ލީގުގައި ބްރައިޓަން އާ ދެކޮޅަށް ޗެލްސީން ކުޅެމުން އަންނަ މެޗު ފެށުމުގެ ކުރިން ސްޓެންފޯޑް ބްރިޖްގެ ބޭރުގައި ޗެލްސީގެ ސަޕޯޓަރުން ވަނީ ސުޕަ ލީގުގައި ޗެލްސީ ބައިވެރިވާން ނިންމި ނިންމުމާ ދެކޮޅަށް އަޑު އުފުލައި މުޒާހަރާވެސްކޮށްފަ އެވެ.
Advertisement
މެންޗެސްޓަ ސިޓީން މުބާރާތުން ވަކިވެ އަދި ޗެލްސީން އެމަގުން ހިނގަން ތައްޔާރުވެފައިވާއިރު މިދިޔަ އާދީއްތަ ދުވަހު ޔޫރަޕިއަން ސުޕަ ލީގު ތައާރަފްކުރި ހިސާބުން ފެށިގެން ފުޓްބޯޅައިގެ އެކި ފަރާތްތަކުން އަންނަނީ އެ މުބާރާތަށް ވަރަށް ބޮޑަށް ފާޑުކިޔަމުންނެވެ. މިގޮތުން ފީފާ އާއި ޔޫއެފާ އިންވެސް ވަނީ މި މުބާރާތް ބަލައި ނުގަންނާނެ ކަމަށްަ ރަސްމީކޮށް އިއުލާންކޮށްފަ އެވެ. އަދި ޔޫއެފާ އިން ވަނީ މުބާރާތުގައި ބައިވެރިވާ ކްލަބްތަކާއި ކުޅުންތެރިންނާ މެދު ހަރުކަށި ފިޔަވަޅުތަކެއް އަޅާނެ ކަމުގެ އިންޒާރު ވެސް ދީފަ އެވެ.
ޔޫރަޕިއަން ސުޕަ ލީގުގައި މެންޗެސްޓަ ސިޓީ އާއި، ޗެލްސީގެ އިތުރުން އިނގިރޭސި ހަތަރު ކްލަބަކުން ބައިވެރިވާން ނިންމި އެވެ. އޭގެ ތެރޭގައި ހިމެނެނީ މެންޗެސްޓަ ޔުނައިޓެޑް، ލިވަޕޫލް، އާސެނަލް އަދި ޓޮޓެންހަމް އެވެ. އިނގިރޭސި ހަ ކްލަބްގެ އިތުރުން މުބާރާތުގައި ބައިވެރިވާން ނިންމި އެހެން ޓީމްތަކަކީ ބާސެލޯނާ، ރެއާލް މެޑްރިިޑް، އެތުލެޓިކޯ މެޑްރިޑް، އިންޓަ މިލާން، އޭސީ މިލާން އަދި ޔުވެންޓަސް އެވެ.
Advertisement
Leave a Reply